GMT+7 26/05/2018 14:57

ເມືອງແກ່ນທ້າວ ປາຖະກະຖາ 2 ວັນປະຫວັດສາດ

 

 

ເມືອງແກ່ນທ້າວ ແຂວງໄຊຍະບູລີ ຈັດປາຖະກະຖາ 2 ວັນປະຫວັດສາດຄື:  ວັນຜ່າວົງປິດລ້ອມຂອງກອງພັນທີ 2 ວິລະຊົນ ຄົບຮອບ 59 ປີ  (18 ພຶດສະພາ 1959-18 ພຶດສະພາ 2018)  ແລະ ວິລະກໍາໂຕນຄຸກຢ່າງມະຫັດສະຈັນ ຂອງບັນດາຜູ້ນໍາພັກ ຄົບຮອບ 58 ປີ  (24 ພຶດສະພາ 1960-24 ພຶດສະພາ 2018)  ໃນວັນທີ 15 ພຶດສະພາ 2018 ນີ້,  ​ໂດຍ​ການ​ປາຖະກະຖາ​ຂອງ ທ່ານ ອໍາຄາ ລັດສະໝີ  ຮອງເຈົ້າເມືອງໆແກ່ນທ້າວ,  ມີຄະນະປະຈໍາພັກເມືອງ, ກໍາມະການພັກເມືອງ,  ຫົວໜ້າ, ຮອງຫົວໜ້າຫ້ອງການ,  ກົມກອງ, ອົງການຈັດຕັ້ງ, ລັດວິສາຫະກິດ,  ດ່ານສາກົນ, ພະນັກງານລັດຖະກອນ,  ພະນັກງານອາວຸໂສບໍານານ, ນາຍ ແລະ ພົນທະຫານ,  ນາຍ ແລະ ພົນຕໍາຫລວດ ແລະ ນາຍບ້ານເທສະບານ  ເຂົ້າຮ່ວມ 140 ກວ່າຄົນ.

ໂອກາດ​ນີ້, ທ່ານ ອໍາຄາ ລັດສະໝີ  ໄດ້ຍົກໃຫ້ເຫັນຄວາມໝາຍສຳຄັນ  ການຜ່າວົງປິດລ້ອມຂອງກອງພັນທີ 2  ​ເຊິ່ງໄດ້ສ່ອງແສງໃຫ້ເຫັນວ່າ ການນຳພາຂອງພັກ ຖືກຕ້ອງສະຫລາດສ່ອງໃສ  ຂະບວນການຕໍ່ສູ້ ຂອງພວກເຮົາແມ່ນເປັນ ທຳ,  ແມ່ນໄຊຊະນະອັນໃຫຍ່ຫລວງ ຂອງກຳລັງປະກອບອາວຸດ ເຮົາທີ່ຢູ່ໃຕ້ການນຳພາຂອງພັກ,  ເປັນເຫດການປະຫວັດສາດອັນສຳຄັນຂອງຊາດ,  ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດ ໃຫ້ແກ່ຂະບວນການຕໍ່ສູ້ ຂອງກອງທັບ  ແລະ ປະຊາຊົນເຮົາ ຍາດເອົາໄຊຊະນະ ໃນໄລຍະຕໍ່ມາ, ກອງພັນທີ 2 ໄດ້ເສີມຂະຫຍາຍ ມູນເຊື້ອຕໍ່ສູ້ບໍ່ຍອມຈຳນົນ ຂອງບັນພະບູລຸດ ແລະ ປະຊາຊົນລາວຜູ້ຮັກຊາດ,  ມີຄວາມບໍລິສຸດຜຸດຜ່ອງ, ຄວາມຈົງຮັກພັກດີ  ແລະ ຄວາມສາມັກຄີເປັນຈິດໜຶ່ງໃຈດຽວ.

ພ້ອມນີ້ ທ່ານຍັງໄດ້ຍົກໃຫ້ເຫັນເຖິງສາເຫດ  ການໂຕນຄຸກຢ່າງມະຫັດສະຈັນ ຂອງບັນດາຜູ້ນໍາໄປສູ່ຖານທີ່ໝັ້ນປະຕິວັດ ຢ່າງປອດໄພ ຍ້ອນການນຳພາອັນສະຫລາດສ່ອງໃສ  ແລະ ປີຊາສາມາດຂອງປະທານໄກສອນ ພົມວິຫານ  ແລະ ສູນກາງພັກ, ຍ້ອນນໍ້າໃຈຮັກຊາດ  ອັນແຮງກ້າຂອງບັນດາຜູ້ນຳເຮົາ ທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫລະ  ມີຄວາມປີຊາສາມາດຂົນຂວາຍ,  ສຶກສາອົບຮົມສາລະວັດທະຫານ,  ເຮັດໃຫ້ສັດຕູກາຍເປັນມິດ ສະຫາຍຮ່ວມ ຕາຍນຳກັນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)