GMT+7 24/10/2017 05:30

ຜູ້ລ້ຽງປາກະຊັງຂາດທຶນເພາະ 2 ເຫດຜົນ

 

 

ຜູ້​ປະກອບ​ການ​ລ້ຽງປາ​ກະ​ຊັງລາວ​ ຢູ່​ແມ່​ນ້ຳຂອງ ​​ ​ເຂດ​ຫາດ​ດອກ​ແກ້ວ ​ເມືອງ​ຫາດ​ຊາຍ​ຟອງ ນະຄອນຫລວງ​ວຽງຈັນ ຕັດສິນ​ໃຈ​ຂາຍ​ປາ​​ໃນ​​ລາຄາທີ່​ຫລຸບ​ທຶນ 10.000-12.000 ກີບຕໍ່​ກິ​ໂລ ພາຍຫລັງ​ວາງ​ແຜນການ​ຕະຫລາດ​ຜິດພາດ ​ເຮັດ​ໃຫ້​ຜູ້​ລ້ຽງ​ຊາວ​ຈີນ​ເອົາ​ປຽບ ​ບວກ​ກັບ​ຜົນ​ກະທົບ​ຈາກ​ປາ​ຕາຍຍ້ອນ​ໄພ​ທໍາ​ມະ​ຊາດ. ຂະນະ​ທີ່ ຄວາມ​ເສຍ​ຈາກ​ການ​ລ້ຽງປາ ​ຢູ່ຈັດ​ຈັນທະ​ວີ​ຟາ​ມ ໃນ​ໄລຍະ​ຕົ້ນ​ປີ 2017 ຄາດວ່າຂາດທຶນ​ ໃນ​ມູນ​ຄ່າປະມານ 10 ລ້ານ​ບາດ ຫລືປະມານ 2,4 ຕື້​ກີບ. ​

 

ທ່ານ ຈັດ ຂັນຈະ​ເລີ​ນ ​ເຈົ້າ​ຂອງຈັດ​ຈັນທະ​ວີ​ຟາ​ມ ​ເປີດ​ເຜີຍ​ຕໍ່​ສື່​ມວນ​ຊົນ​ວ່າ: ​ຕົນ​ເອງ​ໄດ້ລ້ຽງປາ​ກະຊັງ​ຊຸດ​ນີ້ມີປະມານ 100 ກະຊັງ, ກະຊັງ 1 ບັນຈຸ​ປາ 3.000 ​ໂຕ ລວມ 3 ​​ແສນໂຕ, ໄດ້​ມີ​ການ​ລົງທຶນ​ທັງໝົດ 30-40 ລ້ານບາດ​ ຫລື ປະມານ 7 ຕື້ກວ່າ​ກີບ, ​ເມື່ອ​ເຖິງ​ເວລາ​ຂາຍ ປະກົດ​ວ່າ​ຖືກ​ຈີນ​ກົດ​ໜ່ວງລາຄາລົງ​ໃຫ້​ຢູ່​ໃນ​ລະດັບ​ຕ່ຳ ດ້ວຍ​ບາງເຫດຜົນ ຕົນ​ເອງ​ຈຶ່ງ​ບໍ່ຍອມ​ຂາຍ​ປາ​ອອກ​ ເພາະ​​ເຫັນ​ວ່າຂາດທຶນ ສະ​ນັ້ນ ບັນດາ​ລູກ​ຄ້າ​ຈຶ່ງ​ແຫ່​ໄປ​ຊື້​ກັບ​ຄົນ​ຈີນ ​ເມື່ອ​ເວລາຜ່ານ​ໄປ​ຫລາຍ​ວັນ ​ປາ​ຂອງ​ຕົນ​ກໍ​ໃຫຍ່​ຂຶ້ນ​ມາ​ນັບ​ມື້ ແຕ່ລູກ​ຄ້າ​ກໍ​ຍັງ​ບໍ່ມາ​ຊື້ ​ແລະ ​ເຮັດ​​ໃຫ້​ຈໍານວນ​ປາ ​ໃນ​ກະຊັງເກີດ​ມີ​ຄວາມ​ແອ​ອັດອົກ​ຊີບໍ່ພຽງພໍ​ໃນ​ທີ່​ສຸດປາ​ກໍ​ເລີ່​ມຕາຍ​ເພີ່ມ​ຂຶ້ນ​ທຸກໆ​ມື້  ພ້ອມ​ນີ້ ຍັງ​ມີ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ ນ້ຳ​ຂຶ້ນ​ກະທັນຫັນ ​​ເຊິ່ງ​ເປັນ​ເຫດ​ເຮັດ​ໃຫ້​ປາ​ຊ໋ອກຕາຍ ​ເຊິ່ງ​ໄດ້​ສ້າງ​ຄວາມ​ເສຍ​ຫາຍ 30 ກະຊັງ ​​ສະ​ເລ່ຍເກືອ​ບລ້ານ​ໂຕ ເປັນ​ມູນ​ຄ່າ 10 ລ້ານ​ບາດ. ​ ປັດຈຸ​ບັນ​ ປາ​ຈໍານວນ​ທີ່​ມີ​ຢູ່​ໃຫຍ່ສະ​ເລັ່ຍນໍ້າໜັກ​ປະມານ 2,5-3 ກິ​ໂລຕໍ່​ໂຕ ດັ່ງ​ນັ້ນ​ຈິ່ງ​ຕັດສິນ​ໃຈຂາຍ​ປາ​ອອກ​ ໃນ​ລາຄາ​ຖືກ(ລາຄາ​ຂາດທຶນ) ​​ແລະ ​ຕ້ອງ​ຂາຍ​ໃຫ້ໝົດ ​ເພື່ອ​ເກັບ​ກູ້​ທຶນ​ຄືນ​ຈຳນວນໜຶ່ງຕື່ມ​ອີກ.

