GMT+7 26/05/2018 15:12

ທຣຳ ຂອບໃຈເກົາຫລີເຫນືອ ຍືນຍັນຮື້ຖານທົດສອບນິວເຄຍ

 

 

ປະທານາທິບໍດີສະຫະລັດຂອບໃຈເກົາຫລີເຫນືອ ທີ່ເຜີຍກຳນົດການປິດນິຄົມນິວເຄຍໃນປະເທດກ່ອນການພົບກັນທີ່ສິງກະໂປໃນເດືອນຫນ້າ ດ້ານເກົາຫລີເຫນືອໃຕ້ຍົກຍ້ອງເປັນການຮັກສາຄຳຫມັ້ນສັນຍາຂອງທ່ານຄິມ ຈອງອຶນ

ສຳນັກຂ່າວຕ່າງປະເທດລາຍງານຈາກກຸງໂຊລ ປະເທດເກົາຫລີໃຕ້ເມື່ອວັນທີ 13ພຶດສາພະວ່າ: ປະທານາທິບໍດີໂດນັລ ທຣຳ ທະວິດຂໍ້ຄວາມເມື່ອວັນເສົາ ຂອບໃຈ ແລະ ຊື່ນຊົມການສະແດງທ່າທີຍ່າງສະຫງ່າງາມຂອງເກົາຫລີເຫນືອ ເຊິ່ງປະກາດກຳນົດການຮື້ຖອນສິ່ງປຸກສ້າງພາຍໃນນິຄົມນິວເຄຍປຸງກະເຍ-ຣີ ໃນພາກຕາເວັນອອກສຽງເຫນືອຂອງປະເທດລະຫວ່າງວັນທີ 23-25ພຶດສະພານີ້ ປະມານ 2ອາທິດລ່ວງຫນ້າກ່ອນການພົບຫາລືຄັ້ງປະຫວັດສາດລະຫວ່າງ ຜູ້ນຳສະຫະລັດ ກັບທ່ານຄິມ ຈອງອຶນ ຜູ້ນຳສູງສຸດຂອງເກົາຫລີເຫນືອ ໃນວັນທີ 12ມິຖຸນານີ້ທີ່ສິງກະໂປ

ຂະນະທີ່ທຳນຽບປະທານາທິບໍດີເກົາຫລີໃຕ້ ຫລື ຊອງວາແດ ອອກຖະແຫລງການສະແດງຄວາມຊື່ນຊົມການປະກາດແຜນການຂອງລັດຖະບານປຽງຍາງເຊັ່ນກັນ ເປັນການຮັກສາຄຳຫມັ້ນສັນຍາທີ່ທ່ານຄິມ ຈອງອຶນ ກ່າວກັບປະທານາທິບໍດີ ມຸນ ແຈອິນ ລະຫວ່າງການປະຊຸມຮ່ວມກັນທີ່ເຂດປອດທະຫານເມື່ອວັນທີ 27ເມສາທີ່ຜ່ານມາ ທັງນີ້ນິຄົມນິວເຄຍປຸງກະເຍ-ຣີ ເປັນສະຖານທີ່ທົດສອບລະເບີດນິວເຄຍທັງ 6ຄັ້ງ ເຊິ່ງເກີດຂື້ນຕັ້ງແຕ່ປີ 2549 ແລະ ຄັ້ງລ່າສຸດເກີດຂື້ນເມື່ອເດືອນກັນຍາປີທີ່ຜ່ານມາ ໂດຍລັດຖະບານປຽງຍາງອ້າງວ່າເປັນການທົດສອບລະເບີດໄຮໂດເຈນ ຊົງພະລັງທີ່ສຸດໃນບັນດາລະເບີດທີ່ເຄີຍທົດສອບ ຕະຫລອດໄລຍະເວລາທີ່ຜ່ານມາ

