GMT+7 26/05/2018 15:04

“ມະຫາເຣ”ເລີ່ມມາດຕະການເອົາຜິດກັບ”ນາຈິບ” ຄະດີຄໍລັບຊັ່ນ

 

 

ດຣ.ມະຫາເຣ ໂມຮຳເຫມັດ ນາຍົກລັດຖະມົນຕີມາເລເຊຍ ເລີ່ມຂະບວນການເອົາຜິດຕາມກົດຫມາຍຕໍ່ລັດຖະບານຊຸດທີ່ຜ່ານມາຂອງທ່ານນາຈິບ ຣາຊັດ ໃນຄະດີທຸຈະລິດກອງທຶນພັດທະນາແຫ່ງຊາດ ດ້ວຍການສັ່ງພະນັກງານຜູ້ທີ່ໃຫ້ການ ຊ່ວຍເຫລືອທ່ານນາຈິບ ແລະ ສັ່ງລວມລວມເອກະສານທັງຫມົດທີ່ຈັດເຮັດຂື້ນໂດຍລັດຖະບານຊຸດທີ່ແລ້ວ

ສຳນັກຂ່າວຕ່າງປະເທດລາຍງານຈາກກຸງກຸລາລຳເປີ ປະເທດມາເລເຊຍເມື່ອວັນທີ 15ພຶດສະພາວ່າ: ນາຍົກລັດຖະມົນຕີ ດຣ.ມະຫາເຣ ໂມຮຳເຫມັດ ກ່າວເມື່ອວັນຈັນທີ່ເປັນມື້ເຮັດວຽກຍ່າງເປັນທາງການຂອງຜູ້ນຳມາເລເຊຍ ອາຍຸ 92ປີ ເຊິ່ງເຄີຍດຳລົງຕຳແຫນ່ງນາຍົກລັດຖະມົນຕີຍາວນານລະຫວ່າງປີ 2523-2546 ວ່າລັດຖະບານຊຸດກ່ອນຫນ້ານີ້ກະທຳບໍ່ຊອບມາພາກົນໄວ້ຫລາຍຍ່າງ ເຊິ່ງລັດຖະບານຊຸດປະຈຸບັນພາຍໃຕ້ການນຳຂອງເຂົາຈະຮື້ຟື້ນການສອບສວນ ຄະດີຄວາມ ແລະ ກວດສອບຂໍ້ຫາທັງຫມົດທີ່ກ່ຽວຂ້ອງກັບລັດຖະບານຊຸດທີ່ຜ່ານມາ ໂດຍດຣ.ມະຫາເຣ ຂໍໃຫ້ທຸກຝ່າຍອົດທົນຖ້າ ເນື່ອງຈາກທຸກກໍລະນີຕ້ອງເປັນໄປຕາມຂະບວນການ ທີ່ບໍ່ອາດຈັດການໃຫ້ແລ້ວໄດ້ພາຍໃນມື້ດຽວ

ຂະນະດຽວກັນ ດຣ.ມະຫາເຣກ່າວເຖິງທ່ານໂມຮຳເຫມັດ ອາປັນດີ-ອາລີວ່າ: ເຂົາໄດ້ສັ່ງໃຫ້ເຈົ້າຫນ້າທີ່ປະຈຳກະຊວງຍຸດຕິທຳຄົນນີ້ລາພັກຮ້ອນຍ່າງບໍ່ມີກຳນົດ ຫລັງປົດອອກຈາກຕຳແຫນ່ງໄອຍະການສູງສຸດເມື່ອອາທິດທີ່ຜ່ານມາ ເນື່ອງຈາກເຂົາໄດ້ຮັບການຮ້ອງຮຽນຈາກຫລາຍຝ່າຍກ່ຽວກັບການປະຕິບັດງານຂອງທ່ານໂມຮຳເຫມັດ ທີ່ມີຕໍ່ການສືບສວນສອບສວນຄະດີທຸຈະລິດໃນກອງທຶນພັດທະນາແຫ່ງຊາດ ວັນເອັມດີບີ ໂດຍໃນລະຫວ່າງນີ້ຮອງໄອຍະການສູງສຸດ ຈະປະຕິບັດຫນ້າທີ່ໃນຕຳແຫນ່ງໄອຍະການສູງສຸດໄປກ່ອນ