 

ການ​ລ້ຽງປາ​ກະຊັງ​ຕາມ​ລໍາ​ແມ່​ນ້ຳຂອງຢູ່ ​ເຂດ​ຫາດ​ດອກ​ແກ້ວ​ ​ໄດ້​ເລີ່​ມ​ແຕ່​ປີ 2006-2012 ພົບ​ວ່າການ​ດໍາ​ເນີນ​ທຸລະ​ກິດ​ລ້ຽງ​ປາ ໄດ້​ຮັບ​ຜົນ​ດີ​ພໍ​ສົມຄວນ​ ​ແລະ ມີ​ກຳ​ໄລ ​ແຕ່​​ປີ 2013-2016 ​ໄດ້​ມີ​ຜູ້​ປະກອບ​ການ​ລ້ຽງປາ​ກະຊັງ​ຂອງ​ຈີນ ​ເຂົ້າ​ມາ​ລ້ຽງຈຳນວນ​ຫລວງຫລາຍ ຈຶ່ງ​ກໍ​ໃຫ້​ເກີດ​ການ​ແຂ່ງຂັນ​ດ້ານ​ການ​ຕະຫລາດ ​ແລະ ມີ​ການ​​ເອົາ​ປຽບ​ຄົນ​ລາວ ສຸດ​ທ້າຍ​ເຮັດ​ໃຫ້ການ​ດຳ​ເນີນ​ທຸລະ​ກິດ​ລ້ຽງ​ປາ ​ຂອງ​ຄົນ​ລາວພົບ​ຄວາມ​ຫຍຸ້ງຍາກ​ ຍ້ອນ​​ເຫດຜົນ​ທີ່​ວ່າ​ຜູ້​ລ້ຽງ​ປາ​ຊາວຈີນ ​ເພາະ​ພັນ​ແນວ​ປາ​ເອງ, ຜະລິດ​ຫົວອາຫານ​ເອງ ​ແລະ ອື່ນໆ​ຈິ່ງ​ເຮັດ​ໃຫ້​ຕົ້ນ​ການ​ຜ​ະລິດ​ຕໍ່າ ​ແລະ ຂາຍ​ຖືກ​ກວ່າ​ຄົນ​ລາວ ສ່ວນ​ຜູ້​ປະກອບ​ການ​ລາວ​​ ໄດ້​ໃຊ້​ຕົນ​ທຶນ​ສູງ ​ແລະ ສ່ວນ​ໃຫຍ່​ແມ່ນ​ນໍາ​ເຂົ້າ​ຫົວອາຫານ ​ແລະ ​ແນວ​ພັນ​ປາ​ຈໍານວນ​ໜຶ່ງ. 

