GMT+7 23/08/2017 08:22

ລັດຖະບານຢີ່ປຸ່ນ ຊ່ວຍສ້າງໂຮງຮຽນ 47 ແຫ່ງ ໃຫ້ 3 ແຂວງພາກໃຕ້

 

 

ຂປລ. ລັດຖະບານຢີ່ປຸ່ນ ໄດ້ສະໜັບສະໜູນ ແລະ ໃຫ້ທຶນຊ່ວຍເຫລືອລ້າ ໃນດ້ານການພັດທະນາ ພື້ນຖານໂຄງລ່າງການສຶກສາ ໂດຍຜ່ານອົງການໄຈກາ ປະຈຳລາວ ​ເພື່ອ​ກໍ່ສ້າງ​ອາຄານ​ຮຽນ​ ຈຳນວນ 47 ​ແຫ່ງ​ ຢູ່ 3 ​ແຂວງ​ພາກ​ໃຕ້​ຄື: ແຂວງສາລະວັນ 23 ແຫ່ງ, ແຂວງເຊກອງ 12 ແຫ່ງ ແລະ ແຂວງອັດຕະປື 12 ແຫ່ງ. ລວມມູນ​ຄ່າທັງ​ໝົດ 8 ລ້ານກວ່າ ໂດລາສາຫະລັດ ຫລື ປະມານ 64 ຕື້ກວ່າກີບ. ​ໂດຍ​ໄດ້​ຈັດ​ພິທີ​ມອບ-ຮັບ​​ ເມື່ອ​ບໍ່​ດົນ​ຜ່ານ​ມາ​ຢູ່ບ້ານໜອງໃສ ເມືອງ ແລະ ແຂວງສາລະວັນ ໂດຍມີ ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ, ຜູ້ຊີ້ນຳວຽກງານ ວັດທະນະທຳສັງຄົມແຂວງ, ທ່ານ ທາເກຊິ ຮິກິຮາຊາ ເອກອັກຄະຣາຊະທູດປະເທດຢີ່ປຸ່ນ ປະຈຳລາວ ແລະ ມີບັນດາຄະນະນຳ ຂັ້ນເມືອງເຊກອງ, ອັດຕະປື ​ແລະ ພາກສ່ວນກ່ຽວຂ້ອງ ​ເຂົ້າ​ຮ່ວມ.

            
ທ່ານ ໂຢຊິຮາຣຸ ໂຍເນຢາມາ ຜູ້ຕ່າງໜ້າອົງການໄຈກາ (JICA) ປະຈຳລາວ ​ໄດ້​ໃຫ້​ຮູ້​ວ່າ: ອາຄານຮຽນ 47 ແຫ່ງນີ້ ແມ່ນໂຮງຮຽນມັດທະຍົມ ເປັນອາຄານ ຊັ້ນດຽວຖາວອນ ແລະ ມີເອກະລັກໜຶ່ງດຽວຄື: ຫລັງຄາມຸງດ້ວຍກະເບື້ອງສີຟ້າ, ກຳແພງສີຂາວ, ມີຫ້ອງຮຽນທັງໝົດ 250 ຫ້ອງ, ຫ້ອງການຄູອາຈານ 21 ຫ້ອງ, ຫ້ອງນ້ຳ 36 ຫ້ອງ, ຫ້ອງສະໜຸດ ແລະ ອື່ນໆ. ສຳລັບຢູ່ແຂວງສາລະວັນ ໂຄງການດັ່ງກ່າວແມ່ນ ໄດ້ເລີ່ມແຕ່ປີ 2008 ເຖິງ 2016 ມີ 2 ງວດຄື: ງວດທີ 1 ມີ 5 ຕົວເມືອງ, ມີ 13 ບ້ານ ແລະ ມີ 13 ແຫ່ງ ມູນຄ່າ 2 ລ້ານກວ່າໂດລາສະຫະລັດ ແລະ ໄລຍະທີ 2 ມີ 5 ຕົວເມືອງ, ມີ 12 ບ້ານ ໄດ້ຮັບໂຄງການກໍ່ສ້າງໂຮງຮຽນ ຈຳນວນ 12 ແຫ່ງ ລວມມູນຄ່າ 1 ລ້ານກວ່າໂດລາສະຫະລັດ, ສຳລັບໂຮງຮຽນມັດທະຍົມ ບ້ານໜອງໃສ ເມືອງສາລະວັນ ມີອາຄານຮຽນ 4 ຫລັງ, ຊັ້ນດຽວ ມີມູນຄ່າການກໍ່ສ້າງ 2 ແສນກວ່າໂດລາສະຫະລັດ.


ໄລຍະຜ່ານມາອົງການໄຈກາ ປະເທດຢີ່ປຸ່ນ ໃຫ້ທຶນສະໜັບສະໜູນເຂົ້າໃນ ການຊ່ວຍເຫລືອສ້າງໂຮງຮຽນ ຕາມໂຄງການປັບປຸງສະພາບແວດລ້ອມຂອງ ໂຮງຮຽນມັດທະຍົມສຳເລັດ ແລ້ວ 95 ແຫ່ງ ຢູ່ແຂວງຈຳປາສັກ ແລະ ແຂວງສະຫວັນນະເຂດ.

 

 

ແຫຼ່ງຂ່າວ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)