GMT+7 26/05/2018 15:09

ໄຊຍະບູລີ ລົງທຶນ 13,4 ຕື້ກວ່າກີບ ສ້າງອ່າງເກັບນໍ້າ ຢູ່ເມືອງໄຊຊະຖານ

 

 

​ແຂວງ​​​ໄຊຍະ​ບູລີ ​ໃຊ້ງົບປະມານ​ຂອງ​ລັດ  ຈຳນວນ 13,4 ຕື້ກວ່າກີບ ກໍ່ສ້າງອ່າງເກັບ ນໍ້າຫ້ວຍຄວາ  ເມືອງໄຊຊະຖານ ​ໂດຍ​ແມ່ນ ບໍລິສັດ ພົມເທວາກໍ່ສ້າງ  ຈຳກັດຜູ້ດຽວ ​ເປັນ​ຜູ້​ຮັບ​ເໝົາ​ກໍ່ສ້າງ ​ ເຊິ່ງ​​ໄດ້​ເຊັນສັນຍາຮັບເໝົາໂຄງການ  ​ໃນວັນທີ 10 ພຶດສະພາ 2018 ​ໂດຍ​ການ​ຮ່ວມ​ລົງ​ນາມ  ລະຫວ່າງ ຝ່າຍເຈົ້າຂອງໂຄງການ  ແມ່ນ ທ່ານ ຄຳຫລ້າ ຜິວວັນນາ ຫົວໜ້າພະແນກ  ກະສິກຳ ແລະ ປ່າໄມ້ແຂວງ ແລະ ຝ່າຍບໍລິສັດ ແມ່ນ ທ່ານ ເລດີນາ ທຳມະເທວາ ຫົວໜ້າ ບໍລິສັດພົມເທວາກໍ່ສ້າງຈຳກັດຜູ້ດຽວ,  ມີທ່ານ ຍັນຍົງ ສີປະເສີດ ຮອງເຈົ້າແຂວງ ໄຊຍະບູລີ ແລະ ພາກສ່ວນ​ກ່ຽວຂ້ອງເຂົ້າຮ່ວມ ​ເປັນ​ສັກຂີ​ພິຍານ.

ໂຄງການ​ດັ່ງກ່າວ​ ຈະ​ໄດ້​ຈັດ​ຕັ້ງ​ປະຕິບັດ 4 ໜ້າວຽກຕົ້ນຕໍເຊັ່ນ: ກໍ່ສ້າງເຂື່ອນດິນ ໃສ່ແກນເບຕົງເສີມເຫລັກ ສູງ 17 ແມັດ, ຍາວ 64,76 ແມັດ, ສັນເຂື່ອນກວ້າງ 8 ແມັດ, ເກັບນໍ້າໄວ້ໃຊ້ໄດ້ 32. 496 ແມັດກ້ອນ;  ກໍ່ສ້າງທາງລະບາຍ ນໍ້ານອງ ກວ້າງ 3 ແມັດ, ຍາວ 76 ແມັດ, ກໍ່ສ້າງທໍ່ນໍ້າຂະໜາດ 15 ຊັງຕີແມັດ, ຍາວ 1.118 ແມັດ, ອ່າງພັກນໍ້າ ຂະໜາດ 150 ແມັດກ້ອນ ​ແລະ ກໍ່ສ້າງເສັ້ນທາງໄປຕາມສັນເຂື່ອນ ຍາວ  220 ແມັດ.

ພາຍຫລັງໂຄງການ ກໍ່ສ້າງສຳເລັດ ປະຊາຊົນຈະໄດ້ຮັບຜົນປະໂຫຍດ ຈາກການຊົມໃຊ້ນໍ້າ ຈຳນວນ 230 ຄອບຄົວ, ພົນລະເມືອງ 1.000 ຄົນ, ຍິງ 457 ຄົນ, ເຊິ່ງຈະເຮັດໃຫ້ປະຊາຊົນ ມີນໍ້າກິນ-ນໍ້າໃຊ້ ແລະ ທຳການຜະລິດ ກະສິກໍາ ຈຳນວນໜຶ່ງ,  ເພື່ອແກ້ໄຂໄດ້ຄວາມທຸກຍາກຂອງປະຊາຊົນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)