GMT+7 24/09/2017 19:08

ສ້າງຄວາມເຂົ້າໃຈ ໃຫ້ພະນັກງານສູນກາງແນວລາວສ້າງ ຊາດ ໃນການເຜີຍແຜ່ວຽກງານໂພຊະນາການ

 

 

ຂປລ. ສູນ​ກາງ​ແນວ​ລາວສ້າງ​ຊາດ ຮ່ວມ​ອົງການ​ຢູນີ​ເຊັບ ປະຈຳ​ລາວ ​ແລະ ສະຫະພາບ​ເອີ​ລົບ ປະຈຳ​ ລາວ ຈັດ​ກອງ​ປະຊຸມ​ປຶກສາ​ຫາລື ການ​ໂຄສະນາ​ວຽກງານ​ໂພຊະ​ນາ​ການ, ສັກ​ຢາ​ກັນ​ພະຍາດ, ສຸຂະ​ອະນາ​ໄມ, ​ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ, ການ​ຄ້າ​ມະນຸດ ​ແລະ ການ​ສຶກສາ​ ສຳລັບ​ເດັກ​ກ່ອນ​ໄວ​ຮຽນ. ​ຊຶ່ງ​ມີຂຶ້ນໃນ​ວັນ​ທີ 11 ກັນຍາ ​ແລະ ຈະ​ສຳ​​ເລັດ ​​ໃນ​ວັນ 13 ກັນຍາ​ ນີ້. ​ເພື່ອເລັ່ງ​ໃສ່​ປັບປຸງ​ຊີວິດ ​ການ​ເປັນ​ຢູ່​​​ຂອງ​ແມ່ຍິງ ​ແລະ ​ເດັກນ້ອຍ​​ໃຫ້​ດີ​ຂຶ້ນ ​ໂດຍ​ສະ​ເພາະ​ເຂດ​ຫ່າງ​ໄກ​ສອກ​ຫລີກ.

 

ທ່ານ ສົມ​ອົກ ກິ່ງ​ສະ​ດາ ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ, ທັງ​ເປັນ​ປະ​ທານ​ກອງ​ປະຊຸມ ​ກ່າວ​: ກອງ​ປະຊຸມ​ຄັ້ງ​ນີ້, ​​ມີ​ຄວາມ​ສຳຄັນ​ຢ່າງ​ຍິ່ງ ​ເພາະ​ເປັນ​ການ​ເສີມ​ຂະຫຍາຍ​ຄວາມ​ຮູ້ ຄວາມ​ສາມາດ ​ໃຫ້​ແກ່​ພະນັກງານ ​ແນວ​ລາວ​ສ້າງ​ຊາດ ​ໃນ​ການປຸກລະດົມ, ຊຸກຍູ້ ​ແລະ ຂົນຂວາຍ​ ພໍ່​-ແມ່​ປະຊາຊົນ ​ເຂົ້າ​ຮ່ວມ​ຂະ​ບວນການ ​ໃນວຽກງານໂພ​ຊະນາ​ການ, ການ​ສັກ​ຢາ​ກັນ​ພະຍາດ, ວຽກງານ​ສຸຂະ​ອະນາ​ໄມ, ການ​ຄ້າ​ມະນຸດ ​ແລະ ການ​ຕ້ານ​ການ​ນຳ​ໃຊ້​ຄວາມ​ຮຸນ​ແຮງ​ຕໍ່​ເດັກ ​ແລະ ການ​ສຶກສາ ສຳລັບ​ເດັກ​ກ່ອນ​ໄວ​ຮຽນຢູ່​ຂັ້ນ​ຊຸມ​ຊົນ, ພ້ອມ​ທັງ​ເສີມ​ຂະຫຍາຍ​ບົດບາດ​ ຂອງ​ແນວ​ລາວ​ສ້າງ​ຊາດ​ສູນ​ກາງ, ​ ​ແຂວງ, ​ເມືອງ ​ແລະ ບ້ານ, ​ໃນການ​ປຸກລະດົມປະຊາຊົນ​ບັນດາ​ເຜົ່າ ​ໃນ​ການ​ແກ້​ໄຂ​ບັນຫາສຸຂະພາບຂ​ອງ​ແມ່ຍິງ ​ແລະ ​ເດັກ, ຊຸກຍູ້​ການ​ມີ​ສ່ວນ​ຮ່ວມ​ຂອງ​ຜູ້ນຳ​ເຜົ່າ​ຕ່າງໆ ​ເພື່ອ​ເຮັດ​ໃຫ້​ພໍ່​-​ແມ່​ປະຊາຊົນ​ຮັບ​ຮູ້, ​ເຂົ້າ​ໃຈ ​ແລະ ຖື​ເປັນວຽກງານ​ສຳຄັນ​ ​ແນ​ໃສ່​ເຮັດ​ໃຫ້​ປະ​ເທດ​ລາວ ບັນລຸ​ເປົ້າໝາຍສະຫັດ​ສະວັດ​ແຫ່ງ​ການ​ພັດທະນາ ​ແລະ ຫລຸດ​ພົ້ນ​ອອກ​ຈາກ ​ປະ​ເທດ​ດ້ອຍ​ພັດທະນາ​ໃນ​ປີ 2020.

