GMT+7 26/05/2018 15:08

ສັ່ງຫ້າມ”ນາຈິບ ຣາຊັດ” ອະດີດນາຍົກມາເລເຊຍອອກນອກປະເທດ ຂໍ້ກ່າວຫາທຸຈະລິດ

 

 

“ນາຈິບ ຣາຊັດ” ອະດີດນາຍົກລັດຖະມົນຕີມາເລເຊຍ ພ້ອມພັນລະຍາ ຖືກສັ່ງຫ້າມເດີນທາງອອກນອກປະເທດ ຫລັງກຽມເດີນທາງໄປພັກຜ່ອນທີ່ອິນໂດເນເຊຍ ທ່າມກາງຂໍ້ຫາທຸຈະລິດຄໍລັບຊັ່ນ

ທາງຕຳຫລວດກວດຄົນເຂົ້າເມືອງ (ຕມ) ຂອງມາເລເຊຍລະບຸວ່າ: ທ່ານນາຈິບ ຣາຊັດ ແລະ ທ່ານນາງຣອສມາ ມັນຊອດ ພັນລະຍາ ຖືກຂື້ນບັນຊີດຳຫ້າມອອກນອກປະເທດ ເຊິ່ງເປັນການຖະແຫລງຫລັງຈາກຕາຕາລາງຖ້ຽວບິນ ປະກົດຂໍ້ມູນວ່າ ທ່ານນາຈິບ ແລະ ພັນລະຍາ ຈະໃຊ້ຍົນສ່ວນຕົວໄປຍັງກຸງຈາກາຕາຂອງອິນໂດເນເຊຍ ເວລາປະມານ 10:00ນາທີຂອງເຊົ້າວັນເສົາທີ່ຜ່ານມາ

ທ່ານນາຈິບກ່າວວ່າ: ເຄົາລົບຕໍ່ຄຳສັ່ງດັ່ງກ່າວ ໂດຍຕົນ ແລະ ຄອບຄົວຈະຍັງຄົງພັກຜ່ອນໃນມາເລເຊຍ ແລະ ມີລາຍງານວ່າຍົນສ່ວນຕົວຂອງເຂົາຍັງຄົງຈອດຢູ່ທີ່ສະຫນາມບິນສຸບັງຈາຍາ ໃກ້ກັບກຸງກຸລາລຳເປີ

ຂ້ອຍໄດ້ຮັບແຈ້ງຈາກ ຕມ ວ່າບໍ່ອານຸຍາດໃຫ້ຂ້ອຍ ແລະ ຄອບຄົວເດີນທາງໄປຕ່າງປະເທດ ຂ້ອຍເຄົາລົບຄົສັ່ງ ແລະ ຈະຢູ່ກັບຄອບຄົວໃນປະເທດ ທ່ານນາຈິບທະວິດຂໍ້ຄວາມຜ່ານທະວິດເຕີສ່ວນຕົວ

ທັງນີ້ຫລັງຈາກມີກະແສຂ່າວການເດີນທາງອອກນອກມາເລເຊຍຍ່າງກະທັນຫັນ ກອງທັບນັກຂ່າວຫລາຍສິບຄົນເດີນທາງໄປເຝົ້າທ່ານນາຈິບ ພ້ອມກັບປະຊາຊົນຫລາຍສິບຄົນທີ່ເດີນທາງໄປປະທ້ວງປິດລ້ອມລົດສ່ວນຕົວຂອງທ່ານນາຈິບ ແລະ ຄອບຄົວ ບໍ່ໃຫ້ເດີນທາງອອກນອກປະເທດຈົນເກີດເຫດຈາລະຈົນຂື້ນ

ທ່ານນາຈິບ ຣາຊັດ ແພ້ການເລືອກຕັ້ງທົ່ວໄປມາເລເຊຍເມື່ອວັນທີ 9ພຶດສະພາທີ່ຜ່ານມາ ເຮັດໃຫ້ທ່ານມະຫາເຣ ໂມຮໄຫມັດ ອາຍຸ 92ປີ ອະດີດນາຍົກລັດຖະມົນຕີທີ່ຄອງຕຳແຫນ່ງມາດົນເຖິງ 22ປີ ໄດ້ມາເປັນນາຍົກມາເລເຊຍອີກຄັ້ງ

ເຊິ່ງຫາກຈັດຕັ້ງລັດຖະບານໃຫມ່ເປັນທີ່ຮຽບຮ້ອຍ ທ່ານມະຫາເຣໄດ້ປະກາດວ່າ: ກຽມເດີນຫນ້າສອບສວນເລື່ອງອື້ສາວຂອງທ່ານນາຈິບ ທີ່ຖືກກ່າວຫາທຸຈະລິດຄໍລັບຊັ່ນ ຍັກຍອກເງິນຈາກກອງທຶນເພື່ອພັດທະນາເສດຖະກິດແຫ່ງຊາດ ມາເລເຊຍ ຫລື 1ເອັມດີບີ ຂອງລັດ ໄປຫລາຍກວ່າ 700ລ້ານໂດລາສະຫະລັດ ເຮັດໃຫ້ປະເດັນການເດີນທາງອອກນອກປະເທດຖືກຈັບຕາເບິ່ງຈາກທຸກຝ່າຍ

 

 

ຂໍ້ມູນຈາກ: ສະຫນຸກຂ່າວ

 

 

ຄວາມຄິດເຫັນຂອງຜູ້ອ່ານ (0)