GMT+7 26/05/2018 14:58

ໂຮງໝໍເຊດຖາທິຣາດ ສະຫລອງວັນພະຍາບານສາກົນຄົບຮອບ 118 ປີ

 

 

ໂຮ​ງໝໍ​ເຊ​ດຖາ​ທິຣາດ ຈັດ​ງານ​ສະ​ເຫລີ​ມສະຫລອງ ວັນ​ພະຍາບານ​ສາກົນ ຄົບຮອບ 118 ປີ ຂຶ້ນ​ ໃນ​ວັນ​ທີ 17 ພຶດສະພາ 2018 ທີ່​ໂຮງໝໍດັ່ງກ່າວ, ​ເພື່ອ​ລະນຶກ​ເຖິງຄຸນງາມຄວາມດີ  ຂອງພະຍາບານໃນທົ່ວໂລກ  ທີ່​ຍາມ​​ໃດ​ກໍ​ໄດ້​ເອົາ​ໃຈ​ໃສ່​ເບິ່ງ​ແຍງ ປິ່ນປົວຄົນເຈັບ ຊ່ວຍເຫລືອສັງຄົມຢ່າງບໍ່ຮູ້ອິດຮູ້ເມື່ອຍ, ​ໂດຍ​ການ​ເປັນ​ປະທານ ຂອງ​ ທ່ານ ນາງ ດຣ.ຄຳ​ຫລ້າ ຈູມ​ລີ​ວົງ ຮອງ​ອຳນວຍ​ການ ​ໂຮງໝໍ​ເຊ​ດຖາ​ທິຣາດ, ພ້ອມ​ດ້ວຍ​ທ່ານໝໍ ​ແລະ ພະຍາບານ ​ເຂົ້າ​ຮ່ວມ ​ຢ່າງ​ພ້ອມພຽງ.

ໂອກາດ​ນີ້, ທ່ານ ນາງ ນາ​ລີ ພົມ​ດວງ​ສີ ຮອງ​ຫົວໜ້າ ພະແນ​ກພະຍາບານ ໂຮງໝໍ​ເຊ​ດຖາ​ທິຣາດ  ໄດ້ຫວນ​ຄືນປະຫວັດຄວາມເປັນມາ  ຂອງວັນພະຍາບານສາກົນ ແລະ ບົດບາດຄວາມສຳຄັນ ຂອງພະຍາບານ ໃນການປະຕິບັດໜ້າທີ່ບໍລິ ການຮັບໃຊ້  ​ແລະ ປີ່ນປົວຄົນເຈັບຢ່າງມີຈັນຍາບັນ  ຄຽງຄູ່ກັບການຍົກລະດັບຄວາມຮູ້ຄວາມສາມາດ  ດ້ານວຽກງານວິຊາການຂອງຕົນເອງ,  ພ້ອມກ້າວໄປສູ່ລະດັບສາກົນ, ເຊິ່ງກິດຈະກຳດັ່ງກ່າວແມ່ນໄດ້ຈັດຂຶ້ນທຸກໆປີ  ເພາະວ່າ ເປັນວັນຄ້າຍວັນເກີດຂອງ ທ່ານ ນາງ ພະຍາບານ ຟໍລ​ເຣັນສ ໄນ​ຕິງ​ເກ​ລ  ຜູ້​ທີ່ໄດ້ຮັບການຍ້ອງຍໍຜົນງານ ​ແລະ ​ເປັນ​ແບບຢ່າງຂອງ​ພະຍາບານ ຜູ້ທີ່ມີອຸດົມການສາທາລະນະນຸປະໂຫຍດ ເພື່ອມະນຸດ. ພະຍາບານ ແມ່ນໝາຍເຖິງຫົວ ໃຈສີຂາວ ແລະ ຫົວໃຈສີຂາວ ຍັງເປັນສັນຍາລັກ ແຫ່ງຄວາມເອົາໃຈໃສ່ ໃນການບົວລະບັດເບິ່ງແຍງ ດ້ວຍຄວາມຮູ້,  ມີນໍ້າໃຈມະນຸດສະ ທຳ, ຈິດວິນຍານຂອງພະຍາບານ.

ພ້ອມ​ດຽວກັນ​ນີ້, ທ່ານ ນາງ ຄຳ​ຫລ້າ ສີ​ອຸດົມ ຫົວໜ້າ ພະ​​ແນ​ກພະຍາບານ ໂຮງໝໍ​ເຊ​ດຖາ​ທິຣາດ  ຍັງ​ໄດ້​ຂຶ້ນ​ສະຫລຸບ​ຜົນງານ ການ​ເຄື່ອນ​​ໄຫວ​ວຽກງານ ​ພະຍາບານ ປະຈຳ​ປີ ​ແຕ່​ເດືອນ10/2016-9/2017  ​ແລະ ​ຜ່ານ​ແຜນການ​ປີ 2018; ສະຫລຸບ​ການ​ເຄື່ອນ​ໄຫວວຽກງານ ​ໃນ​ໄລຍະ​ເດືອນ 11/2017-4/2018 ​ແລະ ຜ່ານ​ແຜນການ​ປະຕິບັດ​ວຽກງານ​ໄລຍະ 1 ປີ 5 ​ເດືອ​ນ ອີກ​ດ້ວຍ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)