 

ຢ່າງ​ໃດ​ກໍ​ຕາມ ທ່ານ ຈັດ ຂັນຈະ​ເລີ​ນ ​ໄດ້​ຢືນຢັນ​ວ່າ​ເຖິງຈະ​ຂາດທຶນ​ກວ່າ 2 ຕື້​ກີບ​ໃນ​ການ​ລ້ຽງ ປາ​ຂາຍ​ ໃນ​ຊຸດ​ນີ້​ກໍ​ຕາມ ​ແຕ່​ຕົນ​ເອງ ​ແລະຄອບຄົວ​ຈະບໍ່ທໍ້ຖອຍ​ເດັດຂາດ ​ເພາະຍັງ​ມີ​ທຶນ​ຈຳນວນໜຶ່ງ ທີ່​ຈະ​ສູ້​ຊົນ​ຕື່ມ​ອີກ​ໃນ​ຊຸດໜ້າ ​ແຕ່​ຢາກ​ຮຽກຮ້ອງ​ໃຫ້​ພາກ​ລັດ ​ເບິ່ງ​ຄືນ​ການ​ອະນຸຍາດ​ໃຫ້​ຕ່າງປະ​ເທດ ​ເຂົ້າ​ມາ​ປະກອບ​ການ​ລ້ຽງປາ​ກະຊັງ​ຢູ່​ບ້ານ​ເຮົາ  ​ເພາະ​ຕອນ​ນີ້​ຖື​ວ່າ​ຫລົ້ນ​ຕະຫລາດ​ແລ້ວ. ສ່ວນ​ຕົວ​ເອງ​ກໍ​ຈະ​ພະຍາຍາມຊອກ​ຮູ້​ບົດຮຽນເລື່ອງ​ການ​ຕະຫລາດ​ ໃຫ້​ເຂັ້ມ​ແຂງ​ກວ່າ​ເກົ່າ, ​ເອົາ​ປາ​ໄປ​ເຖິງ​ມື​ຜູ້​ບໍລິ​ໂພ​ກ, ທີ່​ສຳຄັນ​ຮອດ​ເວລາ​ແມ່ນ​ຕ້ອງ​ຂາຍ​ໂລດ  ​ເຖິງ​ວ່າ​ລາຄາ​ຕ່ຳ​ແຕ່​ກໍ​ຈະບໍ່ຂາດທຶນ​ຫລາຍ​ແບບ​ນີ້.

 

ທ່ານ ຈັດ ຂັນຈະ​ເລີ​ນ ​ໃຫ້​ຮູ້​ຕື່ມ​ວ່າ: ​ເມື່ອ​ບໍ່ດົນ​ມາ​ນີ້​ໄດ້​ມີ​ຕົວ​ແທນ​ຈາກ​ຜູ້​ປະກອບ​ການ​ລ້ຽງປາ​ຂອງ​ຈີນ  ລົງ​ມາ​ປຶກສາ​ຫາລື ​ແລະ ຊັກ​ຊວນ​ໃຫ້​ພ້ອມ​ກັນ​ຫລຸດ​ການ​ລ້ຽງປາ​ກະ​ຊັງ​ລົງ 50% ​ແຕ່​ຕົນ​ເອງ​​ໄດ້​ສຶກສາ​ເຖິງ​ຄວາມ​ເປັນ​ຈິງ​ແລ້ວ ຈະ​ບໍ່ສາມາດ​ຫລຸດ​ລົງ​ໄດ້​ໃນ​ຊຸດໜ້າ ​ເພາະ​ຊຸດ​ນີ້​ຕົນ​ຂາດທຶນ​ຫລາຍ ​ແລະ ​ເມື່ອ​ຄິດ​ທົບ​ທວນ​ແລ້ວການ​ຊັກ​ຊວນ​ດັ່ງກ່າວ​ ອາດ​ຈະ​ເປັນການຫລຸດ​ການ​ລ້ຽງປາ​ລົງ​ເຄິ່ງໜຶ່ງ ​ເພາະ​ປັດຈຸບັນ​ເຫັນ​ວ່າ​ຫລາຍ​ເກີນ​ຕະຫລາດ​ຕ້ອງການຫລືບໍ່.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)