GMT+7 20/11/2017 04:39

ການຄວບຄຸມສະຫຼາກໜ້າຊອງຢາສູບ ຍັງພົບບັນຫາຫຍຸ້ງຍາກ

 

 

ກົມ​ອະນາໄມ-ສົ່ງເສີມ​ສຸ​ຂະພາບ ກະຊວງ​ສາທາລະນະ​ສຸກ ພ້ອມ​ດ້ວຍ​ກົມ​ຕຳຫຼວດ​ສິ່ງ​ແວດລ້ອມ ແລະ ຂະແໜງ​ອຸດ​ສາ​ຫະກຳ ແລະ ການ​ຄ້າ ໃນ​ວັນ​ທີ 5 ກັນຍາ 2017 ໄດ້​ລົງ​ຕິດຕາມກວດກາ​ການຈັດຕັ້ງ​ປະຕິບັດ​ກົດໝາຍ ແລະ ຂໍ້​ຕົກລົງ​ວ່າ​ດ້ວຍການ​ຄວບ​ຄຸມ​ຢາສູບ​ ຢູ່​ຕາມ​ບັນດາ​ຮ້ານ​ຄ້າ​ທົ່ວ​ໄປ​ໃນ​ນະຄອນຫຼວງ​ວຽງ​ຈັນ.

 

ການ​ລົງ​ຄັ້ງ​ນີ້ ຄະນະ​ໄດ້​ເລືອກເອົາ 3 ຮ້ານ​ຄ້າ​ເປົ້າ​ໝາຍຄື: ຮ້ານ​ເອັມ​ພອຍ​ມາກ ສາຂາ​ໃຫຍ່ (ຫຼັກ 7) ຮ້ານ​ປ້າທອງ​ດີ ຈຳໜ່າຍ​ເຄື່ອງ​ອຸປະໂພກ​ທົ່ວ​ໄປ ບ້ານ​ໜອງ​ບອນ ທັງ​ສອງ​ຮ້ານຂຶ້ນ​ກັບເມືອງ​ໄຊ​ເຊດ​ຖາ ແລະ ຮ້ານ​ເຄື່ອງ​ອຸປະໂພກ​ທົ່ວ​ໄປ ບ້ານເກົ້າ​ຍອດ ເມືອງ​ສີ​ສັດຕະ​ນາກ ຜ່ານ​ການ​ລົງ​ຕິດຕາມ​ກວດກາຕົວ​ຈິງ ທັງ 3 ຮ້ານ ຍັງ​ພົບ​ເຫັນຜະລິດ​ຕະ​ພັນ​ຢາສູບ​ບາງ​ປະເພດ ທີ່​ຜະລິດ​ຢູ່​ພາຍ​ໃນ ແລະ ນຳ​ເຂົ້າຈາກ​ຕ່າງປະເທດ​ ຍັງ​ບໍ່​ທັນ​ປະຕິບັດ​ຕາມ​ກົດໝາຍ ວ່າ​ດ້ວຍ​ການຄວບ​ຄຸມ​ຢາສູບ​ຂອງ ​ສປປ ລາວ ທີ່​ໄດ້​ຄວບ​ຄຸມ​ກາ​ຕິດ​ສະຫຼາກ​ພື້ນທີ່​ໜ້າ​ຊອງຢາ​ສູບ​ທີ່​ມີ​ຮູບ​ພາບ ແລະ ຄຳເຕືອນ​ຜົນ​ຮ້າຍ​ຂອງການ​ສູບຢາ ບໍ່​ໃຫ້​ຫຼຸດ 75% ແຕ່ກໍ່​ຍັງ​ມີ​ບາງ​ບໍລິສັດ​ທີ່​ເປັນ​ຕົວແທນ​ຈຳໜ່າຍ​ຜະລິດ​ຕະ​ພັນ​ຢາສູບ ​ລະເມີດ ແລະ ຝ່າຝືນ​ກົດ​ລະບຽບ​ລັກລອບ​ນຳ​ເຂົ້າ​ມາ​ຂາຍ​ຢູ່ຕາມ​ຮ້ານ​ຄ້າ​ທົ່ວ​ໄປ ເຊິ່ງ​ຂໍ້​ຕົກລົງກ່ຽວ​ກັບ​ການຈັດຕັ້ງ​ປະຕິບັດ​ກົດໝາຍວ່າ​ດ້ວຍ​ການ​ຄວບ​ຄຸມ​ຢາສູບ​ນີ້ ແມ່ນ​ໄດ້​ເລີ່ມ​ປະຕິບັດ​ມາແຕ່​ເດືອນ​ພະຈິກ 2016.

 