ຄວາມເຄື່ອນໄຫວຂອງສະຫະລັດ ແລະ ເກົາຫລີໃຕ້ມີຂື້ນຫລັງສຳນັກກາງເກົາຫລີສະເຫນີລາຍງານທັງເປັນພາສາອັງກິດ ແລະ ພາສາເກົາຫລີວ່າ: ຂະບວນການຮື້ຖອນສະຖານທີ່ທົດສອບລະເບີດນິວເຄຍພາຍໃນນິຄົມປຸງກະເຍ-ຣີ ເຖິງການລະເບີດອຸໂມງການເຄື່ອນຍ້າຍອຸປະກອນ ແລະ ວັດຖຸດິບທັງຫມົດອອກຈາກຫ້ອງປະຕິບັດການ ຕະຫລອດຈົນການຍຸບຫນ່ວຍຮັກສາຄວາມປອດໄພພິເສດເຊິ່ງເບິ່ງແຍງຄວາມຮຽບຮ້ອຍຂອງສະຖານທີ່ມາຕະຫລອດ ໂດຍເຄຊີເອັນເອຍືນຍັນວ່າ: ລັດຖະບານປຽງຍາງຈະເຊີນນັກຂ່າວຕ່າງປະເທດເຂົ້າຮ່ວມສັງເກດການນຳ ທັງຈາກເກົາຫລີໃຕ້, ສະຫະລັດ, ສະຫະຣາຊະອານາຈັກ , ລັດເຊຍ  ແລະ ຈີນ ແຕ່ຈຳເປັນຕ້ອງມີການຈຳກັດໂຄຕ້າ ອັນເນື່ອງມາ ຈາກສະຖານທີ່ບໍ່ເອື້ອອຳນວຍ

ໃນອີກດ້ານນື່ງ ທ່ານເດວິດ ບີສລີ ຜູ້ອຳນວຍການໂຄງການອາຫານໂລກ ເສັດສິ້ນພາລະກິດເຍືອນເກົາຫລີເຫນືອເປັນເວລາ 4ມື້ ເມື່ອວັນເສົາທີ່ຜ່ານມາ ໂດຍເປັນການຍ້ຽມຊົມການດຳເນີນງານຂອງຫນ່ວຍງານຫລາຍແຫ່ງໃນກຸງປຽງຍາງ 2ມື້ ແລະ ລົງພື້ນທີ່ຕ່າງແຂວງອີກ 2ມື້ ເຖິງແນ່ນອນວ່າຕ້ອງມີເຈົ້າຫນ້າທີ່ຂອງລັດຖະບານປຽງຍາງຕິດຕາມໄປນຳຍ່າງໃກ້ຊິດ ແຕ່ຖືເປັນໂອກາດບໍ່ຫລາຍເທື່ອທີ່ລັດຖະບານປຽງຍາງເຊີນໃຫ້ເຈົ້າຫນ້າທີ່ອົງກອນ ລະຫວ່າງປະເທດສຳຫລວດ ພື້ນທີ່ຫລາຍແຫ່ງດົນຕິດຕໍ່ກັນຫລາຍມື້ ເຊິ່ງບິສລີກ່າວວ່າ: ພາວະອົດຍາກຍັງຄົງເປັນບັນຫາຫລັກໃນການພັດທະນາຄຸນນະພາບຊີວິດຂອງຊາວເກົາຫລີເຫນືອ ແຕ່ສະຖານະການໃນພາບລວມຖືວ່າດີຂື້ນເມື່ອທຽບກັບຊ່ວງ 2ທົດສະຫວັດ ທີ່ຜ່ານມາ ສະທ້ອນວ່າທ່ານຄິມ ຈອງອຶນ ກຳລັງພະຍາຍາມພັດທະນາເສດຖະກິດເພື່ອຍົກລະດັບຄວາມເປັນຢູ່ຂອງປະຊາຊົນ

 

 

ຂໍ້ມູນຈາກ: ເດລິນີວ

 

ຄວາມຄິດເຫັນຂອງຜູ້ອ່ານ (0)