GMT+7 26/05/2018 14:43

ກວດພົບນ້ຳມັນເຄື່ອງຮອນດາ ແລະ ຄູໂບຕາປອມແປງລິຂະສິດຈຳນວນຫຼາຍຢູ່ແຂວງຈຳປາສັກ

 

 

ໃນວັນທີ 8 ພຶດສະພາ 2018 ຂະແໜງການພາກລັດຂອງແຂວງຈຳປາສັກ ແລະ ພາກສ່ວນບໍລິສັດເຈົ້າຂອງລິຂະສິດ ໄດ້ລົງກວດກາຕາມຮ້ານຂາຍເຄື່ອງອາໄຫຼ່,ອູ່ສ້ອມແປງລົດຢູ່ໃນເຂດເມືອງປາກຊ່ອງ ເຊິ່ງໄດ້ພົບເຫັນນ້ຳມັນເຄື່ອງ ຮອນດາ ແລະ ນ້ຳມັນເຄື່ອງຄູໂບຕາ ປອມແປງລິຂະສິດວາງຈຳໜ່າຍເປັນຈຳນວນຫຼາຍ ຂະນະທີ່ບໍລິສັດຜູ້ຜະລິດໄດ້ອອກມາເຕືອນເຖິງຜົນຮ້າຍໃນການໃຊ້ນ້ຳມັນເຄື່ອງປອມຈະມີຜົນເສຍຮ້າຍແຮງຕໍ່ເຄື່ອງຈັກ.

ທ່ານ ນາງ ດາວວຽງນະຄອນ ເດດສີດາຈັນ ທີ່ປຶກສາທາງດ້ານກົດໝາຍຂອງບໍລິສັດຮອນດາ ແລະ ບໍລິສັດຄູໂບຕາໃຫ້ສຳພາດວ່າ: ປີ 2017 ຜ່ານມາເຈົ້າໜ້າທີ່ກ່ຽວຂ້ອງຂອງແຂວງຈຳປາສັກ ສົມທົບກັບບໍລິສັດຄູໂບຕາ ແລະ ບໍລິສັດຮອນດາ ກວດພົບນ້ຳມັນເຄື່ອງຄູໂບຕາທີ່ໃຊ້ກັບລົດໄຖນາເດີນຕາມ ແລະ ນ້ຳມັນເຄື່ອງຮອນດາທີ່ໃຊ້ກັບລົດ 4 ຈັງຫວະ, 2 ຈັງຫວະປອມແປງລິຂະສິດຈຳນວນຫຼາຍ. ເພາະສະນັ້ນ, ທາງບໍລິສັດຈຶ່ງໄດ້ສົມທົບກັບພະແນກວິທະຍາ ສາດ ແລະ ເຕັກໂນໂລຊີແຂວງຈຳປາສັກ,ອົງການໄອຍະການປະຊາຊົນແຂວງ, ເຈົ້າໜ້າທີ່ຕຳຫຼວດ ແລະ ພາກສ່ວນທີ່ກ່ຽວຂ້ອງ ລົງກວດກາເພື່ອເກັບຄືນສິນຄ້າປອມແປງລອກຮຽນແບບລິຂະສິດນ້ຳມັນເຄື່ອງຄູໂບຕາ ແລະ ນ້ຳມັນເຄື່ອງຮອນດາ ທີ່ຫຼົງເຫຼືອໃນບັນດາຕົວເມືອງຂອງແຂວງຈຳປາສັກ ໂດຍສະເພາະຢູ່ເມືອງປາກຊ່ອງທ່ີວາງຂາຍຢູ່ຕາມຮ້ານຂາຍເຄື່ອງອາໄຫຼ່, ຮ້ານແປງລົດຈຳນວນ 10 ກວ່າຮ້ານ, ໄດ້ພົບເຫັນນ້ຳມັນເຄື່ອງຄູໂບຕາຈຳນວນ 77 ກະຕຸກ ( ຕຸກລະ 3 ລິດ ), ນ້ຳມັນເຄື່ອງຮອນດາເກືອບ 500 ຕຸກ ( ຕຸກລະ 1 ລິດ ). ເຊິ່ງເຈົ້າໜ້າທີ່ໄດ້ກັກຍຶດໄວ້ເພື່ອນຳໄປທຳລາຍຖິ້ມ.