ທ່ານ​ນາງ ພອນ​ສະຖຽນ ໄຊ​ຍະ​ລາດ ກົມ​ອະນາໄມ-ສົ່ງເສີມ​ສຸຂະພາບ ກ່າວ​ວ່າ: ຜະລິດຕະ​ພັນ​ຢາສູບ​ທີ່​ຜະລິດ​ຢູ່​ພາຍໃນ​ປະເທດ ແລະ ນຳ​ເຂົ້າ​ມາຈາກ​ຕ່າງປະເທດ ເພື່ອ​ຈຳໜ່າຍໃນ​ລາວ ລວມ​ທັງ​ຮ້ານ​ຄ້າ​ປອດພາສີ ​ຕ້ອງ​ໄດ້​ພິມ​ຄຳເຕືອນ​ສຸ​ຂະພາບ​ໃຫ້​ຖືກຕ້ອງ​ຕາມ​ຫຼັກການ ທີ່ກົມ​ອະນາໄມ-ສົ່ງເສີມ​ສຸຂະພາບ ກະຊວງ​ສາທາລະນະ​ສຸກ ເປັນ​ຜູ້ກຳນົດ​ຄຳເຕືອນ​ສຸຂະພາບ​ທີ່​ເປັນຮູບ​ພາບ ແລະ ຂໍ້ຄວາມ​ຕົວໜັງສື​ເປັນ​ພາສາ​ລາວ ເພື່ອ​ສະໜອງ​ໃຫ້​ແກ່​ຜູ້​ດຳເນີນ​ທຸລະ​ກິດຜະລິດ ແລະ ນຳ​ເຂົ້າ​ຜະລິດ​ຕະພັນ​ຢາສູບ ​ໃນ​ການ​ຈັດ​ພິມ​ຕາມຕົ້ນ​ສະບັບ ແລະ ຕ້ອງ​ມີ​ການ​ກຳນົດ​ຄຳເຕືອນ​ສຸຂະພາບ​ໃໝ່​ໃນທຸກ 2 ປີ ຫຼື ແຕ່​ລະ​ໄລຍະ ໂດຍອີງ​ຕາມ​ຜົນ​ການ​ຄົ້ນຄວ້າ​ທາງດ້ານ​ວິຊາ​ການ ທັງ​ພາຍ​ໃນ ແລະ ສາກົນ ສຳລັບຄຳເຕືອນ​ສຸ​ຂະພາບ ແລະ ຂໍ້ຄວາມ​ປະກອບດ້ວຍ 6 ແບບຄື: ແບບ​ທີ 1 ຮູບ ແລະ ຂໍ້ຄວາມ​ຄຳເຕືອນ​ຄວັນ​ຢາສູບ​ພາໃຫ້​ເປັນ​ມະ​ເຮັງ​ປອດ ແບບ​ທີ 2 (ຕາມ​ລຳດັບ) ພາໃຫ້ເປັນ​ມະ​ເຮັງ​ປາກ ພາໃຫ້​ເສັ້ນເລືອດ​ສະໝອງ​ແຕກ ຫົວໃຈວາຍ ແຂ້ວ​ດຳ-ປາກ​ເໝັນ ແລະ ແບບ​ທີ 6 ຂ້າ​ຄົນ​ທາງ​ຂ້າງ.

 

ສຳລັບ​ມາດ​ຕະການ​ຕໍ່​ຜູ້​ລະເມີດ ບຸກຄົນ ນິຕິບຸກຄົນ​ໃດ ຫຼື ອຸດສາຫະກຳ​ຢາສູບ​ໃດ ຫາກ​ໄດ້ລະເມີດ​ຕໍ່​ຂໍ້​ຫ້າມ​ຕາມ​ທີ່​ໄດ້​ກຳນົດໄວ້​ໃນ​ມາດຕາ​ທີ 12 ຂອງ​ດຳລັດ ການ​ພິມ​ຄຳເຕືອນ​ສຸຂະພາບ ແລະ ສະຫຼາກໃສ່​ວັດຖຸ​ຫຸ້ມ​ຫໍ່​ຜະລິດ​ຕະ​ພັນ​ຢາສູບ ຈະ​ຖືກ​ປະຕິບັດຕາມ​ມາດ​ຕະການ ຄື: ຄັ້ງ​ທີ 1 ກ່າວ​ເຕືອນ​ສຶກ​ສາ​ອົບຮົມ​ໃຫ້​ຂຽນໃບ​ປະຕິຍານ ຄັ້ງ​ທີ 2 ອາ​ຍັດ ແລະ ປັບ​ໃໝ 1 ເທົ່າ​ຕົວ​ຂອງ​ມູນຄ່າ​ຜະລິດ​ຕະ​ພັນ​ຢາສູບທີ່​ຂາຍຕາມ​ຕະຫຼາດ ໂດຍ​ຄິດໄລ່​ຕາມຈຳນວນ​ຜະລິດ​ຕະ​ພັນ​ທີ່​​ກວດພົບ​ຕົວ​ຈິງ ຫຼື ຕາມ​ໃບ​ນຳ​ສົ່ງ​ສິນຄ້າ​ທີ່​ທາງ​ການ​ຮັບ​ຮູ້ ຄັ້ງ​ທີ 3 ອາ​ຍັດ ແລະ ປັບ​ໃໝ 3 ເທົ່າ​ຕົວຂອງ​ມູນ​ຄ່າ​ສິນຄ້າຕາມ​ທີ່​ກ່າວໄວ້ ໃນ​ຄັ້ງ​ທີ 2 ຄັ້ງ​ທີ 4 ອາ​ຍັດ ແລະ ປັບ​ໃໝ 5 ເທົ່າ​ຕົວ​ຂອງມູນ​ຄ່າ​ສິນຄ້າ​ຕາມ​ທີ່​ກ່າວ​ໄວ້ໃນ​ຄັ້ງ​ທີ 2 ພ້ອມ​ທັງ​ສະເໜີການຈັດຕັ້ງ​ທີ່​ມີ​ສິດ​ຖອນ​ໃບ​ອະນຸຍາດ​ດຳເນີນ​ທຸລະ​ກິດ​ແບບ​ຊົ່ວຄາວ ຫຼື ຖາວອນ ຕາມ​ກໍລະນີເບົາ ຫຼື ໜັກ.

 

 

ແຫຼ່ງຂ່າວ:​ວຽງຈັນໃໝ່

ຄວາມຄິດເຫັນຂອງຜູ້ອ່ານ (0)