GMT+7 26/05/2018 15:08

ຫລາຍພາກສ່ວນມອບເຄື່ອງຊ່ວຍເຫລືອ ບ້ານສັນແຟນ ທີ່ຖືກໄຟໄໝ້

 

 

ວັນ​ທີ 12 ພຶດສະພາ 2018 ຜ່ານ​ມາ, ທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ, ເຈົ້າແຂວງໆ ຊຽງຂວາງ, ມີຄະນະອາດີດການ ນຳຈາກນະຄອນຫລວງວຽງຈັນ, ອົງການພຸດທະສາສະໜາສຳພັນລາວ  ຢູ່ສູນກາງ ແລະ  ຂັ້ນແຂວງ, ມີ​ບັນດາບໍລິສັດ, ທະນາຄານ ແລະ ພາກສ່ວນ ອື່ນໆຈຳນວນ​ໜຶ່ງ  ​ໄດ້​ນຳ​ເອົາ​ເຄື່ອງ​ຊ່ວຍ​ເຫລືອ  ​ໄປ​ມອບ​ໃຫ້​ປະຊາຊົນ ບ້ານສັນແຟນ  ກຸ່ມນ້ຳລ້ຽງ ເມືອງຄຳແຂວງຊຽງຂວາງ  ທີ່ຖືກໄຟໄໝ້ບ້ານ ໃນວັນທີ 7 ພຶດສະພາ  ຜ່ານມາ ​ເຊິ່ງບ້ານດັ່ງກ່າວ ມີ 44 ຫລັງຄາເຮືອນ,  ມີພົນລະເມືອງທັງໝົດ 324 ຄົນ ຍິງ138 ຄົນ,  ​ໃນ​ນັ້ນໄຟໄໝ້ເຮືອນໝົດກ້ຽງ 32 ຫລັງ,  ໄໝ້ເລັກນ້ອຍ ແລະ ເປ່ເພມີຈຳນວນໜຶ່ງ  ມີຄົນເຈັບ 2 ຄົນ, ເຂົ້າ​ເສຍ​ຫານ 8.240 ກິໂລກຣາມ,  ລວມມູນຄ່າ ເສຍຫາຍ 1 ຕື້ກ່ວາກີບ.

ພາກສ່ວນ​ຕ່າງໆ ​ທີ່​ໃຫ້ການ​ຊ່ວຍ​ເຫລືອ​ຄັ້ງ​ນີ້ ປະກອບ​ມີ:  ທ່ານ ຄຳ​ແກ້ວ ສານ​ບຸນຄຸນ​ໄຊ ຮອງ​ລັດຖະມົນຕີ  ກະຊວງ ຮສສ ຕາງໜ້າ ກົມ​ສັງຄົມ​ສົ່ງ​ເຄາະ​ ກະຊວງ​ແຮງ​ງານ  ​ແລະ ສະຫວັດດີ​ດານ​ສັງຄົມ ມອບເຄື່ອງ​ຄົວ 32 ຊຸດ  ພ້ອມ​ເງິນສົດ 90 ລ້ານ​ກວ່າ​ກີບ,  ອົງການພຸດທະສາສະໜາສຳພັນລາວ,  ມູນນິທິຊ່ວຍເຫລືອຄົນທຸກຍາກ ສາຂານະຄອນຫລວງວຽງຈັນ ໄດ້ຊ່ວຍສັງກະສີ  1.600 ແຜ່ນ, ໄມ້ແປຮູບ12 ແມັດ ກ້ອນ ແລະ ເຄື່ອງນຸ່ມຫົ່ມ ລວມມູນຄ່າ  86 ລ້ານກວ່າກີບ; ໂທລະໂຄ່ງ,  ປະກາດ, ເດີຟຣີແລນ, ທະນາຄານການຄ້າ,  ລາວໂທລະຄົມ, ຢູນາ, ມູນນິທິຮ່ວມໃຈ ໜ່ວຍກູ້ຊີບອົງການກາແດງ,  ສະມາຄົມອາສາກູ້ໄພນະຄອນຫລວງ,  ໜ່ວຍກູ້ໄພ ມູນນິທິຈີນ, ໜ່ວຍກູ້ໄພແຂວງ ສະຫວັນນະເຂດ ​ໄດ້ມອບສັງກະສີ 1.000  ແຜ່ນ, ໄມ້ 10 ແມັດກ້ອນ ແລະເຄື່ອງນຸ່ງຫົ່ມ  ລວມມູນຄ່າ 75 ລ້ານກີບ; ທ່ານນາງ  ບຸນເພັງ ມູນໂພໄຊ ຊ່ວຍໄມ້ແປຮູບ 10 ແມັດກ້ອນ  ແລະ ເງິນສົດຈຳນວນໜຶ່ງ; 

