GMT+7 27/05/2018 12:08

ສູ້ບໍ່ຖອຍນັກຮຽນເກັ່ງລະດັບຊາດ ຂີ່ລົດຖີບທຽວຮຽນ 9 ກິໂລແມັດ

 

ທ້າວ ຮື ຢາງ ນັກຮຽນເກັ່ງວິຊາຄະນິດສາດ ຊັ້ນ ມ 7 ໂຮງຮຽນ ມສ ໄຊຍະບູລີ ເຊິ່ງເປັນຕົວແທນນັກຮຽນເກັ່ງຂອງແຂວງໄຊຍະບູລີ ທີ່ໄດ້ເຂົ້າຮ່ວມສອບເສັງນັກຮຽນເກັ່ງລະດັບຊາດ ເມື່ອທ້າຍເດືອນເມສາຜ່ານມາ ແລະ ສາມາດຍາດໄດ້ລາງວັນອັນດັບ I ໃນຄະແນນ 9,50 ເຊິ່ງຜົນສຳເລັດຄັ້ງນີ້ໄດ້ມາຍ້ອນຄວາມຕັ້ງໃຈຄົ້ນ ຄວ້າຮ່ຳຮຽນມາຫຼາຍປີ, ເອົາໃຈໃສ່, ອົດທົນຮຽນໜັງສື, ສຶກສາຫາຄວາມຮູ້ຫຼາຍຊ່ອງທາງ, ນອກຈາກຮຽນນຳ   ຄູ – ອາຈານແລ້ວ ຍັງໄດ້ສຶກສາຄົ້ນຄວ້າດ້ວຍຕົນເອງ.

ທ້າວ ຮື ຢາງ

ທ້າວ ຮື ຢາງ ໃຫ້ສຳພາດວ່າ: ນ້ອງເປັນຄົນບ້ານທ່າ ເມືອງ ແລະ ແຂວງໄຊຍະບູລີ, ເກີດໃນຄອບຄົວທຸກຍາກ, ມີອ້າຍເອື້ອຍນ້ອງນຳກັນ 6 ຄົນ, ນ້ອງເອງເປັນລູກຜູ້ທີ 2 ແລະ ເລີ່ມເຂົ້າໂຮງຮຽນຢູ່ໂຮງຮຽນປະຖົມສົມບູນ ບ້ານທ່າ ຍ້ອນຕົນເອງມີ ຄວາມມັກໃນການສຶກສາຮ່ຳຮຽນ ແລະ ຄວາມອົດທົນພະຍາຍາມບຸກບືນໃຫ້ເປັນນັກຮຽນດີ – ຮຽນເກັ່ງ ເພື່ອຄອບຄົວ ແລະ ອະນາຄົດຂອງຕົນເອງ ແລະ ມາຮອດຊັ້ນ ປ 5 ຖືກຄັດເລືອກເຂົ້າຮ່ວມແຂ່ງຂັນນັກຮຽນເກັ່ງ ແຕ່ເວລາເຂົ້າຫ້ອງສອບເສັງອາຈານຈັດເຂົ້າສອບເສັງຜິດວິຊາ ໄດ້ເສັງວິຊາໂລກອ້ອມຕົວ ນ້ອງບໍ່ໄດ້ກະກຽມບົດຮຽນຫຍັງເລີຍ ແຕ່ກໍ່ສາມາດຍາດໄດ້ທີ 3 ແລະ ພໍມາຮອດຊັ້ນ ມ 4 ໄດ້ເຂົ້າຮ່ວມແຂ່ງຂັນນັກຮຽນເກັ່ງວິຊາຄະນິດສາດ ຂັ້ນແຂວງ ສາມາດຍາດໄດ້ລາງວັນທີ 2 ແລະ ນ້ອງສືບຕໍ່ຄົ້ນຄວ້າບົດຮຽນໃຫ້ຫຼາຍຂຶ້ນ ແລະ ມາປີນີ້ໄດ້ເຂົ້າຮ່ວມແຂ່ງຂັນນັກຮຽນເກັ່ງຊັ້ນ ມ 7 ໃນວິຊາຄະນິດສາດ ຂັ້ນແຂວງໄຊຍະບູລີ ໄດ້ອັນດັບທີ 1 ແລະ ລະດັບຊາດກໍ່ສາມາດຍາດໄດ້ທີ 1 ອີກ.

