GMT+7 24/09/2017 18:59

ມີນິຕິກຳຄຸ້ມຄອງລະອຽດທຸລະກິດຕູ້ເກມ

 

 

ບັນດາ​ປາກົດການ​ຫຍໍ້ທໍ້​ຕ່າງໆທີ່​ເກີດ​ຂຶ້ນ​ໃນ​ສັງຄົມ​ ແມ່ນ​ມາຈາກ​ຫຼາຍ​ສາເຫດ ໂດຍ​ສະເພາະແມ່ນ​ທຸລະ​ກິດ​ຕູ້​ເກມ ກໍ່​ຄືການບັນເທີງ ເຊິ່ງ​ຜ່ານ​ມາ​ກໍ່​ຄື​ປັດ​ຈຸບັນ ​ໄດ້​ມີ​ນິ​ກຳ​ຄຸ້ມ​ຄອງ​ຢ່າງ​ລະອຽດ​ຈະແຈ້ງ ເພື່ອ​ເປັນ​ບ່ອນ​ອີງໃນ​ການຈັດຕັ້ງ​ປະຕິບັດ.

 

ທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ໃຫ້​ສຳພາດ​ວ່າ: ການ​ຄຸ້ມ​ຄອງ​ທຸລະ​ກິດຕູ້​ເກມ ການ​ບັນເທີງ ແມ່ນ​ໄດ້​ມີ​ນິຕິ​ກຳ​ຄຸ້ມ​ຄອງ ໂດຍ​ສະເພາະ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ໄດ້​ອອກ​ນິຕິ​ກຳກ່ຽວ​ກັບ​ການ​ຄຸ້ມ​ຄອງ​ຕູ້​ເກມ​ໃນຂອບ​ເຂດ​ທົ່ວ​ປະເທດ ກໍ່​ຄືນິຕິ​ກຳວ່າ​ດ້ວຍ​ການ​ຄຸ້ມ​ຄອງ​ການ​ບັນເທີງ ແລະ ນິຕິ​ກຳ​ອື່ນໆ​ຈຳນວນໜຶ່ງ ເຊິ່ງ​ນິຕິ​ກຳ​ດັ່ງກ່າວ​ແຕ່​ລະແຂວງ ​ໄດ້​ພ້ອມ​ກັນ​ຜັນ​ຂະຫຍາຍຈັດ​ຕັ້ງ​ປະຕິບັດ ໃນ​ນີ້ ນະຄອນຫຼວງ​ວຽງ​ຈັນ ​ໄດ້​ຜັນ​ຂະຫຍາຍມາ​ເປັນ 5 ຂໍ້​ຫ້າມທີ່​ຈະແຈ້ງ ເພື່ອ​ເປັນ​ບ່ອນ​ອີງ​ໃນ​ການ​ຕິດຕາມ​ກວດກາ ສະເພາະ​ພະ​ແນກຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ໄດ້​ມີ​ການ​ຕິດຕາມ​ກວດກາ ໂດຍມີ​ການ​ແຕ່ງຕັ້ງ​ຄະນະ​ກຳມະການສະເພາະ​ກິດ ມີ​ເຈົ້າ​ໜ້າທີ່​ປ້ອງກັນ​ຄວາມ​ສະຫງົບ ອຳນາດ​ການປົກຄອງ​ຂັ້ນ​ທ້ອງຖິ່ນ ແລະ ຂັ້ນສູນ​ກາງ​ເຂົ້າ​ຮ່ວມ​ຕິດຕາມ​ກ່ຽວກັບ​ທຸລະ​ກິດ​ເກມ ພາຍຫຼັງ​ທີ່​ໄດ້​ມີການ​ຕິດຕາມ​ກວດກາປີ 2016 ໄດ້​ມີ​ການ​ຢຸດ​ເຊົາ​ການ​ອອກ​ອະນຸຍາດ ແລະ ນະຄອນຫຼວງ​ວຽງ​ຈັນ ໄດ້​ຮັບ​ອະນຸຍາດ​ທົດ​ລອງ​ເກມເຝິກ​ສະໝອງ​ທົດ​ລອງ​ປັນຍາ ເຊິ່ງ​ເປັນ​ເກມ​ຫຼິ້ນ​ແລ້ວ​ເບົາ​ສະໝອງສຳລັບ​ເດັກນ້ອຍ ຫຼື ຜູ້ໃຫຍ່​ສາມາດ​ຫຼິ້ນ​ໄດ້ ແຕ່​ໄດ້​ມີເກມ​ພະນັນ​ເຂົ້າ​ມາ​ປະ​ປົນ​ ເຮັດໃຫ້​ເກີດ​ບັນຫາ​ມົ້ວ​ສຸມ​ໃນ​ສັງຄົມ ເປັນຕົ້ນແມ່ນ​ເດັກນ້ອຍ ເຍົາວະຊົນ ແລະ ນັກຮຽນ ເມື່ອ​ເປັນແນວ​ນັ້ນ ເດືອນ​ເມສາ 2017 ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ​ໄດ້​ອອກ​ແຈ້ງ​ການໃຫ້​ຢຸດຕິ​ອອກ​ອະນຸຍາດ​ສະ​ໂມສອນເກມ​ທຸກ​ປະເພດ ແລະ ໄດ້ມີ​ການຕິດຕາມ​ກວດກາ​ການເຄື່ອນ​ໄຫວ​ຢ່າງ​ເປັນ​ປົກກະຕິ.

