GMT+7 26/05/2018 14:49

ທ່ອງທ່ຽວ ເຊກອງສະຫຼຸບການເຄື່ອນໄຫວກວດກາທຸລະກິດ ບໍລິການທ່ອງທ່ຽວປີ 2017

 

 

ໃນວັນທີ 11 ພຶດສະພາ ນີ້ ຂະແໜງທ່ອງທ່ຽວ ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ)ແຂວງເຊກອງ ໄດ້ຈັດກອງປະຊຸມສະຫຼຸບການເຄື່ອນໄຫວກວດກາທຸລະກິດບໍລິການທ່ອງທ່ຽວປີ 2017 ແລະວາງທິດທາງແຜນ ການປີ 2018 ຢູ່ທີ່ຫ້ອງປະຊຸມພະແນກດັ່ງກ່າວ ໂດຍການເຂົ້າຮ່ວມຂອງທ່ານ ບູ່ໄຊ ຊະຍະເສນ ຫົວໜ້າພະແນກ ຖວທ ແຂວງ , ມີຫົວໜ້າຫຼືຮອງຫ້ອງການ ຖວທ 4 ເມືອງ, ພ້ອມດ້ວຍຄະນະກໍາມະການ ແລະພະນັກງານວິຊາການ ຂະແໜງການດັ່ງກ່າວເຂົ້າຮ່ວມ.

ທ່ານ ຈັນທະບູນ ທະລົງແສງຈັນ ຫົວໜ້າຂະແໜງທ່ອງທ່ຽວ ໄດ້ລາຍງານການເຄື່ອນໄຫວ ຄຸ້ມຄອງ-ກວດກາທຸລະກິດບໍລິການທ່ອງທ່ຽວປີ 2017 ແລະວາງທິດທາງແຜນການປີ 2018 ເຊິ່ງທ່ານໃຫ້ຮູ້ວ່າ: ທົ່ວແຂວງເຊກອງມີໂຮງແຮມ ທັງໝົດ 10 ແຫ່ງ, ຣີສອດ 2 ແຫ່ງ, ເຮືອນພັກ 34 ແຫ່ງ, ມີຫ້ອງນອນທັງໝົດ 571 ຫ້ອງ, ຮ້ານກິນດື່ມ 18 ແຫ່ງ, ຮ້ານຄາຣາໂອເກະ 22 ແຫ່ງ, ຮ້ານບັນເທີງ 7 ແຫ່ງ, ຮ້ານອາຫານ 20 ແຫ່ງ; ໃນໄລຍະຜ່ານມາໄດ້ອອກລະບຽບ ໃນການຄຸ້ມຄອງ, ການສ້າງຕັ້ງ ຮ້ານກິນດື່ມ, ບັນເທີງ ແລະ ຮ້ານຄາຣາໂອເກະໃນທົ່ວແຂວງ, ໄດ້ປຶກສາຫາລືກັບເຈົ້າໜ້າທີ່ ປກສ ແຂວງ-ເມືອງ ແລະ ຫ້ອງການ ຖວທ 4 ເມືອງ ເພື່ອແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນການ ບໍລິການ ເປີດ-ປິດຮ້ານ ບໍ່ຖືກຕາມກໍານົດເວລາທີ່ໄດ້ກໍນົດໄວ້

ການເປີດເພງດັງເກີນຂອບເຂດ ເຊິ່ງໄດ້ມອບຄວາມຮັບຜິດຊອບໃຫ້ພາກສ່ວນ ປກສ ເປັນຜູ້ຕິດຕາມ ກວດກາ ບັນດາຫົວໜ່ວຍທຸລະກິດການທ່ອງທ່ຽວທີ່ເຄື່ອນໄຫວບໍ່ສອດຄ່ອງກັບລະບຽບກົດໝາຍ, ໄດ້ຮ່ວມກັບຂະແໜງການທີ ກ່ຽວຂ້ອງ ລົງເຄື່ອນໄຫວປັບປຸງຂອດການບໍລິການໃຫ້ມີມາດຕະຖານ ແລະ ຄຸນນະພາບ ພ້ອມທັງສະໜອງສິ່ງອໍານວຍຄວາມສະດວກໃຫ້ແກ່ແຂກທີ່ເຂົ້າມາໃຊ້ບໍລິການ, ນອກນັ້ນຍັງໄດ້ຈັດຕັ້ງປະຕິບັດເຜີຍແຜ່ບັນດາຂໍ້ກໍານົດ, ກົດລະບຽບ, ກົດໝາຍ ທີ່ຂະແໜງການກ່ຽວຂ້ອງວາງອອກ ໃຫ້ບັນດາຜູ້ປະກອບການທຸລິດການທ່ອງທ່ຽວຮັບຮູ້ ແລະ ປະຕິບັດ, ໄດ້ລົງເຄື່ອນໄຫວຝຶກອົບຮົມ ໃຫ້ແກ່ຜູ້ປະກອບການທຸລະກິດທ່ອງທ່ຽວໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ຮ້ານຄາຣາໂອເກະ ຢູ່ເມືອງລະມາມ, ທ່າແຕງ ແລະ ປະຊາຊົນບັນດາບ້ານທີ່ມີແຫຼ່ງທ່ອງທ່ຽວ 6 ບ້ານເປົ້າໝາຍ, ໄດ້ຮ່ວມກັບອໍານາດການປົກຄອງບ້ານ, ປກສ ກຸ່ມບ້ານ ສ້າງບົດບັນທຶກກັບເຈົ້າຂອງຮ້ານ ທີ່ລ່ວງລະເມີດກົດລະບຽບ ມີຈໍານວນ 2 ຄັ້ງ, ມີ 2 ຫົວໜ່ວຍ

