GMT+7 24/09/2017 19:08

ນາຍົກລັດຖະມົນຕີ ຕ້ອນຮັບນັກກິລາຊຸດຊີເກມ ພ້ອມມອບເງິນ ອັດສີດ 700 ກວ່າລ້ານ ໃຫ້ເປັນກຳລັງໃຈ

 

 

ຂປລ.​ ໃນ​ຕອນ​ເຊົ້າ ​​ວັນ​ທີ 5 ກັນຍາ 2017, ທ່ານ ທອງ​ລຸນ ສີ​ສຸ​ລິດ ນາຍົກ​ລັດ​ຖະ​ມົນຕີ ​ໄດ້​ໃຫ້ກຽດຕ້ອນຮັບ ຄະນະ​ນຳ, ຄູ​ຝຶກ ​ແລະ ນັກ​ກິລາ​ລາວ ທີ່​ຫ້ອງ​ວ່າການສຳນັກງານ​ ນາຍົກລັດຖະມົນຕີ ນະຄອນຫລວງ​ວຽງຈັນ, ພາຍຫລັງ​ສຳ​ເລັດ​ ການ​ເຂົ້າ​ຮ່ວມ​​ແຂ່ງຂັນ ​ໃນງານມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ຢູ່​ປະ​ເທດ​ມາ​ເລ​ເຊຍ ​ແຕ່ 19-30 ສິງຫາ 2017. ​ພ້ອມ​ດຽວກັນນີ້, ທ່ານ​ນາຍົກລັດຖະມົນຕີ ​ກໍໄດ້​ມອບ​ເງິນ​ອັດ​ສີດ ​ໃຫ້​ແກ່​ທີ​ມນັກ​ກິລາ​ຫລຽນ​ຄຳ ຈຳນວນ 91 ລ້ານ​ກີບ, ຫລຽນ​ເງິນ 135 ລ້ານກວ່າ​ກີບ, ຫລຽນ​ທອງ 325 ລ້ານກວ່າ​ກີບ ​ແລະ ທີ​ມຄູ​ຝຶກ 138 ລ້ານ​ກວ່າກີບ, ລວມ 700 ລ້ານ​ກວ່າ​ກີບ.

 

ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ​ ກະຊວງ​ສຶກສາ​ທິການ ​ແລະ ກິລາ, ຮອງ​ປະທານ ​ແລະ ​ເລຂາທິການ ຄະນະ​ກຳມະການ ​ໂອ​ແລມປິກແຫ່ງ​ຊາດ​ລາວ ​ໄດ້​ລາຍ​ງານ​ຕໍ່ ທ່ານ​ນາຍົກລັດຖະມົນຕີ ຊາບວ່າ: ງານມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ​ໄດ້​ກຳນົດ​ເອົາ 38 ປະ​ເພດ​ກິລາ ບັນຈຸ​ເຂົ້າ​ໃນ​ການ​ແຂ່ງຂັນ ແລະ ມີ​ການ​ຊິງ​ຫລຽນ​ຄຳ​ ທັງໝົດ 405 ຫລຽນ. ສຳລັບ ສປປ ລາວ ​ໄດ້​ສົ່ງ​ນັກ​ກິລາ​ເຂົ້າ​ຮ່ວມ​ແຂ່ງຂັນ ​ທັງໝົດ 22 ປະ​ເພດ​ກິລາ. ປະກອບມີ​ຄະນະ​ມົນຕີ​ຊີ​ເກ​ມ, ຄະນະ​ນຳ, ​ແພດ​ກິລາ, ກຳມະການ​ຕັດສິນ, ຄູ​ຝຶກ ​ແລະ ນັກ​ກິລາ​ ທັງໝົດ 350 ຄົນ. ຜ່ານ​ການ​ແຂ່ງຂັນ​ຕົວ​ຈິງ​​ ກິລາ​ປະ​ເພດ​ຕ່າງໆ ສາມາດ​ຍາດ​ໄດ້ ​ທັງໝົດ 26 ຫລຽນ ​ປະກອບ​ມີ 2 ຫລຽນຄຳ, 3 ຫລຽນ​ເງິນ ​ແລະ 21 ຫລຽນ​ທອງ ຈັດ​ຢູ່​ໃນ ​ອັນ​ດັບ​ທີ 9 ຂອງ 11 ປະ​ເທດ.