ທັງນີ້ລາຍງານໂດຍສຳນັກງານສອຍສວນກາງ (ເອັບບີໄອ) ຂອງສະຫະລັດລະບຸວ່າ: ມີການຍັກຍອກເງິນ 4,500ລ້ານໂດລາສະຫະລັດ ອອກຈາກວັນເອັມດີບີເຊິ່ງກໍ່ຕັ້ງເມື່ອປີ 2552 ໂດຍໃນຈຳນວນນີ້ 681ລ້ານໂດລາສະຫະລັດ ຖືກກໂອນເຂົ້າບັນຊີເງິນຟາກສ່ວນຕົວຂອງອະດີດນາຍົກລັດຖະມົນຕີນາຈິບ ຣາຊັດ ພຽງບໍ່ເທົ່າໃດເດືອນກ່ອນການເລືອກຕັ້ງທົ່ວໄປ ເມື່ອປີ 2556 ທີ່ທ່ານນາຈິບຊະນະແນວຮ່ວມຝ່າຍຄ້ານພາຍໃຕ້ການນຳຂອງທ່ານ ອັນວາ ອິບຣາຮິມ ແຕ່ທ່ານໂມຮຳເຫມັດກ່າວເປັນເງິນທີ່ລາຊະວົງຊຸອຸດິອາລາເບຍພະຣາຊະທານໃຫ້ແກ່ທ່ານນາຈິບ ເປັນການສ່ວນພະອົງ ແລະ ສັ່ງປິດຄະດີທັນທີ

ໃນອີກດ້ານນື່ງ ນັກວິເຄາະບາງສ່ວນຍັງຄົງມີຄວາມກັງວົນຕໍ່ນະໂຍບາຍເສດຖະກິດຂອງລັດຖະບນມະຫາເຣ ທີ່ເຖິງແມ່ນວ່າຍັງບໍ່ຊັດເຈນຫລາຍ ແຕ່ດຣ.ມະຫາເຣເຄີຍກ່າວເຖິງການກວດສອບຂໍ້ຕົກລົງການລົງທຶນຫລາຍສະບັບ ລະຫວ່າງລັດຖະບານຊຸດທີ່ຜ່ານມາກັບຈີນ ການກຽມຍົກເລີກພາສີສິນຄ້າ ແລະ ບໍລິການ (ຈີເອສທີ) ແລະ ການຄືນຊີບມາດຕະການອຸດຫນູນເຊື້ອເພີງ ສົ່ງຜົນໃຫ້ຕະຫລາດຫຸ້ນກົວລາລຳເປີຜັນຜວນຍ່າງຫນັກໃນຊ່ວງເຄີ່ງທຳອິດຂອງວັນ ຈັນ ແຕ່ປັບໂຕມາຢູ່ໃນແດນບວກໄດ້ໃນຊ່ວງປິດຕະຫລາດ ດ້ານເງິນີຣິງກິດອ່ອນຄ່າສຸດໃນຮອບ 4ເດືອນຢູ່ທີ່ 3,9850/1.0ໂດລາສະຫະລັດ ແຕ່ຜູ້ຊ່ຽວຊານເບິ່ງວ່າຍັງຢູ່ໃນລະດັບປົກກະຕິ ເພາະລາຄາຍັງບໍ່ຕ່າງຈາກຍຸກຂອງທ່ານນາຈິບ ຫລາຍປານໃດ

 

 

 

 

 

ຂໍ້ມູນຈາກ: ເດລິນີວ

ຄວາມຄິດເຫັນຂອງຜູ້ອ່ານ (0)