ຮ່ວມກັບພະແນກອຸດສາຫະກໍາ ແລະ ການຄ້າ ແຈ້ງຖານລາຍຮັບຮ່ວມກັນ ເຊິ່ງມີຫົວໜ່ວຍທຸລະກິດທັງໝົດ 111 ຫົວໜ່ວຍ ແລະມີຖານຂໍ້ມູນກົງກັນມີ 68 ຫົວໜ່ວຍ, ບໍ່ມີໃນຖານຂໍ້ມູນຂອງການຄ້າ 36 ຫົວໜ່ວຍ, ບໍ່ມີໃນຖານຂໍ້ມູນ ຂອງ ຖວທ 7 ຫົວໜ່ວຍ, ໄດ້ລົງຮາກຖານເມືອງກະລຶມ, ດາກຈຶງ ແລະ ຮາກຖານບ້ານ ເພື່ອຊຸກຍູ້ວຽກງານທ່ອງທ່ຽວ ເປັນຕົ້ນການພັດທະນາ ແລະ ປົກປັກຮັກສາແຫຼ່ງທ່ອງທ່ຽວ, ນອກນີ້ ບັນດາຂະແໜງການທີ່ກ່ຽວຂ້ອງກໍໄດ້ ເຄື່ອນໄຫວ, ກວດກາ ບັນດາຫ້າງຮ້ານທຸລະກິດທ່ອງທ່ຽວ, ໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ຮ້ານຄາຣາໂອເກະຢ່າງເປັນປົກກະຕິ ເພື່ອໃຫ້ມີຄວາມເປັນລະບຽບຮຽບຮ້ອຍ ມີຄວາມສະຫງົບ, ປະຕິບັດໄປຕາມນິຕິກໍາ ແລະຂໍ້ກໍານົດ, ກົດລະບຽບຂອງຂັ້ນເທິງວາງອອກຢ່າງເຂັ້ມງວດ.

ນອກນີ້ ຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາຄິດຄໍາ ແລກປ່ຽນ ເຫັນຫຼາຍບັນຫາ ໂດຍສະເພາະ ຂໍ້ສະດວກ-ຂໍ້ຫຍຸ້ງຍາກໃນການຈັດຕັ້ງປະຕິບັດ, ຫາງສຽຂອງສັງຄົມຕໍ່ບັນດາຫ້າງຮ້ານບັນເທີງຕ່າງໆ, ຕໍ່ກັບຜູ້ທີ່ລະເມີດຕໍ່ລະບຽບ ກົດໝາຍ ຈະມີວິທີການແກ້ໄຂແນວໃດ? , ບັນດາຜູ້ປະກອບການຮ້ານບັນເທີງ ບໍ່ຢາກເສຍພັນທະໃຫ້ລັດ ຈະມີວິທີການແນວໃດ? ເຫຼົ່ານີ້ເປັນຕົ້ນ ທັງນີ້ເພື່ອພ້ອມກັນຊອກຫາວິທີທາງແກ້ໄຂບັນຫາທີ່ບໍ່ທັນສອດຄ່ອງ ໃຫ້ເຂົ້າສູ່ລະບຽບການຢ່າງເຂັ້ມງວດ.

 

 

ຂໍ້ມູນຈາກ: ໂທລະໂຄ່ງ

ຄວາມຄິດເຫັນຂອງຜູ້ອ່ານ (0)