GMT+7 20/11/2017 04:38

ງານເດີນແບບອາພອນຜົນງານຊະນະເລີດ ຂອງນັກ ອອກແບບໜຸ່ມນ້ອຍ

 

 

ຂປລ. ງານ​​ເດີນ​ແບບ​​ສະ​ແດງອາພອນ​ ​ຜົນງານ​ນັກ​ອອກ​ແບບໜຸ່ມນ້ອຍ​ຂອງ​ລາວ ​ໄດ້​ຈັດ​ຂຶ້ນ​ໃນ​ວັນ​ທີ 9 ກັນຍາ ນີ້ ທີ່​ນະຄອນຫລວງ​ວຽງຈັນ, ພາຍຫລັງ​ຊະນະການ​ປະ​ກວດ ໂຄງການພັດທະນານັກອອກແບບໜຸ່ມນ້ອຍຂອງລາວ ປະຈຳ​ປີ 2017. ​​ໂດຍການເປັນປະທານຂອງທ່ານ ນາງ ປານີ ໄຊຍະວົງສ ຜູ້ອໍານວຍການລາວແຟຊັ້ນວິກ ແລະ ໂຄງການພັດທະນາ ນັກອອກແບບໜຸ່ມນ້ອຍຂອງລາວ, ​ໂດຍມີທ່ານ ສົມສະໜຸກ ມີໄຊ ຮອງປະທານສະມາຄົມ ນັກຂ່າວແຫ່ງ ສປປ ລາວ, ທັງ​ເປັນປະທານ​ສະພາ​ບໍລິຫານ​ລາວ​ແຟຊັ້ນ​ວີກ ແລະ ໂຄງການພັດທະນານັກອອກແບບ ໜຸ່ມນ້ອຍຂອງລາວ, ບັນດານັກ​ອອກ​ແບບ​ພາຍ​ໃນ ​ແລະ ຕ່າງປະ​ເທດ,​ພ້ອມ​ດ້ວຍສື່ມວນຊົນ​ເຂົ້າ​ຮ່ວມ. 

 

ໃນ​ໂອກາດ​ດັ່ງກ່າວ, ທ່ານ ນາງ ປານີ ໄຊຍະວົງສ ​ກ່າວ​ວ່າ: ງານ​ສະ​ແດງ​ອາພອນ​ຄັ້ງ​ນີ້, ​​​ແມ່ນເປັນ​​ເວທີ​ສະ​ແດງ​ຄວາມ​ສາມາດ ຂອງ​ນັກ​ອອກ​ແບບໜຸ່ມນ້ອຍ​ລາວ ທັງ​ເປີດ​ໂອກາດ ​ໃຫ້​ກ້າວ​ສູ້​ວົງ​ການ​ແຟຊັ້ນ​ມື​ອາຊີບ, ໂດຍຜ່ານ​ໂຄງການພັດທະນາ ນັກ​ອອກ​ແບບໜຸ່ມນ້ອຍ​ຂອງ​ລາວ. ​ໃນປີຜ່ານມາທາງ​ໂຄງການ​​ໄດ້​ຈັດ​ປະ​ກວດ ​ແລະ ​ໄດ້​ສົ່ງຜູ້​ຊະນະ​ເລີດຄົນ​ທຳ​ອິດ​ ໄປ​ສຶກສາ​ຕໍ່​ທີ່​ຕ່າງປະ​ເທດ ໃນ​ຫລັກສູດ​ການ​ອອກ​ແບບ. ທັງ​ນີ້, ​ກໍ​ເພື່ອເປັນການ ພັດທະນາ ນັກອອກແບບ ໜຸ່ມນ້ອຍຂອງລາວ ແລະ ໃຫ້ໂອກາດແກ່ພວກເຂົາເຈົ້າ ໄດ້ສືບສານຄວາມຝັນຂອງຕົນ ກ້າວເຂົ້າ ໄປໃນວົງການແຟຊັ້ນລະດັບມືອາຊີບ ແລະ ນໍາຊື່ສຽງລາວ ໃຫ້ໄປຢູ່ໃນແຜນທີ່ຂອງວົງການ ແຟຊັ້ນ ຂອງລະດັບໂລກ

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)