ດັ່ງນັ້ນຈຶ່ງຂໍຝາກເຖິງຜູ້ບໍລິໂພກຕ້ອງລະວັງໃນການຊົມໃຊ້ເພາະນ້ຳ ມັນເຄື່ອງປອມເຊິ່ງເປັນນ້ຳມັນທີ່ບໍ່ໄດ້ຜ່ານການຜະລິດຈາກໂຮງງານ,ບໍ່ໄດ້ຮັບການຢັ້ງຢືນຄຸນນະພາບ. ຖ້າເຮົາເອົາໄປນຳໃຊ້ມັນຈະນຳຜົນເສຍຫາຍມາສູ່ເຄື່ອງ ຈັກເຊັ່ນ: ເຄື່ອງຈັກທຳມະດາມີອາຍຸການນຳໃຊ້ 10 ປີ ກໍ່ຈະຍັງເຫຼືອ 1-3 ປີ. ທີ່ສໍາຄັນມັນເຮັດໃຫ້ບໍລິສັດຜູ້ຜະລິດທີ່ໄດ້ຈົດທະບຽນລິຂະສິດຢ່າງຖືກຕ້ອງທາງດ້ານກົດໝາຍໄດ້ຮັບຄວາມເສຍຫາຍເປັນມູນຄ່າສູງ.

ໜ່ວຍງານທີ່ກ່ຽວຂ້ອງຂອງພະແນກວິທະຍາສາດ ແລະ ເຕັກໂນໂລຢີແຂວງຈຳປາສັກເປີດເຜີຍຕື່ມວ່າ: ສຳລັບສິນຄ້າປອມແປງລອກຮຽນແບບເຄື່ອງໝາຍການຄ້າດັ່ງກ່າວ ທາງເຈົ້າໜ້າທີ່ໆກ່ຽວຂ້ອງຈະໄດ້ກັກຢຶດໄວ້ເພື່ອນຳໄປ ທຳລາຍຖິ້ມ, ພ້ອມທັງສຶກສາອົບຮົມ,ກ່າວເຕືອນ ແລະ ເຮັດບົດບັນທຶກກັບຜູ້ທີ່ມີໄວ້ຈຳໜ່າຍ ເຊິ່ງຖ້າພົບເຫັນອີກຄັ້ງໜ້າແມ່ນຈະໄດ້ດຳເນີນຕາມລະບຽບກົດໝາຍ. ສຳລັບວິທີສັງເກດເບື້ອງຕົ້ນນ້ຳມັນເຄື່ອຂອງແທ້ຂອງຄູໂບຕາ ແລະ ຮອນດາ ເຄື່ອງໝາຍການຄ້າຂອງສິນຄ້າຈະມີລັກສະນະກົມກືນກັບກະຕຸກ, ກາຂອງຜະລິດຕະພັນຈະຊັດເຈນ,ການຫຸ້ມຫໍ່ໄດ້ມາດດຕະຖານ ແລະ ມີບາໂຄດຕິດໃນກະຕຸກຢ່າງຊັດເຈນ, ເຊິ່ງທ່ານໃດຫາກສົນໃຈຂໍ້ມູນເພີ່ມຕື່ມ ກໍ່ສາມາດເຂົ້າມາສອບຖາມລາຍລະອຽດໄດ້ທີ່ພະແນກວິທະຍາສາດ ແລະ ເຕັກໂນໂລຍີແຂວງຈຳປາສັກ.

 

 

ຂໍ້ມູນຈາກ: ລາວອັບເດດ

 

ຄວາມຄິດເຫັນຂອງຜູ້ອ່ານ (0)