GMT+7 24/09/2017 19:07

ເມືອງພີນ ເປີດນຳໃຊ້ໂຮງຮຽນອະນຸບານ-ປະຖົມຫລັງໃໝ່

 

 

ຂປລ. ວັນທີ 8 ກັນຍາຜ່ານມານີ້, ເມືອງພີນ ແຂວງສະຫວັນນະເຂດ ໄດ້​ເປີດ​ນໍາ​ໃຂ້ໂຮງຮຽນອະນຸບານ-ປະຖົມ​ຫລັງ​ໃໝ່ ໂດຍເຂົ້າຮ່ວມຂອງ ທ່ານ ຄຳມາດ ເນົາວົງພະຈັນ ເຈົ້າເມືອງພີນ, ທ່ານ ຄຳກອງ ທູນນສົມບັດ ຫົວໜ້າຫ້ອງການສຶກສາທິການ ແລະ ກິລາເມືອງ ພ້ອມ​ບັນດາ​ປະຊາຊົນ ​ແລະ ນັກຮຽນ​ອອ້ມຂ້າງ​ເຂົ້າ​ຮ່ວມ. 

 

ໂຮງຮຽນ​ແຫ່ງ​ດັ່ງກ່າວ ຕັ້ງຢູ່ບ້ານປະສົມໄຊ​ ໂດຍບໍລິສັດລິດຈະເລີນໄຊເປັນຜູ້ຮັບເໝົາກໍ່ສ້າງ ​ເຊິ່ງເລີ່ມລົງມື ແຕ່ວັນທີ 9 ກັນຍາ 2016 ແລະ ສ້າງສຳເລັດວັນທີ 9 ເມສາ 2017 ເປັນອາຄານໜຶ່ງຫລັງ ກວ້າງ 9 ແມັດ, ຍາວ 32 ແມັດ, ມີ 4 ຫ້ອງຮຽນ, ມີໜຶ່ງຫ້ອງການ, ມີຫ້ອງນ້ຳ 6 ຫ້ອງ ເຊິ່ງມີມູນຄ່າທັງໝົດ 441 ລ້ານກວ່າກີບ.

 

ສໍາລັບທຶນຂອງການກໍ່ສ້າງ ຂອງ​ໂຮງຮຽນ​ແຫ່ງ​ດັ່ງກ່າວ ແມ່ນໄດ້ຮັກ​ການປະກອບສ່ວນ ຈາກຫລາຍພາກສ່ວນເຊັ່ນ: ພະນັກງານ, ຄູ-ອາຈານ, ທະຫານ, ຕຳຫລວດ, ພໍ່ຄ້າຊາວຂາຍ, ບໍລິສັດ, ນັກທຸລະກິດ ແລະ ພໍ່ແມ່ປະຊາຊົນ ພາຍໃນສາມບ້ານຄື: ບ້ານພີນ, ບ້ານປະສົມໄຊ ແລະ ບ້ານເວີນຫົງຄຳ ຈາກນີ້ ກໍ່ຍັງມີການປະກອບສ່ວນ ຂອງບໍລິສັດ ວິດຈະເລີນໄຊ ທີ່ໄດ້ຮັບເໝົາກໍ່ສ້າງຕື່ມອີກ.

 

ພ້ອມ​ນີ້ ກໍໄດ້ເປີດນຳໃຊ້ ໂຮງຮຽນປະຖົມຫລັງໃຫມ່ ຂອງບ້ານລະຕຶບ ​ເມືອງ​ຟີ​ນ,ບ້ານລະຕຶບ ມີປະຊາກອນ ທັງໝົດ 390 ຄົນ, ຍິງ 207 ຄົນ, ມີຄົວເຮືອນທັງໝົດ 66 ຄົວເຮືອນ, ບ້ານດັ່ງກ່າວ ເປັນອີກໜຶ່ງບ້ານ ທີ່ໄດ້ຮັບການສະໜັບສະໜູນ ຈາກກອງທຶນຫລຸດຜ່ອນຄວາມທຸກຍາກ (ທລຍ)  ໂດຍສະເພາະ ແມ່ນໂຄງການກໍ່ສ້າງໂຮງຮຽນປະຖົມ 2 ຫ້ອງ ໂດຍໄດ້ມີການປະສານງານ ສົມທົບກັບ ຜູ້ຊີ້ນໍາກຸ່ມບ້ານທີ 4, ຜູ້ປະສານງານກຸ່ມບ້ານ, ອໍານາດການປົກຄອງ ແລະ ປະຊາຊົນພາຍໃນ ບ້ານລະຕຶບ ເພື່ອປະກອບສ່ວນເຂົ້າ ໃນການກໍ່ສ້າງໂຮງຮຽນປະຖົມ 2 ຫ້ອງດັ່ງກ່າວ ທັງນີ້ກໍ່ເພື່ອແນໃສ່ ເສີມສ້າງຄວາມສາມັກຄີ, ຄວາມເຂັ້ມແຂງ ໃຫ້ແກ່ບ້ານພາຍໃນກຸ່ມບ້ານ ແລະ ເປັນກຸ່ມບ້ານ ແບບຢ່າງໃຫ້ແກ່ກຸ່ມບ້ານ ອື່ນໆ. ໂຄງການກໍ່ສ້າງໂຮງຮຽນປະຖົມ 2 ຫ້ອງພາຍໃນບ້ານລະຕືບ, ລວມມີມູນຄ່າກໍ່ສ້າງ ທັງໝົດ 346 ລ້ານກວ່າກີບ ໃນນີ້ ທຶນ ທລຍ 317 ລ້ານກວ່າກີບ, ທຶນຂອງຊຸມຊົນປະກອບສ່ວນ 19 ລ້ານກວ່າກີບ.

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)