GMT+7 24/09/2017 19:02

ສ້າງ ສ ສະອາດໃຫ້ຕົວເມືອງວຽງຈັນ ເພື່ອຕ້ອນຮັບປີທ່ອງທ່ຽວລາວ

 

 

ເພື່ອ​ເປັນ​ການ​ສ້າງ​ຂະ​ບວນການ​ຕ້ອນຮັບ​ວັນ​ສຳຄັນ​ຂອງຊາດ ສືບຕໍ່​ປະຕິບັດ​ຕາມ​ຈົດໝາຍ​ທາງ​ລັດ​ຖະ​ການຂອງ​ທ່ານເຈົ້າ​ຄອງ ນະຄອນຫຼວງ​ວຽງ​ຈັນ ໃນ​ການ​ສ້າງ​ເມືອງ​ວຽງ​ຈັນ​ໃຫ້​ມີຄວາມ​ສວຍ​ງາມ ສະອາດ​ງາມຕາ ໜ້າ​ຢູ່ອາໄສ ຕ້ອນຮັບ​ປີ​ທ່ອງທ່ຽວ​ລາວ 2018 ທີ່​ຈະ​ມາ​ເຖິງ.

 

ຫ້ອງການ​ຄຸ້ມ​ຄອງ ແລະ ບໍ​ລິການ​ຕົວ​ເມືອງ ນະຄອນຫຼວງ​ວຽງຈັນ ຮ່ວມ​ກັບ ​ຄບຕ ເມືອງ ແລະ ຫ້ອງການ​ປົກຄອງ​ເມືອງ ອົງການຈັດຕັ້ງ​ມະຫາຊົນ ແລະ ພໍ່ແມ່​ປະຊາຊົນ ພ້ອມ​ກັນ​ສ້າງ​ຂະບວນ​ການ​ເຮັດອະນາໄມ ປັດກວາດ ຖາງ​ຫຍ້າຕາມ​ແຄມ ຮ່ອງນ້ຳ ຖະໜົນ​ຫົນທາງ ຕາມສາຍ​ຕ່າງໆ ລວມ​ທັງ​ປັບປຸງ​ສ້ອມແປງ​ທາງ​ຮ່ອມ​ພາຍ​ໃນ​ບ້ານ​ຂອງຕົນ​ຢ່າງ​ເປັນ​ຂະ​ບວນ.

 

ຈາກ​ການ​ລາຍ​ງານ​ຂອງ ​ຄບຕ ນວ ໃຫ້​ຮູ້​ວ່າ: ຂະ​ບວນ​ການ​ອອກແຮງ​ງານ​ວັນ​ເສົາ​ແດງ ວັນ​ທີ 9 ກັນຍາ 2017 ຜ່ານ​ມາ ເມືອງ​ໄຊເຊດ​ຖາ ພ້ອມ​ກັນ​ເຮັດອະນາໄມຕາມ​ຖະໜົນ​ກຳແພງ​ເມືອງ ແລະ ຖະໜົນ​ໂພທິ​ສາ​ລາດ (ທາງ 4 ເລນ) ຈັນທະ​ບູ​ລີ ຖະໜົນ​ຂົວ​ຫຼວງ ແລະ ບັນດາ​ທາງ​ຮ່ອມ​ພາຍ​ໃນເມືອງ ສ່ວນ​ເມືອງ​ສີ​ໂຄດ​ຕະບອງ ຈັດ​ເປັນ​ຂະ​ບວນ​ໃຫຍ່ ຕາມ​ຖະໜົນ​ໜອງ​ບຶກ ໜອງ​ບົວທອງ ເສັ້ນທາງ​ໜອງ​ແຕ່ງ ເຊິ່ງ​ນອກຈາກ​ມີ​ບັນດາ​ອຳນາດ​ການ​ປົກຄອງ ພໍ່​ແມ່​ປະຊາຊົນ​ພາຍ​ໃນບ້ານ​ເຂົ້າ​ຮ່ວມ​ແລ້ວ ຍັງ​ມີ​ບັນດາຫ້ອງການ ອົງ​ການຈັດຕັ້ງ​ມະຫາຊົນ​ພາຍ​ໃນ​ເມືອງ​ເຂົ້າ​ຮ່ວມ ມີ​ຜູ້ເຂົ້າ​ຮ່ວມ​ຂະ​ບວນ​ການເກືອບ 100 ກວ່າ​ຄົນ ເຊິ່ງ​ຂະ​ບວນ​ການເຮັດອະນາໄມ​ໃນ​ວັນ​ເສົາ​ທີ່​ຜ່ານມາ ບັນຍາກາດ​ຄຶກຄັກ​ພໍ​ສົມຄວນ ແລະ ຫວັງ​ວ່າ​ໃນ​ເສົາ​ທີ່​ຈະມາ​ເຖິງ ຈະ​ມີ​ຜູ້​ເຂົ້າ​ຮ່ວມ​ຫຼາຍ​ຂຶ້ນກວ່າ​ເກົ່າ.

 

ແຫຼ່ງຂ່າວ: ວຽງຈັນໃໝ່

ຄວາມຄິດເຫັນຂອງຜູ້ອ່ານ (0)