 

​ໃນ​ໂອ​ກາດ​ດັ່ງກ່າວ, ທ່ານ ມີ​ໂອ​ ຊີ​ນ ຢູນ ຮັກສາ​ການ​ຜູ້ຕາງໜ້າອົງການ​ຢູນີ​ເຊັບ ປະຈຳ​ລາວ ​ໄດ້​ເຜີຍ​ໃຫ້​ຮູ້​ວ່າ: ການ​ຮ່ວມ​ມື​ຢ່າງ​ເປັນ​ທາງ​ການ ລະຫວ່າງ ອົງການ​ຢູນີ​ເຊັບ​ ​ແລະ ສູນ​ກາງ​ແນວ​ລາວ​ສ້າງ​ຊາດ ​ແມ່ນ​ເລີ່​ມ​ແຕ່ ​ປີ 2015, ​ໂດຍ​ເລັ່ງ​ໃສ່ການ​ປັບປຸງ​ຊີ​ວິດ​ການ​​ເປັນ​ຢູ່​ ທີ່​ດີ​ຂຶ້ນ​ຂອງ​ແມ່ຍິງ ​ແລະ ​ເດັກ​ນ້ອຍ​ໃນ​ທົ່ວ​ປະ​ເທດ, ​ໂດຍ​ສະ​ເພາະ​ໃນ​ເຂດ​ຊົນນະບົດ, ຊຶ່ງ 2 ປີຜ່ານມາ​​​ ແມ່ນ​ໄດ້ລົງເຄື່ອນ​​ໄຫວ​ປຸກ ລະດົມພໍ່​-ແມ່​ປະຊາຊົນ ​ເຂົ້າ​ຮ່ວມ​ຂະ​ບວນການ​ຕ້ານ ​ແລະ ສະກັດ​ກັ້ນ​ພະຍາດ​ໂປ​ລີ​ໂອ ຢູ່​ແຂວງ​ບໍລິ​ຄຳ​ໄຊ, ​ໄຊ​ສົມບູນ ​ແລະ ​ແຂວງ​ວຽງຈັນ ​ສຳ​ເລັດ, ພ້ອມ​ນັ້ນ​, ຍັງ​​ໄດ້​ນຳ​ຜ້າ​ຫົ່ມ 3 ພັນ​ຜືນ​ ໄປ​ມອບ​ໃຫ້​ປະ ຊາຊົນຜູ້ປະສົບ​ໄພ​ໜາວ ຢູ່​​ແຂວງຊຽງຂວາງ, ​ຫົວພັນ ​ແລະ ​ແຂວງຜົ້ງ​ສາລີ.

 

ນອກຈາກ​ນີ້, ອົງການຢູນີ​ເຊັບປະຈຳ​ ລາວ ຍັງ​ຈະ​​ໃຫ້ການ​ສະໜັບສະໜູນ ​ແລະ ສືບ​ຕໍ່​ຮ່ວມ​ມື​ກັບ​ ສູນ​ກາງ​ແນວ​ລາວ​ສ້າງ​ຊາດ ​ໃນ​ການ​ໂຄສະນາ​ໃຫ້​ຄວາມ​ຮູ້ ​ແລະ ຮັບ​ຮ້ອງ​ເອົາ​ຍຸດ​ທະ​ສາດຕ່າງໆ ​ເພື່ອ​ນຳ​ມາປັບປຸງ​ຄວາມ​ເປັນ​ຢູ່​ທີ່​ດີ​ຂອງ​ແມ່ຍິງ ​ແລະ ​ເດັກນ້ອຍ.

 

 

ແຫຼ່ງຂ່າວ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)