GMT+7 24/10/2017 05:27

ລັດຖະບານຈະມອບ 1 ຕື້ກີບ ຖ້າເຕະບານທີມຊາດ ເຂົ້າຮອບ 4 ທີມໃນຊີເກມ 29

 

ໃນວັນທີ 4 ສິງຫາ ຜ່ານມາ, ທີ່ສະຫະພັນບານເຕະ ແຫ່ງຊາດລາວ, ທ່ານ ສອນໄຊ ສີພັນດອນ ຮອງນາຍົກ ລັດຖະມົນຕີ ສປປ ລາວ ໄດ້ລົງຕິດຕາມ ເພື່ອໃຫ້ກໍາລັງໃຈຄູເຝິກ ແລະ ນັກກິລາບານເຕະ ທີ່ເປັນຕົວແທນເຂົ້າຮ່ວມ ການ ແຂ່ງຂັນມະຫະກໍາຊີເກມ ຄັ້ງທີ 29 ທີ່ປະເທດ ມາເລເຊຍ ທ້າຍເດືອນສິງຫານີ້ ໂດຍເນັ້ນໃຫ້ນັກກິລາ ທຸກຄົນຕ້ອງຫລິ້ນ ບານຕາມແຜນຂອງ ຄະນະຄູເຝິກວາງເອົາໄວ້, ຫລິ້ນເປັນທີມດຽວກັນ ປາສະຈາກການ ລົ້ມບານ ແລະ ຖ້າສາມາດ ຜ່ານ ເຂົ້າຮອບ 4 ທີມ, ລັດຖະບານຈະມອບ ທຶນຊ່ວຍເຫລືອ ໃຫ້ສະຫະ ພັນ ແຫ່ງຊາດລາວ ຈໍານວນ 1 ຕື້ກີບ.
ໃນໂອກາດດັ່ງກ່າວ ທ່ານຮອງນາຍົກ ລັດຖະມົນຕີ ໄດ້ກ່າວຍ້ອງຍໍ ຊົມເຊີຍສະຫະພັນ ບານເຕະແຫ່ງຊາດລາວ ທີ່ໄດ້ສ້າງນັກກິລາ ສືບ ທອດຫລາຍໆລຸ້ນ ເຊິ່ງສາມາດສ້າງຊື່ສຽງ ໃຫ້ວົງການກິລາລາວ ເວົ້າລວມ, ເວົ້າສະເພາະນັກກິລາ ບານເຕະຍິງລຸ້ນ ບໍ່ເກີນອາຍຸ 16 ປີ ຫລື ຢູ 16 ລາວທີ່ໄດ້ສ້າງຊື່ສຽງ ໃນລະດັບສາກົນ ມາໃຫ້ກັບ ສປປ ລາວ ໃນໄລຍະຜ່ານມາ. ນອກຈາກ ນັ້ນທ່ານຍັງໄດ້ເນັ້ນໜັກ ໃຫ້ກັບບັນດາຄະນະນໍາ ແລະ ນັກກິລາບານເຕະ ທີ່ຜ່ານການຄັດເລືອກຈໍາ ນວນ 26 ຄົນ ເປັນຕົວແທນ ໃຫ້ ສປປ ລາວ ເຂົ້າຮ່ວມການແຂ່ງຂັນ ໃນມະຫະກໍາຊີເກມ ຄັ້ງ 29 ປະເທດ ມາເລເຊຍ ເປັນເຈົ້າພາບ ເຊິ່ງຈະຈັດ ໃນລະຫວ່າງ ວັນທີ 19-31 ສິງຫາ 2017 ນີ້ ໃຫ້ເອົາໃຈໃສ່ ເຝິກຊ້ອມຢ່າງເຕັມທີ່ ເພື່ອສ້າງຊື່ ສຽງ ໃຫ້ກັບ ສປປ ລາວ ອີກຄັ້ງ ໃນເວທີພາກພື້ນ ແລະ ສາກົນ. ສິ່ງສໍາຄັນການ ເຂົ້າຮ່ວມຄັ້ງນີ້, ນັກກິລາທຸກຄົນ ຕ້ອງຫລິ້ນບານຕາມ ແຜນຂອງຄະນະຄູເຝິກ ວາງເອົາໄວ້, ຫລິ້ນເປັນທີມດຽວກັນ, ຫລີກລ່ຽງຄວາມຮຸນແຮງ ໃນການລົງສະ ໜາມ, ໃຫ້ກໍາລັງໃຈ ເຊິ່ງກັນ ແລະ ກັນ ເພື່ອຍາດໃຫ້ໄດ້ ອັນດັບທີ່ດີຂອງການ ແຂ່ງຂັນພ້ອມທັງຮຽກຮ້ອງ ບັນດານັກກິລາ ທີ່ເປັນຕົວແທນ ໃຫ້ກັບນັກກິລາລາວ ຕ້ອງປະຕິບັດລະບຽບ ວິໄນຂອງການແຂ່ງຂັນ ປາສະຈາກການລົ້ມບານ, ອີກ ຢ່າງການເຂົ້າຮ່ວມ ຄັ້ງນີ້ຍັງເປັນແລກປ່ຽນວັດທະນະທໍາ ລະຫວ່າງປະເທດ ໃນອາຊຽນ. ສິ່ງສໍາຄັນ ໃຫ້ຜ່ານເຂົ້າຮອບ ໃນ 4 ທີມ, ຖ້າຜ່ານເຂົ້າຮອບ ລັດຖະບານຈະມອບ ທຶນຊ່ວຍ ເຫລືອໃຫ້ ສະຫະພັນແຫ່ງຊາດລາວ ຈໍານວນ 1 ຕື້ກີບ.
ສໍາລັບການແຂ່ງຂັນຄັ້ງນີ້ ແບ່ງອອກເປັນ 2 ກຸ່ມຄື: ເອ ແລະ ບີ, ຂະນະທີ່ນັກກິລາບານເຕະ ທີມຊາດລາວຖືກຈັດຢູ່ໃນກຸ່ມເອ ປະກອບມີ: ທີມຊາດມາເລເຊຍ, ມຽນມາ, ສິງກະໂປ ແລະ ທີມຊາດບຣູໄນ. ສ່ວນກຸ່ມບີປະກອບມີ ທີມ ຊາດໄທ, ຫວຽດນາມ, ອິນໂດເນເຊຍ, ກໍາປູເຈຍ, ຕີມໍເລສເຕ ແລະ ທີມຊາດຟີລິບປິນ.
ການລົງຕິດຕາມ ຢ້ຽມຢາມຄະນະຄູເຝິກ ແລະ ນັກກິລາຄັ້ງນີ້, ມີທ່ານ ສົມພູ ພົງສາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ວິເພັດ ສີຫາຈັກ ປະທານສະຫະພັນ ບານເຕະແຫ່ງຊາດ ພ້ອມດ້ວຍຄູເຝິກ ແລະ ນັກ ກິລາເຂົ້າຮ່ວມ.

 

ແຫລ່ງຂ່າວໄດ້ມາຈາກ : http://kidork.com

ຄວາມຄິດເຫັນຂອງຜູ້ອ່ານ (0)