GMT+7 26/05/2018 14:47

ຂະຫຍາຍເວລາກໍ່ສ້າງ ເສັ້ນທາງຕານມີໄຊ – ສາມແຍກສີເກີດໄປອີກ 1 ປີ ຫລັງຄວາມຄືບຫນ້າຊັກຊ້າ

 

 

ໂຄງການກໍ່ສ້າງເສັ້ນທາງແຕ່ 4 ແຍກຕານມີໄຊ – ສາມແຍກສີເກີດທີ່ເລີ່ມລົງມືກໍ່ສ້າງມາແຕ່ຕົ້ນປີ 2016 ຕາມກໍານົດແມ່ນຈະໃຫ້ສໍາເລັດໃນທ້າຍຕຸລາ 2018 ນີ້, ແຕ່ປັດຈຸບັນໂຄງການດັ່ງກ່າວຄືບໜ້າພຽງແຕ່ 40%-45% ເທົ່ານັ້ນ ເນື່ອງຈາກສະພາບການໄກ່ເກ່ຍສີ່ງກີດຂວາງທີ່ຫຼ້າຊ້າໄດ້ພຽງແຕ່ 90% ຂອງທັງໝົດ, ສະພາບການເງິນຂອງບໍລິສັດຮັບເໝົາກໍ່ສ້າງ ແລະ ອຶ່ນໆ ທີ່ຍັງເປັນອຸປະສັກຕໍ່ການກໍ່ສ້າງໃນຄັ້ງນີ້.

ທ່ານ ຫຸມພັນ ດວງ​ພະ​ເດດ ຫົວໜ້າໂຄງການກໍ່ສ້າງເສັ້ນທາງ ຕານມີໄຊ – ສາມແຍກສີເກີດກ່າວ​ວ່າ: ​ໂຄ​ງການ​ກໍ່ສ້າງ​ທາງ​ເບ​ຕົງ​ເສີມ​ເຫຼັກ​ແຕ່ ສີ່​ແຍກ​ໄຟ​ແດງ​ຕານ​ມີ​ໄຊ – ສາມ​ແຍກ​ສີ​ເກີດ ລວມມີ​ໄລຍະ​ທາງ​ກໍ່ສ້າງຍາວ​ທັງໝົດ 9,37 ກິ​ໂລ​ແມັດໃນມູນຄ່າການກໍ່ສ້າງ 45 ກວ່າລ້ານໂດລາສະຫະລັດ ຫຼື ປະມານເກືອບ 370 ຕື້ກີບ ສາມາດຮອງຮັບນ້ຳໜັກໄດ້ 13 ໂຕນຕໍ່ເພົາ ເພື່ອໃຫ້ເປັນເສັ້ນທາງຍຸດທະສາດໃນການຂົນສົ່ງສິນຄ້າອອກສູ່ພາກເໜືອ ແລະ ພາກໃຕ້ຂອງລາວ ແລະ ເຊື່ອມຈອດກັບຈີນ, ຫວຽດນາມ ແລະ ໄທ.