ທ້າວ ຮື ຢາງ ເວົ້າອີກວ່າ: ພາຍຫຼັງຮຽນຈົບຊັ້ນປະຖົມ ນ້ອງໄດ້ຍົກຍ້າຍໄປຮຽນຊັ້ນມັດທະຍົມຢູ່ໂຮງຮຽນ ມສ ນາມອນ ເຊິ່ງເປັນໄລຍະທາງໄກຈາກບ້ານ 9 ກິໂລແມັດ, ຖືວ່າມີຄວາມຫຍຸ້ງຍາກຫຼາຍ, ອາໄສຂີ່ລົດຖີບໄປແຕ່ລະມື້ອອກເຮືອນແຕ່ 5:00 ໂມງ ໄປຮອດໂຮງຮຽນ 7:00 ໂມງ, ບາງມື້ກໍ່ໄປບໍ່ທັນເພາະວ່າໄປຮອດໄລຍະທາງໃດໜຶ່ງລົດຖີບກໍ່ມີການເປ່ເພ ແລະ ບາງມື້ຝົນຕົກ. ໝູ່ທີ່ຢູ່ບ້ານດຽວກັນທີ່ໄປຮຽນນຳກັນກໍ່ອອກໂຮງຮຽນໝົດຍັງແຕ່ນ້ອງທີ່ຍັງອົດທົນໄປຮຽນຢູ່ໂຮງຮຽນດັ່ງກ່າວ ກໍ່ຍ້ອນວ່າຄອບຄົວທຸກຍາກຈຶ່ງບໍ່ຄິດທີ່ຈະອອກໂຮງຮຽນ ແລະ ຄິດວ່າຕ້ອງອົດທົນສູ້ຊົນຮຽນຕໍ່ເຖິງວ່າໝູ່ຈະອອກໂຮງຮຽນໝົດກໍ່ຕາມ, ສ່ວນວັນເສົາ – ວັນທິດກໍ່ໄປຫາເງິນດ້ວຍການເຮັດປໍສາ, ເຮັດແຂມຂາຍ ແລະ ອື່ນໆທີ່ພໍໄດ້ເງິນໄປໃຊ້ຈ່າຍຢູ່ໃນໂຮງຮຽນ ແລະ ມາຮອດປີ 2014 – 2015 ຍ້າຍມາຮຽນຊັ້ນ ມ 5 ຢູ່ ມສ ໄຊຍະບູລີ ໄດ້ຖືກຄັດເລືອກສອບເສັງເຂົ້າຮຽນຫ້ອງພອນສະຫວັນ, ນ້ອງຮູ້ສຶກດີໃຈເມື່ອໄດ້ຮຽນຫ້ອງດັ່ງກ່າວຈຶ່ງໄດ້ອາໄສຢູ່ຫໍພັກໂຮງຮຽນ, ແຕ່ລະມື້ໄປໂຮງຮຽນຕັ້ງໃຈຟັງຄູອະທິບາຍບົດຮຽນ, ເວລາກັບຫໍພັກໄດ້ຄົ້ນຄວ້າດ້ວຍຕົວເອງ ແລະ ຮຽນເພີ່ມນຳອາວທີ່ເປັນຄູສອນຄະນິດສາດຢູ່ໂຮງຮຽນດັ່ງກ່າວ ເພາະຕົນເອງບໍ່ມີເງິນໄປຮຽນເພີ່ມບ່ອນອື່ນ, ສ່ວນວັນເສົາ ແລະ ວັນອາທິດ ກໍ່ໄດ້ໄປຊອກເຮັດວຽກເສີມ ເຊັ່ນ: ເຮັດວຽກກໍ່ສ້າງ, ຂຸດເສົາເຮືອນ, ບາງຄັ້ງໄປຊ່ວຍວຽກອາຈານເພິ່ນກໍ່ເອົາເງິນໃຫ້ ແລະ ບາງຄັ້ງເພິ່ນເອົາໂສ້ງເສື້ອໃຫ້, ນ້ອງຮູ້ສຶກດີໃຈ ແລະ ມີຄວາມສຸກໃນສິ່ງທີ່ຕົນເອງສາມາດເຮັດໄດ້ ແລະ ຍ້ອນຄວາມທຸກຍາກລໍາບາກເຮັດໃຫ້ເຮົາຮູ້ອົດທົນ ແລະ ສູ້ຊົນຜ່ານຜ່າອຸປະສັກຕ່າງໆ ຈົນເຮັດໃຫ້ເຮົາມີຄວາມຮູ້ – ຄວາມສາມາດ ແລະ ປະສົບຜົນສຳເລັດໃນການສຶກສາຮ່ຳຮຽນໃນມື້ນີ້ໄດ້, ແຕ່ນ້ອງຈະສືບຕໍ່ສຶກສາຮ່ຳຮຽນຕໍ່ໄປໃຫ້ຄວາມໃຝ່ຝັນປະກົດຜົນເປັນຈິງ, ນ້ອງຄິດວ່າຖ້າຮຽນຈົບສາມັນແລ້ວຢາກຈະໄປສຶກສາຕໍ່ຂະແໜງໄຟຟ້າ, ສະຖາປັດ ຫຼື ສາຍແພດ ຫຼັກໆນ້ອງຢາກຮຽນແພດອາດຈະມີໂອກາດໄດ້ກັບມາພັດທະນາບ້ານເກີດຂອງຕົນເອງ, ໄດ້ປິ່ນປົວພໍ່ແມ່ພີ່ນ້ອງ ແລະ ສັງຄົມໃນຍາມເຈັບເປັນໄດ້.

ສຸດທ້າຍນ້ອງກໍ່ຢາກແລກປ່ຽນກັບບັນດາໝູ່ເພື່ອນ ແລະ ນ້ອງໆນັກຮຽນໝົດທຸກ, ຖ້າຢາກເປັນນັກຮຽນ   ດີ – ຮຽນເກັ່ງ ກໍ່ຕ້ອງດຸໝັ່ນພາກພຽນຮ່ຳຮຽນຂຽນອ່ານຢູ່ຕະຫຼອດເວລາ, ຍິ່ງອ່ານຫຼາຍຍິ່ງເຮັດໃຫ້ເຮົາມີຄວາມຮູ້ຫຼາຍ, ຖ້າເຮົາມີຄວາມຮູ້ຄວາມສາມາດແລ້ວເຮັດຫຍັງກໍ່ຈະປະສົບຜົນສຳເລັດ.

 

ແຫຼ່ງຂ່າວ: ShareKao

 

 

 

ຄວາມຄິດເຫັນຂອງຜູ້ອ່ານ (0)