GMT+7 20/11/2017 04:40

ຮ້ານຕັດເຄື່ອງ ສຸບິນ ຫລວງລາດ ເນັ້ນຄຸນນະພາບ ແລະ ການບໍລິການ

 

 

ຮ້ານຕັດ​ເຄື່ອງສຸບິນ ສູນລວມເສື້ອຜ້າ ຫລາກຫລາຍແບບ ມີໃຫ້ເລືອກຕາມໃຈມັກ ຮັບ​ຕັດ​ເຄື່ອງ ​ຕາມ​ສັ່ງ​ທຸກ​ຊະນິດ ບໍ່ວ່າຈະເປັນເສື້ອໄໝ, ຊຸດ​ແວັດ, ເສື້ອເຊີດ​ ແລະ ໂສ້ງ, ​ໂດຍ​ເນັ້ນ​ຄຸນ​ນະພາ​ບ ​ແລະ ການ​ບໍລິການ​ຫລັງ​ການ​ຂາຍ​ເປັນ​ສຳຄັນ, ພ້ອມ​ນີ້, ​ຍັງ​ໄດ້​ຈຳ​ໜາຍເກີບ, ສາຍ​​ແອ​ວ, ກະ​ເປົາ ​ແລະເຄື່ອງປະດັບອື່ນໆ.

 

ທ່ານ ສຸບິນ​ ຫລວງ​ລາດ ​ເຈົ້າ​ຂອງ​ຮ້ານດັ່ງກ່າວ, ​ໄດ້​ໃຫ້​ສຳພາດ​ຕໍ່​ນັກ​ຂ່າວ​ ສຳນັກ​ຂ່າວສານ​ປະ​ເທດ​ລາວ​ ວ່າ: ​​ຕົນ​ໄດ້​ເລີ່​ມ​ອາຊີບຫຍິບເຄື່ອງມາ​ແຕ່​ປີ 1991, ຊຶ່ງ​ໃນ​ເມື່ອກ່ອນ​ ແມ່ນເປັນພຽງ​ຜູ້ຮັບ​ຈ້າງຕັດຫຍິບ​ເຄື່ອງທົ່ວ​ໄປ ຢູ່​ຮ້ານ​ຕັດ​ເຄື່ອງ​ແຫ່ງໜຶ່ງ ​ແລະ ​ເຫັນ​ວ່າ​ອາຊີບ​ດັ່ງກ່າວ, ແມ່ນ​ສາມາດ​ສ້າງ​ລາຍ​ຮັບ​​ທີ່ດີ​, ເປັນ​ອາຊີບ​ສຸ​ດຈະລິດ ທີ່​ສຳຄັນ​ເປັນ​ອາຊີບ​ທີ່​ຕົນ​ມັກ ລວມທັງ​ປະສົບ​ການ​ ທີ່​ສະ​ສົມ​ມາ​ຫລາຍ​ປີ ຈຶ່ງ​ເກີດ​ມີ​ແນວ​ຄິດ ຕັດສິນ​ໃຈ​ເປີດ​ຮ້ານ​ເປັນ​ຂອງ​ຕົນ​​ເອງ​​ ໃນ​ປີ2005. ມາ​ຮອດ​ປັດຈຸບັນ ມີທັງໝົດ 3 ສາຂາຄື:​ ສາຂາ 1 ຕັ້ງຢູ່ບ້ານ ສີ​ຫອມ ກົງກັນຂ້າມກັບຮ້ານບັນເທີງກາເລັກຊີພັບ, ສາຂາ 2 ຕັ້ງຢູ່ບ້ານ ອູບມູງ, ສາຂາ3 ຕັ້ງຢູ່ ວຽງຈັນເຊັນເຕີ ​ແລະ ​​ໃນ​ໄວໆນີ້ ຈະ​ເປີດສາຂາ ​4 ທີ່ບ້ານຂົວຫລວງ, ​ພ້ອມ​ມີ​ແຜນຈະ​ຂະຫຍາຍສາຂາ​ໄປ ​ແຂວງອຸດົມ​ໄຊ ​ແລະ ​ແຂວງຊຽງຂວາງ​ ຕື່ມອີກ.
 

ທ່ານ ສຸບິນ​ ຫລວງ​ລາດ ​​ໄດ້ໃຫ້​ຮູ້​ຕື່ມ​ວ່າ: ປັດຈຸບັນ​ ລູກ​ຄ້າ​ທີ່​ມາ​ໃຊ້​ບໍລິການ ໃນ​ແຕ່​ລະ​ມື້​ມີປະ ມານ 70-100 ຄົນ, ​ເຊິ່ງກຸ່ມ​ລູກ​ຄ້າ​ສ່ວນ​ຫລາຍ ​ແມ່ນ​ພະນັກງານ​ຫ້ອງການບໍລິຫານ, ສຳນັກງານ​ທະນາຄານ (​ເຄື່ອງ​ແບບ​ພະນັກງານ),  ພະນັກງານ​ທົ່ວ​ໄປ ​ແລະ ບັນດາ​ການ​ນຳ​​ຈຳນວນ​ໜຶ່ງ, ສ່ວນດ້ານລາຄາຕັດ​ເສື້ອ​ ເລີ່​ມຕົ້ນ​ປະມານ 150.000-250.000 ກີບ, ຊຸດ​ແວັດ 1.000.000 -1.600.000 ກີບ ​ແລະ ​ໂສ້ງ 180.000 -350.000 ກີບ. ​ເມື່ອ​ລູກ​ຄ້າ​ຮັບ​ເຄື່ອງ​ໄປ​​ໃຊ້ ຖ້າ​ບໍ່​ຖືກ​ໃຈ ​ທາງ​ຮ້ານ​​ຮັບ​ແປງ​ໃຫ້​ໂດຍ​ບໍ່​​ເສຍ​ຄ່າ ຫລື ​ໃສ່​ໄປ​ດົນ​ແລ້ວ ມີກະ​ດູມ​ຫລຸດ, ຊິ​ບ​ແຕກ, ຢາກ​ຫຍັບ​ເຂົ້າ ຫລື ຫຍັບອອກ  ກໍ​ສາມາດ​ເອົາກັບຄືນ​ມາ​ແປງ​ທີ່​ຮ້ານ​​ໄດ້​ໂດຍ​ບໍ່​ໄດ້​ເສຍ​ຄ່າ.

 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)