GMT+7 20/11/2017 04:42

ແຂວງຊຽງຂວາງ ສຸມໃສ່ສົ່ງເສີມການຜະລິດສິນຄ້າ ເພື່ອສົ່ງອອກ

 

 

ໄລຍຜ່ານ​ມາແຂວງ​ຊຽງຂວາງ​ ໄດ້​ສຸມ​ໃສ່ຊຸກຍູ້ ​ແລະ ສົ່ງ​ເສີມ​ການ​ຜະລິດ 5 ປະ​ເພດສິນຄ້າ​​ ເພື່ອ​ສະໜອງພາຍ​ໃນ ​ແລະ ​ການ​ສົ່ງອອກ​ ​ເປັນ​ຕົ້ນ ການລ້ຽງສັດ​ໃຫຍ່ ມີ ງົວ, ຄວາຍ, ມ້າ, ​ແກະ, ​ແບ້, ການ​ປູກ​​ເຂົ້າ​ໄກ່​ນ້ອຍ, ການປູກ​ສາລີ, ການ​ປູກ​ມອນ​ລ້ຽງມ້ອນ ​ແລະ ການ​ປູກ​ຢາງ​ແປ​ກ ​ໄດ້​ປະກອບສ່ວນ​ສ້າງ​ວຽກ​ເຮັດ​ງານ​ທຳ ​ແລະ ສ້າງ​ລາຍ​ໄດ້​ໃຫ້​ປະຊາຊົນ​ເພີ່ມ​ຂຶ້ນ, ທັງ​ປະກອບສ່ວນ ເຂົ້າ​ໃນ​ການ​ພັດທະນາ​ເສດຖະກິ​ດຂອງ​ແຂວງ.

 