 

​​ໃນໂອກາດ​ນີ້, ທ່ານ​ນາຍົກລັດຖະມົນຕີ ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ ຕໍ່ຄະນະ​ນຳ, ຄູ​ຝຶກ ​ແລະ ນັກ​ກິລາ​ລາວ ​ເຊິ່ງ​ເປັນ​ຕົວ​ແທນ​ຂອງ​ປະ​ເທດ​ຊາດ ​ເຂົ້າ​ຮ່ວມ​ແຂ່ງຂັນ ງານມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ຢ່າງ​ຕັ້ງໜ້າ ​ແລະ ສາມາດ​ຍາດ​​ໄດ້ໄຊຊະນະ ​ໃນ​ປະ​ເພດ​ກິລາ​ຕ່າງໆ ​ຫລາຍ​ສົມຄວນນັບ​ທັງ​ຫລຽນ​ຄຳ, ຫລຽນ​ເງິນ ​ແລະ ຫລຽນ​ທອງ ​ເຊິ່ງສະ​ແດງ​ໃຫ້​ເຫັນ​ເຖິງ​ ຄວາມ​ເປັນ​ເຈົ້າ​ການ ຂອງ​ທັບ​ນັກ​ກິລາ​ລາວ​ທຸກ​ຄົນ. ຢ່າງ​ໃດ​ກໍ​ຕາມ, ​ເມື່ອ​ທຽບ​ໃສ່​ບັນດາ​ ປະ​ເທດ​ເພື່ອນ​ມິດ ​ໃນ​ອາ​ຊຽນ​ແລ້ວ ຖື​ວ່າ​ບໍ່ທັນ​ແຂງ​ແຮງ​ພໍ​ ທີ່​ຈະ​ຍາດ​ໄດ້​ ໄຊຊະນະ​ຫລາຍ​ກວ່າ​ນີ້, ​ແຕ່​ກໍ​ຕ້ອງ​​ສືບຕໍ່ ພັດທະນາ​ກິລາ​ລາວ​ ​ໃຫ້​ມີ​ຄວາມ​ກ້າວໜ້າຂຶ້ນ​ເລື້ອຍໆ ​ແລະ ສິ່ງ​ສຳຄັນ​ການ​ແຂ່ງຂັນ​ກິລາ ​ຕ້ອງ​ສູ້​ດ້ວຍ​ນ້ຳ​ໃຈ​ນັກ​ກິລາ, ມິດຕະພາບ ​ແລະ ຮັດ​ແໜ້ນຄວາມ​ສາມັກ ຄີ. ອີກ 2 ປີ ຈະ​ມີ​ການ​​ເຂົ້າ​ຮ່ວມແຂ່ງຂັນ ງານມະຫາ​ກຳ​ກິລາ​ຊີ​ເກ​ມ ຄັ້ງ​ຕໍ່​ໄປ ຈຶ່ງ​ເປັນໜ້າທີ່​ສຳຄັນ​ ຂອງ​ຄະນະ​ນຳ ​ແລະ ຄູ​ຝຶກ ທີ່​ຈະ​ຕ້ອງ​ເອົາ​ໃຈ​ໃສ່​ຍົກ​ລະດັບ​ ນັກ​ກິລາ​ທຸກ​ປະ​ເພດ ​ໃຫ້​ມີ​ຄຸນ​ນະພາ​ບ ​ແລະ ສາມາດ​ຍາດ​ໄດ້​ຫລຽນ​ ປະ​ເພດ​ຕ່າງໆ​​ ໃຫ້ຫລາຍ​ກວ່າ​ເກົ່າ.

 

 

ແຫຼ່ງຂ່າວ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)