GMT+7 23/08/2017 08:24

ແຂວງຫົວພັນ ຈະອຳນວຍຄວາມສະດວກໃຫ້ ນັກທຸລະກິດຫວຽດນາມ ທີ່ມາລົງທຶນຢູ່ຫົວພັນ

 

 

ຂປລ. ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ໄດ້​ໃຫ້​ຮູ້​​ເມື່ອ​ບໍ່​ດົນ​ນີ້​ວ່າ: ປະຈຸບັນນີ້ ມີນັກທຸລະກິດຂອງຫວຽດນາມ ທີ່ພວມດຳເນີນທຸລະກິດຢູ່ ແຂວງຫົວພັນ ປະມານ 23 ຫົວໜ່ວຍ, ມີຈຳນວນ ພົນປະມານ 2.000 ກວ່າຄົນ. ຜ່ານການຈັດຕັ້ງປະຕິບັດ ດຳເນີນທຸລະກິດໃນໄລຍະຜ່ານມາ ເຫັນວ່າ​ໄດ້ປະກອບສ່ວນ ເຂົ້າໃນແຜນພັດທະນາ ເສດຖະກິດຂອງ ແຂວງ ​ແລະ ​ໃນ​ອະນາຄົດ​ແຂວງ​ຫົວພັນ​ ຈະ​ສ້າງ​ເງື່ອນ​ໄຂອຳນວຍ​ ຄວາມ​ສະດວກ​ໃຫ້​ແກ່ນັກ​ລົງທຶນ ​ແນ​ໃສ່​ດຶງ​ດູດໃຫ້ນັກທຸລະກິດ ຫວຽດນາມ ເຂົ້າມາດຳ ເນີນທຸລະກິດຢູ່ ແຂວງຫົວພັນ ໃຫ້ນັບມື້ນັບຫລາຍຂຶ້ນ.


​ເພື່ອ​ບັນລຸ​ຕາມ​ຈຸດປະ​ສົງ​ດັ່ງກ່າວ​ນັ້ນ, ແຂວງຫົວພັນ ຈະຊີ້ນນຳໃຫ້ບັນດາພະແນກການ ທີ່ກ່ຽວຂ້ອງນຳເອົາລະບຽບກົດໝາຍ ທີ່​ກ່ຽວຂ້ອງລົງເຜີຍແຜ່ ໃຫ້ນັດທຸລະກິດຫວຽດນາມ ເຂົ້າໃຈຢ່າງຈະແຈ້ງເລິກ ເຊິ່ງ ແລະ ຈະພະຍາຍາມແກ້ໄຂ ບັນຫາຂໍ້ຫຍຸ້ງຍາກ ສິ່ງທ້າທາຍສິ່ງທີ່ກີດຂວາງ ຕໍ່ກັບການດຳເນີນທຸລະກິດ ຂອງຊາວຫວຽດນາມ ໃຫ້ນັບມື້ນັບຫລຸດໜ້ອຍຖອຍລົງ ເພື່ອເຮັດໃຫ້ເຂົາເຈົ້າສະດວກໃນການ ດຳເນີນທຸລະກິດ.


ທ່ານ​ເຈົ້າ​ແຂວງໆ​ຫົວພັນ​ ຍັງ​ໃຫ້​ຮູ້​ອີກ​ວ່າ: ນັບແຕ່ປີ 2010 ເຖິງ ປີ 2020 ແຂວງແທັງຮວ່າ ສສ ຫວຽດນາມ ໄດ້ໃຫ້ການຊ່ວຍເຫລືອ ແຂວງຫົວພັນ ປະມານ 22 ລ້ານໂດລາສະຫະລັດ ແລະ ມາຮອດປີ 2017 ສາມາດຈັດຕັ້ງປະຕິບັດໄດ້ປະມານ 14 ລ້ານໂດລາສະຫະລັດ ແລະ ພວມສືບຕໍ່ອີກແຕ່ນີ້ຮອດປີ2020 ແມ່ນປະມານ 8 ລ້ານໂດລາສະຫະລັດ ​ເຊິ່ງທຶນ ຈຳນວນດັ່ງກ່າວ​ ແມ່ນໄດ້ໝູນໃຊ້ເຂົ້າໃນການ ກໍ່ສ້າງພື້ນຖານໂຄງລ່າງ, ສ້າງໂຮງຮຽນ, ໂຮງໝໍ, ຂົວທາງ, ຕ້ານເຈື່ອນ, ສວນສາທາລະນະ ແລະ ເຮືອນ ຮັບແຂກພິເສດຂອງແຂວງ. ນອກຈາກນີ້ແຂວງແທັງຮວ່າ ຍັງໄດ້ຊ່ວຍເຫລືອແຂວງຫົວພັນ ໃນການກໍ່ສ້າງຊັບພະຍາກອນມະນຸດ ໃນແຕ່ລະປີແມ່ນບໍ່ຫລຸດ 30 ທຶນ.

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)