GMT+7 26/05/2018 14:56

ອັດຕະປື ສະຫລຸບວຽກງານດ້ານໂພຊະນາການ ໄຕມາດ 2

 

 

ແຂວງອັດຕະປື ສະຫລຸບວຽກງານດ້ານ ໂພຊະນາການ ປະຈໍາໄຕມາດທີ 2  ປີ 2018 ໃນວັນທີ 15 ພຶດສະພາ ປີ 2018  ​ໂດຍ​ການປະທານຂອງທ່ານ ອຸ່ນຫລ້າ ໄຊຍະສິດ  ຮອງເຈົ້າແຂວງອັດຕະປື, ປະທານຄະນະກໍາມະທິການ ດ້ານໂພຊະນາການຂັ້ນແຂວງ, ມີຄະນະກໍາມະທິການ ດ້ານໂພຊະນາການຂອງແຂວງ,  ມີພະແນກການອ້ອມຂ້າງ  ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ. ​ເພື່ອພ້ອມກັນທົບທວນຄືນ ຜົນຂອງການຈັດຕັ້ງປະຕິບັດ ຂອງວຽກງານດ້ານໂພຊະນາການ ປະຈໍາໄຕມາດທີ 1 ປີ 2018,  ເຊິ່ງໄດ້ຍົກໃຫ້ເຫັນດ້ານດີ,  ດ້ານອ່ອນ ແລະ ບົດຮຽນທີ່ຖອດຖອນໄດ້ ຈາກການຈັດຕັ້ງປະຕິບັດຜ່ານມາ  ​ແລະ ຮ່ວມກັນປຶກສາຫາລື ວາງແຜນການໃນຕໍ່ໜ້າ   ເພື່ອເຮັດໃຫ້ວຽກງານດ້ານໂພຊະນາການ ພາຍໃນແຂວງອັດຕະປື ໄດ້ຮັບການ ພັດທະນາດີຂຶ້ນ.

ທ່ານ ອຸ່ນຫລ້າ ໄຊຍະສິດ ​ໄດ້​ກ່າວ​ວ່າ:  ວຽກງານໂພຊະນາການ  ແມ່ນໜຶ່ງໃນເປົ້າໝາຍສະຫັດສະຫວັດ ດ້ານການພັດທະນາ ເພື່ອນໍາພາເອົາ ປະເທດລາວເຮົາ ກ້າວອອກຈາກ ສະຖານະພາບປະເທດດ້ອຍພັດທະນາ,  ດັ່ງນັ້ນພັກ ແລະ ລັດຖະບານຍາມໃດ  ກໍຖືສໍາຄັນຕໍ່ວຽກງານການສົ່ງເສີມ ດ້ານໂພຊະນາການ  ໂດຍສະເພາະ ແມ່ນ ເດັກນ້ອຍທີ່ເປັນອານາຄົດຂອງຊາດ,  ຖ້າເດັກໄດ້ສານອານທີ່ພຽງພໍເດັກກໍຈະມີສຸຂະພາບທີ່ແຂງແຮງ ໃນທຸກດ້ານ.

ສໍາລັບ ແຂວງອັດຕະປື ຕົວເລກ ຂອງເດັກຂາດສານອາຫານຍັງກວມ ອັດຕາທີ່ສູງສົມຄວນເມື່ອທຽບໃສ່ບັນດາແຂວງ ໃນທົ່ວປະເທດ ເປັນຕົ້ນ  ທົ່ວແຂວງອັດຕະປື ເດັກນ້ອຍອາຍຸລຸ່ມ 5 ປີລົງມາ  ມີ 17.886 ຄົນ, ໃນນັ້ນມີເດັກທີ່ຂາດ ສານອາຫານ ປະເພດເຕ້ຍ ກວມເອົາ 43%,  ເດັກຂາດສານອາຫານປະເພດນໍ້າໜັກຫລຸດ ເກນມາດຕະຖານກວມເອົາ 30,3%, ເດັກຂາດສານອາຫານປະເພດຈ່ອຍ ກວມເອົາ 9,9%,  ເຊິ່ງຕົວເລກດັ່ງກ່າວໄດ້ຊີ້ໃຫ້ເຫັນວ່າ   ອັດຕາການຂາດສານອາຫານ ໃນເດັກຢູ່ແຂວງອັດຕະປື ຍັງສູງເມື່ອທຽບໃສ່ແຂວງອື່ນໆ ໃນທົ່ວປະເທດ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)