GMT+7 24/09/2017 19:04

ບັນດາປະເທດອາຊຽນ ຫາລື ການຈັດການແຂ່ງຂັນສີມື ແຮງງານອາຊຽນ ຄັ້ງທີ 12

 

 

ຂປລ. ​ໃນ​ວັນ​ທີ່ 11 ກັນຍາ​ 2017 ບັນດາ​ປະ​ເທດ​ສະມາຊິກ​ອາ​ຊຽນ​ໄດ້ ຈັດ​ກອງ​ປະຊຸມ ຄັ້ງທີ 1 ຂອງຄະນະຮັບຜິດຊອບຈັດການ​ແຂ່ງ​ຂັນ​ ສີມື​ແຮງ​ງານ​ອາ​ຊຽນຄັ້ງທີ 12 ຂຶ້ນ ທີ່ໂຮງແຮມດຸສິດທານີຫົວຫີນ ແຂວງເພັດຊະບູລີ ປະເທດໄທ, ໂດຍການເປັນປະທານຂອງທ່ານ ສິຣິໄຊ ດິດສະກຸນ, ລັດຖະມົນຕີກະຊວງແຮງງານແຫ່ງປະເທດໄທ​ ມີບັນດາຜູ້ແທນຂັ້ນສູງ ແລະ ຄະນະວິຊາການກ່ຽວ ຂ້ອງຈາກບັນດາປະເທດສະມາຊິກອາຊຽນ ເຂົ້າຮ່ວມຫລາຍກວ່າ 60 ທ່ານ. 

 

ກອງ​ປະຊຸມ​ຄັ້ງ​ນີ້, ​ຈັດ​ໂດຍກົມພັດທະນາສີມືແຮງງານແຫ່ງປະເທດໄທ ຈຸດປະສົງເພື່ອກຳນົດເນື້ອໃນ, ຫລັກການ ແລະ ແຜນການຂອງການແຂ່ງຂັນ ນຳມາເຊິ່ງແນວທາງ ແລະ ບ່ອນອີງໃຫ້ແກ່ບັນດາປະເທດສະມາຊິກ ອາຊຽນ ນຳໄປສືບຕໍ່ກະກຽມຄວາມພ້ອມຂອງຕົນ.

 

ທ່ານ ລັດຖະມົນຕີກະຊວງແຮງງານແຫ່ງປະເທດໄທ ໄດ້ຍົກໃຫ້ເຫັນ​ເຖິງຄວາມໝາຍຄວາມສຳຄັນ ຂອງການແຂ່ງຂັນສີມືແຮງງານອາຊຽນ ເຊິ່ງເປັນການຊ່ວຍພັດທະນາກຳລັງແຮງງານ ກໍຄື ການພັດທະນາຊັບພະຍາກອນ ມະນຸດ, ການເຊື່ອມໂຍງອາຊຽນ ແລະ ພາກພື້ນ. 

 

ສຳລັບຄະນະຜູ້ແທນລາວນຳໂດຍ ທ່ານ ຄອນສີ ມະຫາວົງ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ. ການເຂົ້າຮ່ວມຂອງຄະນະຜູ້ແທນລາວຄັ້ງ​ນີ້, ​ແມ່ນໄດ້ສະແດງເຈດຈຳນົງ ຕາມທິດທາງນະໂຍບາຍແຫ່ງຊາດ ໃນການປະກອບສ່ວນເຂົ້າຮ່ວມແຂ່ງຂັນ ສີມືແຮງງານອາຊຽນ ທີ່ເປັນການແລກປ່ຽນ ແລະ ສະ​ແດງ​ຄວາມ​ຮູ້ຄວາມ​ສາມາດ ຂອງ​ຊາວ​ໜຸ່ມ ໃນການພັດທະນາສີມື ແຮງງານລາວ​ ທັງເປັນອີກເວທີໜຶ່ງ ໃນການຮັດ​ແໜ້ນ​ສາຍສຳພັນ​ ແລະ ຄວາມ​ສາມັກຄີ ອັນໂອບເອື້ອອາລີ ​ເພື່ອຄວາມ​ເປັນນ້ຳໜຶ່ງ​ໃຈ​ດຽວ ຂອງ​ບັນດາ​ປະ​ເທ​ດສະ​ມາ​ຊິກ​ອາ​ຊຽນ ກໍ​ຄື​ ການ​ຫັນວິ​​ໄສ​ທັດ​ໃຫ້​ເປັນ​ຮູບ​ປະ​ທຳ​ໃນຂອບຂອງອາຊຽນ.

