GMT+7 24/10/2017 05:22

ລັດຖະບານຕົກລົງປະດັບຫຼຽນໄຊພັດທະນາ ຊັ້ນ III ໃຫ້ກຸ່ມບໍລິສັດເຄແອນຊີ ທີ່ປະກອບສ່ວນກໍ່ສ້າງເສັ້ນທາງ

 

 

ລັດຖະບານແຫ່ງ ສປປ ລາວ ຕົກລົງປະດັບຫຼຽນໄຊພັດທະນາ ຊັ້ນ III ໃຫ້ກຸ່ມບໍລິສັດເຄແອນຊີ ທີ່ມີຜົນງານໃນການປະກອບສ່ວນຍົກລະດັບພື້ນຖານໂຄງລ່າງນັ້ນກໍຄື ການກໍ່ສ້າງເສັ້ນທາງເບຕົງ ຮ່ອມທີ 13 ບ້ານສີສະຫວາດ ເມືອງຈັນທະບູລີ ນະຄອນຫຼວງວຽງຈັນ ໂດຍພິທີໄດ້ຈັດຂຶ້ນເມື່ອວັນທີ 16 ມິຖຸນາ 2017 ຜ່ານມາ ຢູ່ໃນວາລະພິທີມອບ-ຮັບເສັ້ນທາງສາຍດັ່ງກ່າວ.

ເປັນກຽດປະດັບຫຼຽນໄຊຄັ້ງນີ້ແມ່ນ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ແລະ ຂຶ້ນຮັບການປະດັບຫຼຽນໄຊພັດທະນາ ຊັ້ນ 3 ໂດຍທ່ານ ນາງ ຈັນທະຈອນ ວົງໄຊ ຮອງປະທານກຸ່ມບໍລິສັດເຄແອນຊີ ພ້ອມນີ້ ທ່ານ ນາງ ບົວລອນ ວົງດາລາແສນ ຄະນະພັກນະຄອນຫຼວງວຽງຈັນ ເລຂາພັກເມືອງ ເຈົ້າເມືອງໆຈັນທະບູລີ ແລະ ທ່ານ ກິດສະໜາ ວົງໄຊ ປະທານກຸ່ມບໍລິສັດເຄແອນຊີ ເຊິ່ງມີພະນັກງານທີ່ກ່ຽວຂ້ອງ ຮວມເຖິງອົງການປົກຄອງທ້ອງຖິ່ນ ພ້ອມດ້ວຍພໍ່ແມ່ປະຊາຊົນພາຍໃນບ້ານສີສະຫວາດ ກໍໄດ້ເຂົ້າຮ່ວມສະແດງຄວາມຍິນດີ.

ສຳລັບເສັ້ນທາງທີ່ໄດ້ຮັບການປັບປຸງໃໝ່ແມ່ນໄດ້ນຳໃຊ້ທຶນຂອງກຸ່ມບໍລິສັດເຄແອນຊີ 100% ເສັ້ນທາງມີລວງຍາວ 240 ແມັດ ລວງກວ້າງ 5,5 ແມັດ ມີລະບົບລະບາຍນ້ຳ 1 ເບື້ອງ ພ້ອມຝາອັດເພື່ອຮອງຮັບການສັນຈອນຂອງພາຫະນະໄດ້ ໃນມູນຄ່າການກໍ່ສ້າງທັງໝົດ 602.046.000 ກີບ.

 

ຄວາມຄິດເຫັນຂອງຜູ້ອ່ານ (0)