ທ່ານແກ້ວພູວົງ  ເຈົ້າຂອງປ່ຳນ້ຳ ມັນຫລັກ 20 ຊ່ວຍໄມ້  1 ແມັດກ້ອນ, ທ່ານ ອຸ່ນນາກ ຜ້າຫົ່ມ 40 ຜືນ,  ທ່ານ ຜັນ ມະນີກອງ ຜ້າຫົ່ມ 13 ຜືນ  ແລະໄມ້ 1 ແມັດກ້ອນ; ຄອບຄົວບັນດາ ທ່ານ ຈັນສະໝອນ, ບຸນມີ, ເກດຕິສັກ,  ສີວອນ, ນ້ອຍຄຳສົນ, ກໍລະກັນ, ຮົ່ວ,  ຕຸ້ຍ, ຕູ້ຍປະກອນ, ບຸນຄົງ ຊ່ວຍເຂົ້າສານໜຽວ  960 ກິໂລກຣາມ, ແປ້ງນົວ 64ຖົງ, ເກືອ  64 ຖົງ, ປ່ອງປາ 32 ແພັກ, ເງິນສົດ  3.200.000 ກີບ ລວມ 9.920.000 ກີບ;  ວັດສັນຕິພາບ+ວັດບ້ານ ຢອນ  ຊ່ວຍເຄື່ອງນຸ່ງຫົ່ມ ມູນຄ່າ 4 ລ້ານກວ່າກີບ,  ລວມພະນັກງານໂຄລາວແຄຣຊຽງຂວາງ  ຊ່ວຍເຄື່ອງຢູ່ກິນ ແລະ ນຸ່ງຫົ່ມມູນຄ່າ 2  ລ້ານກກວ່າກີບ ແລະ ທະນາຄານລາວ-ຫວຽດສາຂາແຂວງຊຽງຂວາງ   ຊ່ວຍເຫລືອເງິນສົດ  ແລະ ວັດຖຸມູນຄ່າ 10.000.000 ກີບ.

​ໂອກາດ​ນີ້, ທ່ານເຈົ້າແຂວງໆ ຊຽງຂວາງ ກໍໄດ້ໂອ້ລົມຕໍ່ພໍ່ແມ່ປະຊາຊົນ ພາຍໃນບ້ານດັ່ງກ່າວ ໃຫ້ທຸ່ນທ່ຽງ ຖືເປັນບົດຮຽນອັນສຳຄັນ,  ຕັ້ງໃຈສ້າງສາພັດທະນາຄອບຄົວກະກຽມສ້າງເຮືອນບ່ອນສ້າງ ເຮືອນ ພ້ອມປຶກສາຫາລືກັບຄະນະ ບ້ານກຸ່ມເພື່ອສ້າງເຮືອນໃຫ້ເປັນລະບຽບ,  ພ້ອມ​ທັງສະແດງຄວາມຂອບອົກ​ຂອບ​ໃຈ ​ມາ​ຍັງທຸກພາກສ່ວນທີ່ໃຫ້ການຊ່ວຍເຫລືອເຖິງຈະຢູ່ໄກເສັ້ນທາງລຳບາກ  ກໍມາຮອດມາເຖິງ​ເຊິ່ງມັນ​ໄດ້ ສະແດງໃຫ້ເຫັນວ່າຄົນລາວມີນ້ຳໃຈ​ເອື້​ອ​ເຟື້ອ​ເຜື່ອ​ແຜ່ຊ່ວຍເຫລືອເຊິ່ງກັນ ແລະ ກັນ.   

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)