GMT+7 20/11/2017 04:44

ກວດຄົ້ນລົດຈັກເປົ້າໝາຍ ພົບຢາເສບຕິດຫຼາຍລາຍການ

 

 

ໃນອາທິດຜ່ານມາ, ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ສົມທົບກັບເຈົ້າໜ້າທີ່ຕໍາຫຼວດວິຊາສະເພາະ ປກສ ແຂວງວຽງຈັນ ໄດ້ສະກັດກວດຄົ້ນລົດຈັກເປົ້າໜາຍຄ້າ-ຂາຍຢາເສບຕິດ ໃນຄະນະທີ່ກໍາລັງເອົາຢາເສບຕິດໄປສົ່ງໃຫ້ຜູ້ສັ່ງຊື້ ພົບຢາບ້າຈຳນວນ 13.000 ເມັດ , ຢາຝິ່ນຈຳນວນ 900 ກຼາມ ແລະ ແປ້ງຝຸ່ນສີຂາວ 4,5 ກິໂລກຼາມ ພ້ອມທັງຈັບຕົວຜູ້ຂັບຂີ່ ຊື່ ທ້າວ ແອວ່າງ ອາຍຸ 30 ປີ ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ໄປສອບສວນ.
 

ຜ່ານການສຶບສວນ – ສອບສວນຂອງເຈົ້າໜ້າທີ່ ທ້າວ ແອວ່າງ ໃຫ້ການຮັບສາລະພາບວ່າ: ໃນເບື້ອງຕົ້ນ ໃນວັນທີ 24 ສິງຫາ 2017 ໄດ້ຕິດຕໍ່ພົວພັນຊື້ຢາເສບຕິດຈໍານວນດັ່ງກ່າວ ຈາກຜູ້ຮ່ວມຂະບວນການນໍາກັນ ຢູ່ແຂວງອຸດົມໄຊ ໂດຍຫຸ້ມຫໍ່ຢາເສບຕິດໃສ່ແກັດແລ້ວລັກລອບຝາກໄປນໍາລົດໂດຍສານປະຈໍາທາງ ເຊິ່ງແມ່ນ ທ້າວ ແອວ່າງ ເປັນຜູ້ລໍຖ້າຮັບເອົາຢູ່ບ່ອນນັດໝາຍ ແລ້ວເອົາໄປຊຸກເຊື່ອງໄວ້ຢູ່ເຮືອນ ເພື່ອກຽມລໍຖ້າຜູ້ສັ່ງຊື້.
 

ມາຮອດວັນທີ 27 ສິງຫາ 2017 ໄດ້ມີຜູ້ຮ່ວມຂະບວນການນໍາກັນໂທລະສັບສັ່ງຊື້ຢາບ້ານຳ ທ້າວ ແອວ່າງ ຈຳນວນ 27 ມັດ ແຕ່ຢາບ້າຂອງ ທ້າວ ແອວ່າງ ມີບໍ່ພໍ ຜູ້ກ່ຽວຈຶ່ງນັດສົ່ງຢາບ້າ ຈຳນວນ 6 ມັດ ໃຫ້ກ່ອນ ສ່ວນທີ່ເຫຼືອແມ່ນສົ່ງຕາມຫຼັງ ໂດຍນັດຊື້-ຂາຍກັນຢູ່ແຂວງວຽງຈັນ. ຈາກນັ້ນ, ທ້າວ ແອວ່າງ ໄດ້ເອົາຢາບ້າຈໍານວນ 6 ມັດ ໃສ່ຖົງເປ້ ແລ້ວໃສ່ລົດຈັກໄປສົ່ງຕາມການນັດໝາຍ ພໍໄປຮອດເຂດບ້ານໂພນແກ້ວ ເມືອງນາຊາຍທອງ ນະຄອນຫຼວງວຽງຈັນ ເຈົ້າໜ້າທີ່ຕຳຫຼວດໄດ້ກວດລັດລົດຈັກເປົ້າໝາຍ ພ້ອມທັງກວດຄົ້ນພົບເຫັນຢາບ້າ ຈຳນວນ 6 ມັດ ເທົ່າກັບ 13.000 ເມັດ, ຢາຝິ່ນຈຳນວນ 900 ກຼາມ ແລະ ແປ້ງຝຸ່ນສີຂາວ 4,5 ກິໂລກຼາມ ໄປດໍາເນີນຄະດີຕາມກົດໝາຍ.
 

ຢ່າງໃດກໍຕາມ, ຕໍ່ກັບວຽກງານສະກັດກັ້ນ ແລະ ປາບປາມຢາເສບຕິດ ຮຽກຮ້ອງມາຍັງທຸກພາກສ່ວນເປັນເຈົ້າການປະກອບສວນຢ່າງກວ້າງຂວາງ ໂດຍສະເພາະໃຫ້ຊ່ວຍກັນເປັນຫຸເປັນຕາໃຫ້ກັບເຈົ້າໜ້າທີ່ວິຊາສະເພາະ ເພື່ອອໍານວຍຄວາມສະດວກໃນສະໜອງຂໍ້ມູນໃນການຕິດຕາມເປົ້າໝາຍລັກລອບເຄື່ອນໄຫວຄ້າຂາຍຢາເສບຕິດ ໂດຍສະເພາະ ເຈົ້າໜ້າທີ່ແຕ່ລະຂັ້ນຢູ່ຮາກຖານ ຕ້ອງເປັນເຈົ້າການໃນການຕິດຕາມຄຸ້ມຄອງພົນລະເມືອງຢູ່ໃນເຂດຄວາມຮັບຜິດຊອບຂອງຕົນ ຖ້າອາໄສແຕ່ເຈົ້າໜ້າທີ່ຕໍາຫຼວດພຽງຝ່າຍດຽວໃນການປາບປາມ ຄົງເປັນໄປໄດ້ຍາກທີ່ຈະເຮັດໃຫ້ຢາເສບຕິດຫຼຸດລົງ ຖ້າເຮົາບໍ່ຊ່ວຍກັນຢ່າງຈິງຈັງ.

 

 

ແຫຼ່ງຂ່າວ: ລາວໂພສ

ຄວາມຄິດເຫັນຂອງຜູ້ອ່ານ (0)