ທ່ານ ສົມ​ກົດ ມັ່ງ​ໜໍ່​ເມກ ​ເຈົ້າ​ແຂ​ວງຊຽງຂວາງ ​​ໃຫ້ຮູ້​ວ່າ: ສຳລັບໃນ​ການລ້ຽງສັດ​​ໃຫ່ຍ​​ ​ທາງ​ແຂວງ​ ແມ່ນ​ໄດ້ດຶງ​ດູດ​ນັກ​ລົງທຶນ ​ເອກະ​ຊົນ​ຈາກ​ຢີ່ປຸ່ນ, ປັດຈຸບັນ​ໄດ້ມີ​ການ​ລົງທຶນ​ໄປ ​ແລ້ວຫລາຍ ກວ່າ 17 ລ້ານ​ໂດ​ລາ​ສະ​ຫະລັດ ເປັນ​ຕົ້ນ​ແມ່ນການ​ລ້ຽງງົວພັນ​ຊີ້ນ, ພັນ​ນົມ, ​​ເຊິ່ງມີເຖິງ 1.000 ​ໂຕ ​​ແລະເກີດ​ລູກ​ແລ້ວ 400 ກວ່າ​ໂຕ. ນອກ​ຈາກນັ້ນ,​ ທາງ​ບໍລິສັດ​ຢີ່ປຸ່ນ ກຳລັງສັ່ງຊື້ງົວ​ພັນ ​ຈາ​ກປະ​ເທດອົດ​ສະຕຣ​າລີ ​ເປັນງົວ​ພັນ​ກຳລັງຖືພາ 5 ​ເດືອນ ຈຳນວນ1.000 ​ໂຕ​, ​ຄາດ​ວ່າ​ຈະ​ມາ​ຮອດ​ລາວ ​ໃນ​ເດື​ອນຕຸລາໜ້ານີ້ ​ແລະ​ ຈະ​ມີ​ການປະສົມ​ພັນ​ແບບນ້ຳ​ເຊື້​ອ ​ແລະ ​ແບບ​​​ປະສົມ​ພັນ​ທຳ​ມະ​ຊາດ, ພ້ອມ​ດຽວ​ກັນ ທາງ​ບໍລິສັດ ​ໄດ້​ເລີ່​ມຈຳໜ່າຍນົມ​ສົດ ​ທີ່​ໄດ້​ຈາກ​ງົວ​ພັນ​ນົມ​ ໃຫ້​ປະຊາ​ຊົນ​ ພາຍ​ໃນ​ແຂວງ​ຊຽງຂວາງ​ ໄດ້​ດື່ມເປັນ​ທີ່​ຮຽບຮ້ອຍ​ແລ້ວ, ​ແຕ່​ຜ່ານ​ມາຍັງ​ບໍ່​ທັນ​ມີ​ໂຮງງານ ​ເພື່ອປຸງ​ແຕ່ງ​ຢ່າງ​ຖາວອນ​ເທຶ່ອ. ດັ່ງ​ນັ້ນ, ທາງ​ບໍລິ​ສັດ​ ຈຶ່ງ​ໄດ້ນຳ​ເຂົ້າ​ເຄື່ອງອຸປະກອນ ​ທີ່​ຈະ​ສ້າງ​ໂຮງງານ​​ໄດ້​ 98%, ​ເພື່ອກຽມພ້ອມ​ລົງມືກໍ່​ສ້າງ​​ ໃນ​ອີກ 2-3 ​ເດືອນ​ຕໍ່ໜ້ານີ້, ສ່ວນ​ງົວ​ພັນ​ຊີ້ນ ​ຄາດ​ວ່າອີກ​ສອງ​ປີ ​ຈະ​ໄດ້​ມີ​ການສະໜອງການ​ບໍລິ​ໂພ​ກພາຍ​ໃນ ​ແລະ ​ສົ່ງ​ອອກຕ່າງປະ​ເທດ​. ສຳລັບ​ການ​ປູ​ກ​ເຂົ້າ​ໄກ່​ນ້ອຍ,ປູກ​ສາລີ ​ແລ​ະ ການ​ປູກ​ມອ​ນ ລ້ຽງມ້ອນ ​ແມ່ນ​​ເປັນຮີດຄອງ​ປະ​ເພນີ ຂອງ​ຊາວຊຽງຂວາງ ​ແລະ ​ແຂວງ​ຫົວພັນ ມາ​ແຕ່​ດັ້ງ​ເດີມ. ​ໃນ​ຂະນະ​ທີ່ການ​ປູກ​​ໄມ້​ແປກ​ແມ່ນ​ໄດ້​ນຳ​ເຂົ້າ​ເບ້ຍ​ໄມ້ ​ຈາ​ກຕ່າງປະ​ເທດ ​ແລະ ​ເອົາ​ມາ​ປະສົ​ມພັນ​ກັບ​ຕົ້ນ​ແປກ​ຂອງ​ຈີນ ​ເພື່ອນຳ​ມາ​ປູກ​ຢູ່​ແຂວງ​ຊຽງຂວາງ, ຢາງ​ແປກ​ຖ້າ​ທຽບ​ໃສ່ຢາງພາລາ ​ແມ່ນມີ​ລາຄາ​ດີກ​ວ່າ ​ເພາະ​ຢາງ​ແປກ ​ສາມາດ​ນຳ​ມາ​ຜະລິດ​ເປັນ​ສິນຄ້າ​ໄດ້​​ເຖິງ 30 ກວ່າ​ຊະນິດ.

 

ທ່ານ ສົມ​ກົດ ມັ່ງ​ໜໍ່​​ເມກ ​ກ່າວ​ຕື່ມ​ວ່າ: ຈາ​ກນີ້ຈົນ​​ເຖິງ 2030 ບໍລິສັດ​ຢີ່ປຸ່ນ ຈະ​ລົງທຶນ​ເພີ່​ມ ຂຶ້ນ​ເຖິງ 70 ລ້ານກວ່າ​​ໂດ​ລາ​ສະຫະ​ລັດ, ນອກຈາກຈະ​​ເປັນ​ການ​ປະກ​ອບສ່ວນ ​ຢ່າງໃຫຍ່​ຫລວງ​​ໃນ​ການ​ພັດທະນາ​ເສດຖະກິດ ​ຂອງ​ແຂວງ​ແລ້ວ ຍັງ​ຈະ​ເພີ່ມ​ການ​ບໍລິ​ໂພ​ກຊີ້ນ​ງົວ​ ພາຍ​ໃນ​ໃຫ້​ພຽງພໍ ​ແລະ ສົ່ງ​ອອກ​ຕ່າງປະ​ເທດ, ພ້ອມ​ສ້າງ​ວຽກ​ເຮັດ​ງານ​ທຳ ​​ໃຫ້​ປະຊາຊົນ​ທ້ອງ​ຖິ່ນ​ຫລາຍ​ຂຶ້ນ​ກວ່າ​ເກົ່າ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)