GMT+7 24/10/2017 05:21

ບໍ່ແກ້ວ ຈະເປີດນໍາໃຊ້ເຂື່ອນໄຟຟ້ານໍ້າທາ 1 ໃນປີ 2018

 

 

ໂຄງການເຂື່ອນໄຟຟ້ານໍ້າທາ 1 ເປັນໜຶ່ງໃນບັນດາໂຄງການ ທີ່ຢູ່ໃນແຜນພັດທະນາ ແລະ ສະໜອງໄຟຟ້າໃຫ້ແກ່ພາຍໃນ ສປປ ລາວ ແລະ ເລີ່ມລົງມືກໍ່ສ້າງມາ​ແຕ່ເດືອນ ກໍລະກົດ 2014 ມີມູນຄ່າທັງໝົດ 447 ລ້ານໂດລາສະຫະລັດ. ມາຮອດປະຈຸດບັນແມ່ນສຳເລັດແລ້ວ 86.27%. ຄາດວ່າ​ຈະເປີດດຳເນີນການ ຜະລິດໄຟຟ້າຂາຍ ປີ 2018.


ທ່ານ ທອງດີ ພົມປັນຍາ ຮອງຫົວໜ້າພະລັງງານ-ບໍ່ແຮ່ ແຂວງບໍ່ແກ້ວ ໃຫ້ສໍາພາດຕໍ່ສື່​ມວນ​ຊົນ ​ເມື່ອ​ບໍ່​ດົນ​ນີ້​ວ່າ: ໂຄງການເຂື່ອນໄຟຟ້ານໍ້າທາ 1 ມີກຳລັງຕິດຕັ້ງ 168 ເມກາວັດ, ຜະລິດ ພະລັງງານໄດ້ປະມານ 759 ຈິກກາວັດໂມງ/ປີ , ເປັນເຂື່ອນແບບຫີນເບຕົງປົກໜ້າ (CFRD) ມີຄວາມສູງ 93.6 ແມັດ, ສັນເຂື່ອນຍາວ 349 ແມັດ, ເນື້ອທີ່ອ່າງກັກເກັບນໍ້າ 62.4 ກິໂລຕາແມັດ, ລາຄາໄຟຟ້າ ສະເລ່ຍຕະຫລອດ ໄລຍະສຳປະທານ 28 ປີ ແມ່ນ 6.62 USc/kwh, ເຊິ່ງໂຄງ ການດັ່ງກ່າວ ໄດ້ສົ່ງຜົນກະທົບຕໍ່ປະຊາຊົນຈຳນວນ  37 ບ້ານ, 1.707 ຄອບຄົວ, ໂດຍສະເພາະຢູ່ພາຍໃນ ແຂວງບໍ່ແກ້ວແມ່ນຍົກຍ້າຍ ປະຊາຊົນ ໄປຢູ່ຈຸດເຂດຈັດສັນຫາດໝວກ ສຳເລັດແລ້ວຈຳນວນ 566 ຫລັງຄາເຮືອນ, ມີ 662 ຄອບຄົວ ສໍາເລັດ ໃນເດືອນມີນາ 2016

 

ໂຄງການກໍ່ສ້າງເຂື່ອນດັ່ງກ່າວ ເມື່ອສ້າງສຳເລັດຈະສະໜອງ ໄຟຟ້າຢູ່ພາຍໃນປະເທດ ໂດຍສະເພາະກໍຄື ແຂວງບໍ່ແກ້ວ ​ໄດ້ມີໄຟຟ້າໃຊ້ຢ່າງພຽງພໍ.ນອກຈາກນີ້ຍັງ ຈະໄດ້ສົງໄຟຟ້າໄປຂ່າຍ ໃຫ້ປະເທດເພື່ອນບ້ານ​ຕື່ມ​ອີກ ​ເຊິ່ງເປັນທ່າແຮງ ໜຶ່ງ​ ທີ່​ສ້າງລາຍຮັບເຂົ້າໃນປະເທດ ແລະ ເຮັດໃຫ້ເສດຖະກິດພາຍໃນເທດ ຈະເລີນຂຶ້ນເທື່ອລະກ້າວ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)