GMT+7 26/05/2018 14:49

ສຳເລັດຊຸດອົບຮົມວຽກງານຊາວໜຸ່ມ-ເຍົາວະຊົນ ທົ່ວແຂວງຄຳມ່ວນ

 

 

​ເມື່ອ​ບໍ່​ດົນ​ມາ​ນີ້, ​ແຂວງ​ຄຳ​ມ່ວນ ​ໄດ້​ສຳ​ເລັດ​ຊຸດອົບຮົມ ວຽກງານຊາວໜຸ່ມ-ເຍົາວະຊົນ ທົ່ວແຂວງ ພາຍໃຕ້ການເປັນປະທານ ຂອງ ທ່ານ ແກ້ວອຸດອນ ບຸດສິງຂອນ ເລຂາຄະນະບໍລິຫານງານ ຊາວໜຸ່ມແຂວງ, ມີຄະນະປະຈຳ ຄະນະບໍລິຫານງານ ຊາວໜຸ່ມແຂວງ, ຫົວໜ້າຂະແໜງ-ຮອງຂະແໜງ ພາຍໃນຫ້ອງການ ຊາວໜຸ່ມແຂວງ, ພ້ອມດ້ວຍຕາງໜ້າພະນັກງານ ຊາວໜຸ່ມຈາກ 10 ຕົວເມືອງ ເຂົ້າຮ່ວມ, ທັງ​ນີ້ ກໍເພື່ອເປັນການປັບປຸງ, ຍົກສູງບົດບາດການຊີ້ນຳໆພາ  ຂອງຄະນະຊາວໜຸ່ມຂັ້ນເມືອງ ຕໍ່ກັບວຽກງານຊາວໜຸ່ມ-ເຍົາວະຊົນ ທົ່ວເມືອງ ກໍຄື ບັນດາວຽກງານຕ່າງໆ ຢູ່ຂັ້ນເມືອງໃຫ້ສູງຂຶ້ນ ແລະ ເພື່ອເປັນການແລກປ່ຽນ ຖອດຖອນບົດຮຽນເຊິ່ງກັນ ແລະ ກັນ  ລະຫວ່າງ ການຈັດຕັ້ງຊາວໜຸ່ມຂັ້ນແຂວງ ກັບການຈັດ ຕັ້ງຊາວໜຸ່ມຂັ້ນເມືອງ  ໃນການເຄື່ອນໄຫວວຽກງານ ຊາວໜຸ່ມ-ເຍົາວະຊົນ  ແນ່ໃສ່ ປັບປຸງການຈັດຕັ້ງແບບ ແຜນວິທີເຮັດວຽກ ໃຫ້ມີປະສິດທິ ພາບ ແລະ ປະສິດທິຜົນ.

ຊຸດ​ອົບຮົມ​ຄັ້ງ​ນີ້, ຜູ້​ເຂົ້າ​ຮ່ວມ​ໄດ້ ຮຽນຮູ້ກ່ຽວກັບ ໜ້າວຽກທີ່ກ່ຽວພັນກັບບັນດາຂະແໜງ, ໜ່ວຍງານຕ່າງໆ  ເພື່ອໃຫ້ມີຄວາມຮັບຮູ້ ແລະ ເຂົ້າໃຈ ຕໍ່ກັບພາລະບົດບາດ, ສິດ, ໜ້າທີ່ ຄວາມຮັບຜິດຊອບ ຂອງວຽກງານ ຕໍ່ກັບບັນດາ ໜ້າວຽກໃນຕໍ່ໜ້າ  ໃຫ້ໄດ້ຮັບປະກັນທັງປະລິມານ ແລະ ຄຸນນະພາບ.

ໂອກາດ​ນີ້, ທ່ານ ແກ້ວອຸດອນ ບຸດສິງຂອນ ໄດ້ໂອ້ລົມ ​ແລະ ຊີ້​ນຳ​ ໃຫ້ສຳມະນາກອນທີ່​ເຂົ້າ​ຮ່ວມ​ອົບຮົມ​ຄັ້ງ​ນີ້​ວ່າ:  ເມື່ອຈົບບັ້ນຝຶກອົບຮົມນີ້ແລ້ວ ຕ້ອງໄດ້ພ້ອມກັນ ເປັນເຈົ້າການ ໃນການຈັດຕັ້ງ ປະຕິບັດໜ້າທີ່ວຽກງານ ໃຫ້ໄດ້ຮັບຜົນສໍາ ເລັດສູງ, ພ້ອມກັນພັດທະນາວຽກງານ ຊາວໜຸ່ມ-ເຍົາວະຊົນ ໃຫ້ມີການເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ ໃຫ້ສົມກັບພັກໄດ້ຂະໜານນາມ ຊາວໜຸ່ມວ່າ: ຊາວໜຸ່ມ ເປັນແຂນຂວາຂອງພັກ ເປັນກະດູກສັນຫລັງຂອງຊາດ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)