GMT+7 26/05/2018 15:02

ຮາວາຍ ຍົກລະດັບເຕືອນໄພພູເຂົາໄຟຄິລາເວ ເປັນຂັ້ນສູງສຸດ

 

 

ທາງການລັດຮາວາຍຂອງສະຫະລັດຍົກລະດັບການເຕືອນໄພພູເຂົາໄຟ’ຄິລາເວ”ເປັນສີແດງ ເຊິ່ງເປັນຂັ້ນສູງສຸດຫລັງຍັງບໍ່ມີແນວໂນ້ມທີ່ພູເຂົາໄຟຈະຫລຸດລະດັບຂອງການປະທຸລົງ ໃນຂະນະທີ່ສະພາບອາກາດໃນເຂດຮອບພູ ເຂົາໄຟຮຸນແຮງເຖິງຂັ້ນຫາຍໃຈບໍ່ໄດ້

ສຳນັກຂ່າວຕ່າງປະເທດລາຍງານຈາກເມືອງໂຮໂນລູລູ ປະເທດສະຫະລັດອາເມລິກາເມື່ອວັນທີ 15ພຶດສະພາວ່າ: ສຳນັກງານສັງເກດການພູເຂົາໄຟຮາວາຍ ແລະ ສຳນັກງານປ້ອງກັນໄພພົນລະເຮືອນເຂດຮາວາຍອອກຖະແຫລງການ ເມື່ອວັນອັງຄານ ຍົກລະດັບການເຕືອນໄພສະຖານະການຂອງພູເຂົາໄຟຄິລາເວສີສົ້ມ ເປັນສີແດງ ເຊິ່ງເປັນລະດັບສູງສຸດ ໂດຍເຕືອນວ່າຄຸນນະພາບອາກາດໃນເຂດລານີປູນາ ກາເດັນ ແລະ ພື້ນທີ່ໃກ້ຄຽງລວມເຖິງເຂດປາລາຮາເຊິ່ງຢູ່ ຫ່າງຈາກປາກປ່ອງພູເຂົາໄຟຄິລາເວພຽງ 29ກິໂລແມັດ ຮຸນແຮງຈົນຢູ່ໃນລະດັບທີ່ບໍ່ສາມາດຫາຍໃຈໄດ້ ອັນເນື່ອງມາຈາກແກັສພິດ ແລະ ເຖົ້າຖ່ານທີ່ພຸ່ງອອກມາຈາກປາກປ່ອງຂອງພູເຂົາໄຟ ເຊິ່ງປະທຸຍ່າງຮຸນແຮງຕັ້ງແຕ່ຊ່ວງຕົ້ນ ເດືອນນີ້ ແລະ ກຸ່ມຄວັນ ແລະ ເຖົ້າຖ່ານຈາກພູເຂົາໄຟລອຍຂື້ນສູງຈາກປາກປ່ອງໄປໄກກວ່າ 3,600ແມັດ

ດ້ານລາຍງານຂອງສຳນັກງານສຳຫລວດທໍລະນີວິທະຍາສະຫະລັດ ລະບຸວ່າ: ການເຕືອນໄພທາງອາກາດລະດັບສີແດງຫມາຍຄວາມວ່າກຸ່ມຄວັນຈາກພູເຂົາໄຟຈະສົ່ງຜົນຕໍ່ເສັ້ນທາງສັນຈອນທາງອາກາດນຳ ຂະນະທີ່ມີການພົບຮອຍແຍກແລ້ວເກືອບ 20ແຫ່ງ ເຊິ່ງຍັງຄົງມີລາວາໄຫລທະລັກອອກມາຍ່າງຕໍ່ເນື່ອງ ສ້າງຄວາມເສຍຫາຍໃຫ້ກັບບ້ານເຮືອນ ແລະ ສິ່ງປຸກສ້າງແລ້ວເກືອບ 40ແຫ່ງ ເຄາະດີທີ່ຍັງບໍ່ມີລາຍງານການພົບຜູ້ເສຍຊີວິດ ແລະ ໄດ້ຮັບບາດເຈັບ

ທັງນີ້ການທີ່ສະຖານະການການປະທຸຂອງພູເຂົາໄຟຄິລາເວຍັງບໍ່ມີແນວໂນ້ມສະຫງົບລົງງ່າຍ ສ້າງຄວາມວິຕົກກັງວົນໃຫ້ກັບຫລາຍຝ່າຍອາດກາຍເປັນການລະເບີດຄັ້ງໃຫຍ່ດັ່ງເຊັ່ນທີ່ເຄີຍເກີດຂື້ນເມື່ອປີ 2467 ເຊິ່ງມີກຸ່ມຄວັນ ແລະ ເຖົ້າຖ່ານລອຍຂື້ນສູ່ອາກາດສູງເຖິງ 6,100ແມັດ ແລະ ພົ່ນເສດຫີນກະເດັນໄປໄກເກືອບ 20ກິໂລແມັດ

 

 

 

ຂໍ້ມູນຈາກ: ເດລິນີວ

 

ຄວາມຄິດເຫັນຂອງຜູ້ອ່ານ (0)