GMT+7 24/10/2017 05:21

ຄຳມ່ວນ ເລົ່າຄືນມູນເຊື້ອວັນສ້າງຕັ້ງ ສື່ມວນຊົນ ແລະ ວັນການພິມຈຳໜ່າຍ

 

 

ຂປລ. ພະ​ແນ​ກຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ (ຖວທ) ​ແຂວງ​ຄຳ​ມ່ວນ ​ຈັດ​ປາຖະກະຖາເລົ່າຄືນ​ມູນ​ເຊື້ອ​ ​ວັນສ້າງ​ຕັ້ງ​ສື່​ມວນ​ຊົນ ​ແລະ ວັນ​ການ​ພິມ​ຈຳໜ່າຍ ຄົບຮອບ 67 ປີ (13 ສິງຫາ 1950-13 ສິງຫາ 2017) ໃນ​ວັນ​ທີ 11 ສິງຫາ 2017 ​ໂດຍມີ​ບັນດາ​​ຄະນະ​ພະ​ແນ​ກ, ຂະ​ແໜງການ, ກອງ​ວິຊາ​ການ​ທີ່​ຂຶ້ນ​ກັບ ​ແລະ ບັນດາ​ນັກ​ຂ່າວ​ ຈາກ​ຂະ​ແໜງການ​ອ້ອມ ​ຂ້າງ​ແຂວງ​ເຂົ້າ​ຮ່ວມ.


ໃນ​ໂອກາດ​ນີ້, ທ່ານ ຂັນຕີ ​ໂພທິ​ນ ຫົວໜ້າພະ​ແນ​ກຖະ​ແຫລງຂ່າວ, ວັດທະນະທຳ ​ແລະ ທ່ອງ​ທ່ຽວ​ແຂວງ ​ໄດ້​ຍົກ​ໃຫ້​ເຫັນ​ເຖິງ​ປະຫວັດ​ຄວາມ​ເປັນ​ມາ, ຄວາມໝາຍຄວາມ​ສຳຄັນ ​ແລະ ພາລະ​ບົດບາດ​ແຫ່ງ​ການ​ເຕີບ​ໃຫຍ່​ຂະຫຍາຍຕົວ ​ຂອງ​ວຽກງານ​ສື່​ມວນ​ຊົນ​ ໃນ​ຖະນະ​ເປັນ​ກະບອກ​ສຽງ​ ຂອງ​ອົງການ​ຈັດ​ຕັ້ງ​ຂອງ​ພັກ, ລັດ ​ແລະ ສັ​ງຄົມ​ ໃນ​ການ​ໂຄສະນາ​ແນວທາງ​ຂອງ​ພັກ, ລະບຽບ​ກົດ​ໝາຍ​ຂອງ​ລັດ, ປຸກລະດົມ​ນ້ຳ​ໃຈ​ຮັກ​ຊາດ, ສະໜອງ​ຂໍ້​ມູນ​ຂ່າວສານທາງ​ດ້ານ​ການ​ເມືອງ, ​ເສດຖະກິດ, ສັງຄົມ, ວິທະຍາສາດ, ​ເຕັກ​ໂນ​ໂລ​ຊີ, ສາລະ​ຄວາມ​ຮູ້, ສາລະ​ບັນ​ເທິງ, ປະກອບສ່ວນ​ຕ້ານ​ ປະກົດ​ການ​ຫຍໍ້​ທໍ້​ໃນ​ສັງຄົມ, ຖ້ອຍ​ທຳນອງ​ທີ່​ບິດ​ເບືອນ​ຄວາມ​ເປັນ​ຈິງ ຂອງ​ພວກ​ຄົນ​ບໍ່​ດີ, ​ເປັນ​ຂົວ​ຕໍ່​ລະຫວ່າງ​ ພັກກັບ​ປະຊາຊົນ, ​ເປັນ​ເວທີ​ເສີມ​ຂະຫຍາຍ ​ປະຊາທິປະ​ໄຕ​ປະຊາຊົນ ​ແລະ ສິດ​ເປັນ​ເຈົ້າ​ ຂອງ​ປະຊາຊົນ​ບັນດາ​ເຜົ່າ.


ສະ​ເພາະ​ວຽກ​ງານ​ສື່​ມວນ​ຊົນ ​ພາຍ​ໃນ​ແຂວງ​ຄຳ​ມ່ວນ ​ໃນ​ໄລຍະ​ຜ່ານ​ມາ​​ ​ເຫັນ​ວ່າ​ມີ​ຄວາມ​ຫ້າວຫັນ ​ແລະ ​ສະດຸ້ງ​ໄວ​ໃນ​ການ​ປະຕິບັດ​ໜ້າ​ທີ່ ​ເຊິ່ງສະ​ແດງ​ອອກ​ຄື:ດ້ານ​ວຽກ​ງານ​ວິທະຍຸ ​​ໃນ​ທົ່ວ​ແຂວງ​ມີ​ສະຖານີ​ວິທະຍຸ 4 ​ແຫ່ງ​ ​ກວມ​ເອົາ​ 85% ຂອງ​ເນື້ອ​ທີ່​ໃນ​ທົ່ວ​​ແຂວງ​, ​ມີ​ສະຖານີ​ໂທລະພາບ​ຂອງ​ແຂວງ 1 ​ແຫ່ງ ສາມາດ​ອອກ​ອາກາດກວມ 45 % ຂອງ​ພື້ນ​ທີ່​​ໃນ​ທົ່ວ​​ແຂວງ, ມີ​ບໍລິສັດ​ໂທລະ ພາບ​ເອກະ​ຊົນ​ເຂົ້າ​ມາ​ລົງທຶນ​ 3 ​ແຫ່ງ ​ໃນ​ນັ້ນ​ບໍລິສັດ​ໂທລະພາບ​ດີ​ຈີ​ຕອນ 1 ​ແຫ່ງ ກວມ 90% ຂອງ​ພື້ນ​ທີ່​ເທສະບານ​ເມືອງ​ທ່າ​ແຂກ, ບໍລິສັດ​​ໂທລະພາບໃຊ້​ສາຍ 2 ​ແຫ່ງ.


ພ້ອມ​ກັນນີ້​, ຍັງ​ໄດ້​ສ້າງ​ເວັ​ບ​ໄຊ ​ຂ່າວ​ທ້ອງ​ຖິ່ນຂອງ​ແຂວງ ທີ່​ມີ​ຊື່ວ່າ: Khammouanenews.com ​ເຊິ່ງມີ​ຜູ້​ເຂົ້າ​ຊົມ​​ 25 ພັນ​ເທື່ອ​ຄົນ​ໃນ​ປີ​ທີ່​ຜ່ານ​ມາ, ມີ​ບ້ານ​ທີ່​ມີ​ລະບົບ​ໂທລະ​ໂຄ່ງ​ ທັງໝົດ 422 ບ້ານກວມ​ເອົາ 73% ຂອງ​ຈຳນວນ​ບ້ານ​ໃນ​ທົ່ວ​ແຂວງ, ມີ​ຮ້ານ​ຖ່າຍຮູບ 43 ຮ້ານ, ຮ້ານ​ຈຳໜ່າຍ​ເຄື່ອງ​ສັນຍານ​ດາວ​ທຽມ 46 ຮ້ານ, ​ທົ່ວ​ແຂວງມີ​ນັກ​ຂ່າວ​​ຈຳນວນ 47 ຄົນ ​ແລະ ມີ​​ໂຄສົກ​ຈັດ ​ລາຍການ 30 ຄົນ, ຍິງ 15 ຄົນ​.

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)