GMT+7 24/10/2017 05:28

ໂຕໂຍຕາ ສົ່ງ 2 ເຍົາວະຊົນລາວເຂົ້າແຂ່ງຂັນ ແຕ້ມຮູບ ລະດັບໂລກ ຢູ່ຍີ່ປຸ່ນ

 

 

ຂປລ.ບໍລິສັດ ໂຕໂຍຕ້າ ມໍເຕີປະເທດໄທ ຈຳກັດ ຮ່ວມກັບຕົວແທນຈຳໝ່າຍ ໂຕໂຍຕາ ໃນ ສປປ ລາວ ​ ຄັດ​ເລືອກໄດ້ 2 ນ້ອງ​ເຍົາວະ​ຊົນ​ລາວ ຄື:ນາງ ລັດຕະນາ ຈັນດາວົງ ອາຍຸ 14 ປີ ຈາກ ໂຮງຮຽນມັດທະຍົມຕອນຕົ້ນ ສີສັດຕະນາກ ແລະ ທ້າວ ຄຳພູ ສີຫາລາດ ອາຍຸ 11 ປີ ຈາກໂຮງ ຮຽນມັດທະຍົມຕອນຕົ້ນ ຫ້ອມສະຫວັນ ທີ່​ຊະນະ​ເລີດ​ຈາກໂຄງການປະກວດແຕ້ມຮູບ ລົດໂຕໂຍຕາ ໃນຝັນ ຂອງຂ້ອຍ ຢູ່​ລາວ ​ເພື່ອເປັນຕົວແທນປະເທດລາວ ໄປແຂ່ງຂັນລະດັບ​ໂລກ ທີ່ປະເທດຍີ່ປຸ່ນ ໃນລະຫວ່າງ ວັນທີ 21-25 ສິງຫານີ້.

 

ພິທີມອບທຶນສະໝັບສະໜູນສຳລັບ​ຄ່າໃຊ້ຈ່າຍ ໃນການເດີນທາງ ມູນຄ່າ 100 ລ້ານກີບ ​​ໃຫ້​ແກ່​ທັງ​ສອງ​ນ້ອງ​ເຍົາວະ​ຊົນ ​ໄດ້ຈັດຂຶ້ນ ໃນວັນທີ 2ສິງຫາ 2017 ທີ່ນະຄອນຫລວງວຽງຈັນ ໂດຍການ ເຂົ້າ ຮ່ວມຂອງທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະກິລາ, ທ່ານ ປະກອນ ວົງວິທະຍາພິລົມ ປະທານຝ່າຍ ປະຕິບັດການ ສຳນັກງານເຂດພູມີພາກ ແມ່ນ້ຳຂອງ ແລະ ຜູ້ບໍລິຫານລະດັບສູງ ບໍລິສັດໂຕໂຍຕ້າ ພ້ອມດ້ວຍພໍ່-ແມ່ຜູ້ປົກຄອງເຂົ້າຮ່ວມ.

 

ທ່ານ ປະກອນ ວົງວິທະຍາພິລົມ ກ່າວວ່າ: ໂຄງການ ລົດໂຕໂຍຕ້າ ໃນຝັນຂອງຂ້ອຍ ໃນ ສປປ ລາວ ໄດ້ເລີ່ມມາແຕ່ປີ 2011 ເພື່ອສົ່ງເສີມໃຫ້ເຍົາວະຊົນລາວ ກ້າສະແດງອອກ ຜ່ານຄວາມຄິດສ້າງສັນ ແລະ ຈິນຕະນາການ, ໃນປີ 2014 ກໍມີຜົນງານຮູບແຕ້ມຂອງເຍົາວະຊົນລາວ ສາມາດຍາດ​ໄດ້ລາງວັນ Silver Award ໃນລະດັບໂລກ. ຂະນະທີ່ປີ 2017 ນີ້ ກໍມີຜົນງານ ຮູບແຕ້ມຂອງ ນ້ອງ​ເຍົາວະ​ຊົນ​ທັງ​ສອງ​ຄົນ​ຕື່ມ​ອີກ. ນອກຈາກນີ້ຈະໄປເຂົ້າຮ່ວມແຂ່ງຂັນແລ້ວ ທັງສອງນ້ອງຍັງຈະໄດ້ເຂົ້າຊົມໂຮງ ງານຜະ ລິດລົດ ຂອງໂຕໂຍຕ້າ ແລະ ຮ່ວມກິດຈະກໍາ ຈາກໂຄງການ ອີກຫລາຍຢ່າງ. 

 

 

ແຫຼ່ງຂ່າວ:​ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)