GMT+7 20/11/2017 04:42

ເກີດເຫດເຂື່ອນໄຟຟ້ານ້ຳອ້າວ ແຕກກະທັນຫັນ ໃນເວລາກຳລັງກໍ່ສ້າງ

 

 

ຂປລ. ​ຫ້ອງການ​ຊັບພະຍາກອນ ​ແລະ ສິ່ງ​ແວດ​ລ້ອມ ​ເມືອງ​ຜາ​ໄຊ ​ໄດ້​ຢືນຢັນ​ ໃນ​ວັນ​ທີ 12 ກັນຍາ 2017 ນີ້ ​ວ່າ: ​ໄດ້​ເກີດ​ເຫດ​ເຂື່ອນ​ໄຟຟ້າ​ນ້ຳ​ອ້າວ ​ແຕກ​ກະທັນຫັນ ໃນ​ເວລາ ປະມານ 14:00​ໂມງ ຂອງ​ວັນ​ທີ 11 ກັນຍາ 2017 ຢູ່​ບ້ານ​ທາ​ໃຕ້ ​ເມືອງ​ຜາ​ໄຊ ​ແຂວງ​ຊຽງ​ຂວາງ ​ໃນຂະນະ​ທີ່​ໂຄງການ​ດັ່ງ​ກ່າວ, ​ພວມ​ດໍາ​ເນີນ​ການ​ກໍ່ສ້າງ.

 

ພາຍຫລັງ​ສື່​ສັງຄົມ​ອອນ​ລາຍ ໄດ້​ເຜີຍ​ແຜ່​ຂ່າວ ​ກໍລະນີ​ເຂື່ອນ​​ໄຟຟ້ານ້ຳ​ອ້າວແຕກ ຜ່ານ​ທາງ​ເຟສ ບຸກ​ໃນ​ຕອນ​ແລງ ວັນ​ທີ 11 ກັນຍາ​ ຢູ່​ແຂວງ​ຊຽງ​ຂວາງ, ຫລ້າ​ສຸດ ທ່ານ ກອງ​ສີ ນັນທະ​ວົງ ຫົວໜ້າ​ຫ້ອງການ​ຊັບພະຍາກອນ ​ແລະ ສິ່ງ​ແວດ​ລ້ອມ ​ເມືອງ​ຜາ​ໄຊ ​ໄດ້​ເປີດ​ເຜີຍ​ຕໍ່​ສຳນັກ​ຂ່າວ ສຳນັກ​ຂ່າວສານ​ປະ​ເທດ​ລາວ ວ່າ: ​ເຂື່ອນ​ດັ່ງກ່າວ​ໄດ້​ແຕກ ປະມານ14:00 ​​ໂມງ ຂອງ​ວັນ​ທີ 11 ກັນຍາ 2017, ຊຶ່ງໄດ້​ເຮັດ​ໃຫ້​ມີກະ​ແສ​ນ້ຳ ​​ພ້ອມ​ກັບຊາກ​​ໄມ້, ຂີ້​ເຫຍື້ອ ​ແລະ ຂີ້ຕົມ ​ໄຫລ​ມາ​ເຖິງເຂດບ້ານທ່າວຽງ ເມືອງທ່າໂທມ ແຂວງໄຊຊົມບູນ ດ້ວຍ​ໄລຍະ​ທາງ 10 ກິ​ໂລ​ແມັດ ​​​ແລະ ​ໄດ້​ເຂົ້າຖ້ວມພື້ນ​ທີ່​ການ​ຜະລິດ, ບ້ານ ​ແລະ ​ເຮືອນ​ຂອງ​ປະຊາຊົນ​ ໃນຕອນບ່າຍ​ເວລາ​ປະມານ 15:00 ​ໂມງ ຂອງວັນ​ດຽວ​ກັນ, ສ່ວນປະຊາຊົນ​ທີ່​ອາ​ໄສ​ຢູ່​ເຂດ​ດັ່ງກ່າວ, ​ໄດ້ພາກັນຍົກຍ້າຍ​ອອກ​ຈາກ​ສາຍ​ນ້ຳ​ທີ່​ໄຫລ​ຊຸ​ແຮງ​ດ້ວຍ​ຄວາມ​ຕົກ​ໃຈ, ​ແຕ່​ຢ່າງ​ໃດ​ກຕາມ​ແຫ​ລ່ງຂ່າວ​ ຈາກ​ພາກສ່ວນ​ທີ່ກ່ຽວຂ້ອງ ​ຍັງ​ບໍ່​ໄດ້​ລາຍ​ງານ​ເຖິງ​ສະພາບຄວາມ​ເສຍ​ຫາຍ, ຜູ້​ເສຍ​ຊີວິດ, ບາດ​ເຈັບ ​ແລະ ຫາຍ​ຊາບ​ສູນ​ເທື່ອ. ປະ​ຈຸ​ບັນ​ປະຊາຊົນຢູ່​ເຂດດັ່ງກ່າວ, ​ມີ​ຄວາມ​ປອດ​ໄພ​ດີ ສ່ວນ​ການຄົມມະນາຄົມຂົນສົ່ງຕາມ​ເສັ້ນທາງ​ D1 ​ເມືອງປາກຊັນ ​ແຂວງ​ບໍລິ​ຄໍາ​ໄຊ ຫາ ​ເມືອງ​ຜາ​ໄຊ ​ແຂວງຊຽງຂວາງ ບໍ່​ສາມາດສັນຈອນ​ໄດ້.

 

ພາຍຫລັງ​ເຂື່ອນ​ແຕກ, ເຈົ້າໜ້າທີ່ກ່ຽວຂ້ອງ​ໄດ້ເລັ່ງ​ເກັບ​ກຳ ​ແລະ ລົງກວດກາຫາສາເຫດຂອງເຂື່ອນແຕກ, ສ່ວນຜົນກະທົບຕົວ​ຈິງ​ເບື້ອງ​ຕົ້ນ ຕໍ່ປະຊາຊົນ ແລະ ພື້ນທີ່ອອ້ມຂ້າງພົບ​ວ່າເສຍຫາຍພໍສົມຄວນ ​ເປັນ​ຕົ້ນ ​​ເຮືອນ, ເນື້ອ​ທີ່​ນາ, ສວນ​ໝາກ​ເດືອຍ ​ແລະ ສັດລ້ຽງ. ນອກຈາກ​ນີ້, ຍັງ​ມີເຮືອນ​ຈັກ​ຂອງ​ເຂື່ອນ​ນ້ຳ​ຫງຽບ 2 ຖືກ​ກະ​ແສ​ນ້ຳ​ພັດ​ເສຍ​ຫາຍ.

 

ເຂື່ອນ​ນ້ຳ​ອ້າວ ເປັນເຂື່ອນນ້ອຍ ມີກຳລັງການຜະລິດກະແສໄຟຟ້າ 15 ເມກາວັດ ພວມ​ດຳ​ເນີນກໍ່ສ້າງ ຢູ່ດ້ານ​ເໜືອ​ຂອງເຂື່ອນນໍ້າງຽບ 2 ​ເຊິ່ງ​​ໄດ້​ເລີ່​ມກໍ່ສ້າງມາ​ແຕ່​ປີ 2015 ​ໂດຍ​ແມ່ນ​ບໍລິສັດ​ບໍ່ທອງອິນເຕີ​ ເປັນ​ຜູ້​ຮັບ​ເໝົາ ປັດຈຸບັນ​ ການ​ກໍ່ສ້າງ​ມີ​ຄວາມ​ຄືບ​ໜ້າ 85%. ​

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)