 

ຜ່ານ​ມາ​ພາກສ່ວນ​ກ່ຽວຂ້ອງຂອງ​ກະຊວງ​ປ້ອງ​ກັນ​ຄວາມ​ສະຫງົບ ໄດ້​ປະສານ​ສົມທົບ​ເປັນ​ເຈົ້າການ​ຕິດຕາມກວດກາ ແກ້​ໄຂ ແລະ ໄດ້​ມີ​ການ​ຢຶດ​ຕາມ​ຫຼາຍ​ສະຖານ​ທີ່ ເພື່ອ​ມາ​ຈູດ​ທຳລາຍ​ຖິ້ມ ພ້ອມ​ນັ້ນ ໄດ້​ພົບ​ບັນຫາ​ປາກົດການ​ຫຍໍ້ທໍ້​ຂອງ​ຊາວ​ໜຸ່ມ ກໍ່​ຄືຜູ້ມີ​ອາຊີບ​ທັງຫຼາຍ ທີ່​ຕິດ​ພັນ​ກັບເກມ​ທວາຍ​ຜົນ​ເຕະບານ ເຊິ່ງ​ປັດຈຸ​ບັນ​ເຫັນ​ວ່າຍັງ​ມີ​ບາງ​ຈຸດ​ບາງບ່ອນ ​ທີ່​ຍັງ​ລັກ​ເປີດ​ບໍລິການ ເຮັດໃຫ້​ມີ​ຜົນ​ກະທົບ​ຕາມ​ຄຸ້ມ​ບ້ານ ພ້ອມ​ນັ້ນ ໄດ້​ສືບຕໍ່​ອະທິບາຍ​ຊີ້ແຈງ​ຕໍ່​ຫົວໜ່ວຍ​ທຸລະ​ກິດ​ທີ່​ຍັງ​ບໍ່ທັນ​ເຂົ້າໃຈ​ ບັນດາ​ນິຕິ​ກຳ​ທີ່​ອອກອະນຸຍາດ ​ຖ້າ​ຍັງ​ພົບ​ເຫັນ​ກໍລະນີດັ່ງກ່າວ ຫ້ອງການ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວເມືອງ ​ຕ້ອງ​ຂຶ້ນ​ບັນຊີ​ຕິດຕາມ​ແຕ່ລະ​ຄຸ້ມ​ບ້ານ ແລ້ວ​ລາຍ​ງານ​ໃຫ້ພາກສ່ວນ​ກ່ຽວຂ້ອງ ເພື່ອ​ພ້ອມກັນ​ຈັດ​ຕັ້ງ​ປະຕິບັດ​ມາດ​ຕະການຕາມ​ຂະ​ບວນ​ການ​ຍຸຕິ​ທຳ.

 

 

ແຫຼ່ງຂ່າວ: ວຽງຈັນໃໝ່

ຄວາມຄິດເຫັນຂອງຜູ້ອ່ານ (0)