GMT+7 24/09/2017 19:04

ຮ່ວມສະຫຼອງວັນລຶບລ້າງການກືກໜັງສື

 

 

ກະຊວງ​ຖະ​ແຫຼ່ງ​ຂ່າວ ວັດ​ທະນະ​ທຳ ແລະ ທ່ອງ​ທ່ຽວ ຮ່ວມ​ກັບຫໍສະໝຸດ​ແຫ່ງ​ຊາດ ຈັດ​ກິດ​ຈະກຳສະເຫຼີມສະຫຼອງ ​ວັນ​ລຶບລ້າງການ​ກືກ​ໜັງສື​ສາກົນ ໃນ​ວັນ​ທີ 8 ກັນຍາ 2017 ທີ່​ຫໍສະໝຸດ​ແຫ່ງຊາດ ໂດຍ​ມີທ່ານ​ນາງ ບົວ​ໄຂ ເພັງ​ພະຈັນ ຫົວໜ້າ​ກົມ​ພິມ​ຈຳໜາຍ ກະຊວງ ຖວທ ທ່ານ​ນາງ ຂັນ​ທະ​ມາລີ ຍັງ​ນຸ​ວົງ ອຳນວຍການ​ຫໍສະໝຸດ​ແຫ່ງ​ຊາດ ມີ​ທີ່​ປຶກສາ​ສະມາຄົມ​ຫ້ອງ​ສະໝຸດ​ລາວ ແຂກ​ຖືກ​ເຊີນ ແລະ ຄູ-ອາຈານ ນ້ອງ​ນັກຮຽນ ​ເຂົ້າ​ຮ່ວມ.

 

ທ່ານ​ນາງ ຂັນ​ທະ​ມາລີ ຍັງນຸ​ວົງ ກ່າວ​ວ່າ: ອົງການ​ສະຫະປະຊາ​ຊາດ ກຳນົດ​ເອົາ​ວັນ​ທີ 8 ກັນຍາ 1965 ເປັນ​ມື້​ສະເຫຼີມ​ສະຫຼອງ​ວັນ​ລົບ​ລ້າງ​ການ​ກືກ​ໜັງສືສາກົນ ມາ​ຮອດ​ປັດຈຸບັນ ຄົບຮອບ 52 ປີ ເຊິ່ງ​ທົ່ວ​ໂລກ​ໄດ້​ສະເຫຼີມ​ສະຫຼອງ​ພ້ອມ​ກັນ ສະເພາະ ​ສປປ ລາວ 2014 ໄດ້​ປະກາດ​ຈົບຊັ້ນ​ປະຖົມ​ສຶກ​ສາ​ບຳລຸງ​ທົ່ວ​ປະເທດ ສາມາດ​ບັນລຸ​ເປົ້າ​ໝາຍສະຫັດ​ສະ​ວັດ​ດ້ານ​ການ​ພັດທະນາ ເຊິ່ງ​ສາມາດ​ບັນລຸ​ເປົ້າ​ໝາຍ​ທີ 2 ກໍ່​ຄືການ​ພັດທະນາ​ບຸ​ຄະລາກອນ​ໃຫ້​ມີ​ຄວາມ​ຮູ້ ສາມາດ​ອ່ານອອກຂຽນ​ໄດ້ ປະຕິບັດ​ຕໍ່​ພັນທະສາກົນ ພ້ອມ​ດຽວ​ກັນ​ພັກ​ລັດ​ຖະບານ ສ້າງ​ແຜນ​ຍຸດ​ທະ​ສາດ​ປະຕິຮູບ​ການ​ສຶກ​ສາ​ແຫ່ງ​ຊາດ ສ້າງໂອກາດ​ສົ່ງເສີມ​ເດັກນ້ອຍ​ເກນ ອາຍຸ 6-14 ປີ ໂດຍ​ສະເພາະຜູ້ຍິງ​ຜູ້​ດ້ອຍ​ໂອກາດ ປະລະ​ການຮຽນ​ໃນ​ສາຍ​ສາມັນ​ ຢູ່​ເຂດ​ຊົນ​ນະບົດ​ຫ່າງ​ໄກ​ສອກຫຼີກ​ ໄດ້​ເຂົ້າ​ຮຽນຈົບ​ຊັ້ນ​ປະຖົມ.

 

ສະເພາະ​ກິດຈະກຳ​ໃນ​ຄັ້ງ​ນີ້ ມີ​ການ​ເລົ່າ​ນິທານ ແຕ້ມ​ຮູບ ຫຼິ້ນເກມ ສະແດງ​ລະຄອນ​ຫຸ່ນ ວາງສະແດງ​ປື້ມ ແລະ ແຈກ​ປື້ມ​ໃຫ້ແກ່​ນ້ອງ​ນັກຮຽນ ພ້ອມ​ດຽວ​ກັນ ຍັງ​ໄດ້​ມອບ​ລາງວັນ​ໃຫ້​ກັບ​ນ້ອງນັກຮຽນ ​ທີ່​ເຂົ້າ​ຮ່ວມ​ການ​ແຂ່ງຂັນກິດຈະກຳ​ໃນ​ຄັ້ງ​ນີ້.

 

 

ແຫຼ່ງຂ່າວ: ວຽງຈັນໃໝ່

ຄວາມຄິດເຫັນຂອງຜູ້ອ່ານ (0)