GMT+7 24/09/2017 19:02

ປກສ ແຂວງບໍ່ແກ້ວ ຈັບ 2 ຜົວເມຍຮ່ວມກັນ ຄ້າຂາຍຢາບ້າ ພ້ອມຂອງກາງ 1.574 ເມັດ

 

 

ຂປລ. ​ວັນ​ທີ 1 ກັນຍາ 2017 ນີ້, ເຈົ້າ​ໜ້າ​ທີ່ ພະແນກຕໍາຫລວດຕ້ານ ແລະ ສະກັດກັ້ນຢາເສບຕິດ ປກສ ແຂວງບໍ່ແກ້ວ ໄດ້ນຳ​ຕົວ 2 ຜົວເມຍ ທີ່ມີຢາເສບຕິດ ໄວ້ໃນຄອບຄອງ ແລະ ຮ່ວມກັນຄ້າຂາຍ ຢາເສບຕິດ ພ້ອມດ້ວຍຂອງກາງຢາເສບຕິດ ປະເພດຢາບ້າຈໍານວນ 7 ຖົງ ແລະ 174 ເມັດ ເທົ່າກັບ 1.574 ເມັດ, ເງິນກີບ 15 ລ້ານ​ກວ່າກີບ, ເງິນບາດໄທ 145.000 ບາດ, ເງິນໂດລາ 377 ໂດລາ, ປື້ມບັນຊີ ເງິນຝາກທະນາຄານ 2 ຫົວ ແລະ ໂທລະສັບມືຖື 3 ໜ່ວຍ ມາທໍາການສືບສວນ-ສອບສວນ ພາຍຫລັງ​ຖືກ​ເຈົ້າ​ໜ້າ​ທີ່​ກັກ​ຕົວ ​ໃນ​ວັນ​ທີ 1 ສິງຫາ ຜ່ານ​ມາ.


ຜ່ານການສືບສວນ-ສອບສວນ ຂອງເຈົ້າໜ້າທີ່ ​ໃຫ້​ຮູ້​ວ່າ: ທ້າວ ສົມພອນ ອາຍຸ 47 ປີ ອາຊີບ ເຮັດນາສັນຊາດລາວ ຊົນເຜົ່າລື້ ແລະ ນາງ ເຖົາແສງ ອາຍຸ 37 ປີ ອາຊີບຄ້າຂາຍ ສັນຊາດລາວ ຊົນເຜົ່າລື້ທັງສອງ ອາໃສຢູ່ບ້ານ ບ້ານພິບຸນທອງ ເມືອງຫ້ວຍຊາຍ ແຂວງບໍ່ແກ້ວ. ​ເຊິ່ງພວກ​ກ່ຽວໄດ້ຮັບສາລະພາບວ່າ: ຢາບ້າຈໍານວນດັ່ງກ່າວ ແມ່ນ​ເປັນຂອງ ພວກກ່ຽວແທ້ ເຊິ່ງໄດ້ມີບຸກຄົນບໍ່ຮູ້ຊື່ ເອົາມາຂາຍໃຫ້ຢູ່ເຮືອນ ໃນລາຄາ 1 ມັດ 30.000 ບາດ ໃນໄລຍະເດືອນ ພຶດສະພາ 2017 ແລະ ໄດ້ມີກຸ່ມ ໄວລຸ້ນບໍ່ຮູ້ຊື່ມາຊື້ ນໍາຢູ່ເຮືອນ ໃນລາຄາເມັດລະ 8.000 ກີບ, ເຊິ່ງໄດ້ຂາຍໄປແລ້ວ ຈໍານວນ 2 ຖົງປາຍ ສ່ວນ​ທີ່​ຍັງ​ເຫລືອ​ ແມ່ນ​ໄດ້ຊຸກເຊື່ອງໄວ້ໃນເຮືອນ ພໍຕົກມາຮອດ ວັນທີ 1 ສິງຫາ 2017 ກໍຖືກເຈົ້າໜ້າທີ່ກັກຕົວ ໃນການຊື້ຂາຍຢາບ້າ ທັງສອງຜົວເມຍແມ່ນໄດ້ຮັບຮູ້ນໍາກັນ.

 

ດັ່ງນັ້ນ, ເຈົ້າໜ້າທີ່ຈຶ່ງໄດ້ກັກຕົວພວກກ່ຽວ ໄວ້ທໍາການສືບສວນ-ສອບສວນ ຫາກຸ່ມແກ້ງຄ້າຂາຍຢາເສບຕິດລາຍນີ້ ມາດໍາເນີນຄະດີ ຕາມລະບຽບກົດໝາຍຕໍ່ໄປ.

 

 

ແຫຼ່ງຂ່າວ:  ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)