ຕະຫຼອດເວລາ 2 ປີຜ່ານມາການກໍ່ສ້າງດັ່ງກ່າວແມ່ນບໍ່ເປັນໄປຕາມແຜນການກຳນົດ ເນື່ອງຈາກເສັ້ນທາງແມ່ນມີຄວາມກວ້າງ ແລະ ກະທົບເຮືອນຊານຂອງປະຊາຊົນເປັນຈຳນວນຫຼາຍ ເພາະເປັນເຂດຊຸມຊົນມີບ້ານເຮືອນຈຳນວນຫຼາຍ ຈິ່ງເຮັດໃຫ້ວຽກງານໄກ່ເກ່ຍສີ່ງອຳນວຍຄວາມສະດວກຕາມສອງຂອກທາງມີຄວາມຫຼ້າຊ້າບໍ່ສາມາດເດີນການກໍ່ສ້າງໄດ້ເຕັມສູບເຊັ່ນ: ເປັນເຂດ​ຊຸມ​ຊົນ​ບໍ່​ມີ​ພື້ນ​ທີ່​ກໍ່ສ້າງ​ທາງ​ເວັ້ນຊົ່ວຄາວເຮັດ​ໃຫ້ການ​ສັນຈອນ​ໄປມາ​ແອ​ອັດ ​ໂດຍ​ສະ​ເພາະ​ແມ່ນ​ລົດ​ບັນທຸໜັກທີ່​ມີ​ຈຳນວນຫຼວງຫຼາຍ​​ນຳ​ໃຊ້​ເສັ້ນທາງ​ຜ່ານ​ໂຄງການ ​ເຊິ່ງ​ເປັນ​ອຸປະສັກ​ໃນ​ການ​ດຳ​ເນີນ​ກໍ່ສ້າງ, ຈຸດ​ລະບາຍ​ນໍ້າ​ອອກ​ຂອງ​ໂຄງການ​ບໍ່ມີ ​ເນື່ອງ​ຈາກຜ່ານ​ເຂດ​ຊຸມ​ຊົນ​ມີ​ການ​ພັດທະນາ​ຢ່າງ​ວ່ອງ​ໄວ​ ຮ່ອງ​ທຳ​ມະ​ຊາດ​ບາງ​ຈຸດ​ກໍ່​ອອກ​ໃບ​ຕາດິນ​ກວມ ​ແລະ ຖົມ​ເປັນ​ບ່ອນຢູ່​ອາ​ໄສ ບາງ​ຈຸດ​ຜູ້​ຄອບ​ຄອງ​ບໍ່​ອະນຸຍາດ​ໃຫ້​ຈັດ​ຕັ້ງປະຕິບັດ ຈິ່ງໄດ້ຂໍອຳນາດການປົກຄອງພາກລັດເຂົ້າມາຊ່ວຍໄກ່ເກ່ຍອີກຮອບ.ໂຄງການ​ກໍ່ສ້າງ​ທາງ​ເບ​ຕົງ​ເສີມ​ເຫຼັກ​ແຕ່ 4 ​ແຍກ​ຕານ​ມີ​ໄຊ -ສາມແຍກ​ສີ​ເກີດ ລວມມີ​ໄລຍະ​ທາງ​ການ​ກໍ່ສ້າງ​ທັງໝົດ ​ 9,37 ກິໂລແມັດມູນຄ່າກໍ່ສ້າງ 45 ກວ່າລ້ານໂດລາສະຫະລັດ ​ເຊິ່ງ​ແມ່ນ​ກຸ່ມ​ບໍລິສັດ ຕັ້ງ​ຈະ​ເລີ​ນ ຈຳກັດ ​ເປັນ​ຜູ້​ລົງທຶນ​ກໍ່ສ້າງ​ກ່ອນ 100% ມີ​ໄລຍະ​ເວລາ​ການ​ກໍ່ສ້າງ​ທັງໝົດ 24 ​ເດືອນ ​ເລີ່​ມ​ແຕ່​ວັນ​ທີ 1 ຕຸລາ 2016 ​ເຖິງວັນ​ທີ 30 ຕຸລາ 2018 ໂດຍ​ເຈົ້າ​ຂອງ​ໂຄງການ​ແມ່ນພະ​ແນ​ກ​ໂຍທາ​ທິການ ​ແລະ ຂົນ​ສົ່ງ, ນະຄອນຫຼວງວຽງຈັນ, ບໍລິສັດ​ທີ່​ປຶກສາ​ໂຄງການ​ແມ່ນ ບໍລິສັດວາລິ​ນ ສຳຫຼວດອອກ​ແບບ ​ກໍ່ສ້າງ ແລະ ທີ​ປຶ​ກສາຈຳກັດ ມາເຖິງປັດຈຸບັນໂຄງການດັ່ງກ່າວຄືບໜ້າຫຼາຍສຸດພຽງແຕ່ 45% ເທົ່ານັ້ນຈິ່ງໄດ້ມີການຕໍ່ເວລາການກໍ່ສ້າງອອກໄປອີກ 1 ປີ ຈິ່ງຂໍຄວາມຮ່ວມມືກັບຫຼາຍພາກສ່ວນໂດຍສະເພາະຜູ້ໃຊ້ລົດ, ໃຊ້ຖະໜົນຜ່ານເສັ້ນທາງນີ້ຈົ່ງມີສະຕິ ລະມັດລະວັງໃນການໄປມາ ທ່ານ ຫົວໜ້າໂຄງການກ່າວ.

 

 

 

 

ຂໍ້ມູນຈາກ: ລາວອັບເດດ

ຄວາມຄິດເຫັນຂອງຜູ້ອ່ານ (0)