GMT+7 26/05/2018 15:09

ເຈົ້າແຂວງຊຽງຂວາງ ຕ້ອນຮັບ ປະຈຳລາວ

 

 

ທ່ານ ບຸນຕົ້ນ ຈັນທະພອນ ຮັກສາການ ເລຂາພັກແຂວງ ເຈົ້າແຂວງໆ ຊຽງຂວາງ ​ໄດ້​ຕ້ອນຮັບ ທ່ານ ຫງວຽນ ບາ ຮຸ່ງ (NGUYEN BA HUNG) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ລາວ   ພ້ອມດ້ວຍຄະນະ ​ໃນ​ໂອກາດ​ທີ່​ທ່ານ​ທູດ ​ເດີນທາງ​ໄປ​ຢ້ຽມຢາມ ​ແລະ ​ເຮັດ​ວຽກ​ຢູ່​ແຂວງ​ຊຽງ​ຂວາງ  ວັນ​ທີ 16 ພຶດສະພາ 2018 ນີ້.

ໂອກາດ​ນີ້, ສອງຝ່າຍຕາງກໍໄດ້ພັດປ່ຽນກັນລາຍງານ  ການພັດທະນາເສດຖະກິດ-ສັງຄົມ, ວຽກງານການຮ່ວມມືຮອບດ້ານ  ການຊ່ວຍເຫຼືອເຊິ່ງກັນ ແລະ ກັນ  ເປັນຕົ້ນແມ່ນ ການພັດທະນາພື້ນຖານໂຄງລ່າງ,  ການພັດທະນາຊັບພະຍາ ກອນມະນຸດ,  ການຮ່ວມມືຂຸດຄົ້ນ ຊອກຄົ້ນອັດຖິ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍຊີວິດຢູ່ແຂວງຊຽງຂວາງ  ໃນປາງສົງຄາມ, ສາຍພົວພັນ ຄວາມສາມັກພິເສດລາວ-ຫວຽດນາມ  ສືບຕໍ່ຮ່ວມ ມືແກ້ໄຂແຮງງານ ທີ່ບໍ່ຖືກຕ້ອງ ຕາມກົດໝາຍ, ແກ້ໄຂການຍົກຍ້າຍຕັ້ງພູມລຳເນົາ ຕາມລຳພັງໃຈ, ສະກັດກັ້ນປາບປາມ ກວດກາການຂົນສົ່ງ ສິ່ງເສບຕິດທີ່ຜິດກົດໝາຍ, ໃຫ້ຄວາມສະດວກ ເບິ່ງແຍງນັກທຸລະກິດ ຊາວຄ້າຂາຍຄົນຫວຽດນາມທີ່ມາດຳ ເນີນທຸລະກິດ ຢູ່ແຂວງຊຽງຂວາງ ສືບຕໍ່ແລກປ່ຽນບົດຮຽນນຳກັນ  ເພື່ອພັດທະນາໃຫ້ວ່ອງໄວ ແລະ ຍືນຍົງ.

ພ້ອມ​ກັນ​ນີ້, ຄະນະຜູ້ແທນຫວຽດນາມ  ກໍໄດ້ມອບຄອມພີວເຕີ ໃຫ້ແຂວງຊຽງຂວາງຈຳນວນ 2 ຊຸດ ລວມມູນຄ່າ 9 ລ້ານກີບ, ຈາກ​ນັ້ນ ຄະນະຜູ້ແທນຫວຽດນາມ  ກໍໄດ້ໄປຢ້ຽມຢາມກວດກາໂຄງການ ກໍ່ສ້າງໂຮງໝໍມິດຕະພາບ ລາວ-ຫວຽດນາມ  ທີ່ກຳລັງກໍ່ສ້າງຢູ່ເມືອງແປກ  ເຊິ່ງເປັນທຶນຊ່ວຍເຫລືອ ຂອງລັດຖະບານ ຫວຽດນາມ  ໄດ້ເລີ່ມລົງມືກໍ່ສ້າງມາໄດ້ 3 ເດືອນສຳເລັດແລ້ວ 15%,  ໄປຢ້ຽມຢາມໂຮງຮຽນຊົນ ເຜົ່າແຂວງຊຽງຂວາງ   ເປັນໂຮງຮຽນລັດ ຖະບານຫວຽດນາມ ຊ່ວຍເຫລືອກໍ່ສ້າງ, ນອກນີ້ ຍັງໄດ້ໄປວາງພວງມາລາ ທີ່ອານຸສາວະລີຮ່ວມສຳພັນສູ້ຮົບ ລາວ-ຫວຽດນາມ  ເພື່ອລະນຶກເຖິງ ຄຸນງາມຄວາມດີ, ວິລະກຳ ທີ່ເພີ່ນໄດ້ສ້າງໄວ້.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)