 

ການແຂ່ງຂັນສີມືແຮງງານອາຊຽນ ຄັ້ງທີ 12 ຈະ​ໄດ້ຈັດຂຶ້ນ ໃນລະຫວ່າງວັນທີ 26 ສິງຫາ ຫາ​ ວັນ​ທີ 4 ກັນຍາ 2018, ຊຶ່ງເປັນເຈົ້າພາບ​ ໂດຍ​ແຂວງນົນທະບູລີ ປະເທດໄທ. ​ໃນ​ການ​ແຂ່ງຂັນລວມ ມີ 24 ສາຂາວິຊາ ແລະ 1 ສາຂາວິຊາສາທິດ, ໂດຍຈະມີຜູ້ເຂົ້າແຂ່ງຂັນທັງໝົດ 332 ຄົນ ທີ່​ມີອາຍຸບໍ່ເກີນ 22 ປີ. ສຳລັບ ສປປ ລາວ ໄດ້ກຳນົດແຜນການເບື້ອງຕົ້ນ ທີ່ຈະສົ່ງເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 12, ເປັນຄັ້ງທີ 10 ຂອງ ສປປ ລາວ, ມີ 7 ສາຂາວິຊາ ຄື: ຊ່າງຕິດຕັ້ງໄຟຟ້າ, ຊ່າງໄມ້ເຄື່ອງເຮືອນ, ຊ່າງຈອດໂລຫະ, ຊ່າງປຸງແຕ່ງອາຫານ, ຊ່າງຕັດຫຍິບ, ຊ່າງກໍ່, ແລະ ຊ່າງອອກແບບເວັບໄຊ ໂດຍຈຳນວນນັກແຂ່ງຂັນທິມຊາດລາວ ຈະມີ 2 ຄົນ ຕໍ່ສາຂາວິຊາ.

 

ການແຂ່ງຂັນສີມືແຮງງານອາຊຽນ ມີຂຶ້ນທຸກໆ 2 ປີ, ຄັ້ງທຳອິດ ໄດ້ຈັດຂຶ້ນທີ່ປະເທດມາເລເຊຍໃນປີ 1996, ໂດຍມີ 4 ປະເທດເຂົ້າຮວ່ມການແຂ່ງຂັນ ຄື: ອິນໂດເນເຊຍ, ມາເລເຊຍ, ຟິລິບປິນ ແລະ ໄທ; ຄັ້ງທີ 11, ໄດ້ຈັດຂຶ້ນໃນ ປີ 2016 ທີ່ປະເທດມາເລເຊຍ, ແລະ ຄັ້ງທີ 13 ຈະ​ຈັດ​ຢູ່ປະເທດສິງກະໂປ ໃນປີ 2020. ສຳລັບ ສປປ ລາວ ໄດ້ເລີ່ມເຂົ້າຮ່ວມແຂ່ງຂັນ ຄັ້ງທີ 3 ໃນປີ 2001 ທີ່ບາງກອກປະເທດໄທ ແລະ ໄດ້ເຂົ້າຮ່ວມຕະຫລອດມາ ສາມາດຍາດມາໄດ້ຜົນງານຕາມຈຸດປະສົງ ແລະ ລະດັບຄາດໝາຍໃນແຕ່ລະຄັ້ງ ທັງສາມາດນຳໄປຜັນຂະຫຍາຍ ແລະ ຖ່າຍທອດເຂົ້າໃນການພັດທະນາສີມືແຮງງານລາວ ໃຫ້ດີຍິ່ງໆຂຶ້ນຕາມລຳດັບ.                                 

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)