GMT+7 27/05/2018 12:11

ປະເທດສະມາຊິກອາຊຽນ ແລກປ່ຽນຄວາມຮູ້ ດ້ານການ ຂຽນປຶ້ມວັນນະຄະດີ

 

ໃນ​ວັນ​ທີ 10 ພຶດສະພາ 2018 ທີ່​ສະ​ຖາ​ບັນ​ຮ່ວມ​ມື ​ລາວ-ຍີ່ປຸ່ນ, ຄະນະ​ອາ​ນຸກຳມະ ການວັດທະນະທຳ​ອາ​ຊຽນ ​ສປປ ລາວ ຮ່ວມ​ກັບ ສະມາຄົມ​ນັກ​ປະພັນ​ລາວ ​ແລະ ຄະນະ​ອັກສອນ​ສາດ ພາກ​ພາສາ ​​ແລະ ວັດທະນະທຳ ມະຫາ​ວິທະຍາ​ໄລ​ແຫ່ງ​ຊາດ, ​ໄດ້ຈັດ​ສຳມະ​ນາ ນັກ​ຂຽນ​ອາ​ຊຽນ ​ແລະ ງານ​ວາງສະ​ແດງ ປຶ້ມ​ວັນນະຄະດີ ​ຂອງ​ປະ​ເທດ​ສະມາຊິກ​ອາ​ຊຽນ, ​ໂດຍ​ການ​ເຂົ້າ​ຮ່ວມ​ຂອງ​ທ່ານ ອາ​ລຸນ ສີ​ລັດຕະນະ​ກຸນ ອະທິການ​ບໍດີ ຄະນະ​ອັກສອນສາດ ມະຫາວິທະຍາ​ໄລ​ແຫ່ງ​ຊາດ, ທ່ານ ທອງ​ໃບ ​ໂພທິ​ສານ ຫົວໜ້າ​ກົມ​ມໍລະດົກ  ທັງ​ເປັນ​ປະທານ​ສະມາຄົມ ​ນັກ​ປະພັນ​ລາວ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ, ມີ​ບັນດາ​ຜູ້ຕາງໜ້າ ​ຈາກ​ບັນດາ​ປະ​ເທດ​ອາຊຽນ, ຄູ​ອາຈານ ​ແລະ ນັກ​ສາ​ສຶກສາ​ເຂົ້າ​ຮ່ວມ.

ສຳ​ມະ​ນາ ​ແລະ ງານ​ສະ​ແດງ​ປຶ້ມຄັ້ງ​ນີ້,  ເປັນ​ຄັ້ງ​ທຳ​ອິດທີ່​ຈັດຂຶ້ນ​ຢູ່  ສປປ ລາວ, ​ໂດຍຈຸດປະສົງ ​​ເພື່ອ​ເຕົ້າ​ໂຮມ​ບັນດາ​ນັກ​ຂຽນ ​ໃນ​ປະ​ເທດ​ສະມາຊິກ​ອາ​ຊຽນ ​ໄດ້​ມາ​ພົບ​ປະ​​ແລກປ່ຽນ​ບົດຮຽນ​,  ຖອດຖອນ​ບົດຮຽນ ເຊິ່ງກັນ ​ແລະ ກັນ ທາງ​ດ້ານ​ການ​ຂຽນ​ວັນນະຄະດີ,  ການ​ພິມ​ປຶ້ມ​ວັນນະ​ຄະດີ ​ແລະ ທັງ​ເປັນ​ການ​ສ້າງ​ປະສົບ​ການ​ ໃຫ້​ແກ່​ນັກ​ຂຽນ​ລາວ ​ເພື່ອ​ເຮັດ​ແນວ​ໃດ​ ໃຫ້​ນັກ​ຂຽນ​ລາວ ​ໄດ້​ມີ​ໂອກາດສຳ​ພັດ​ ກັບ​ບັນດາ​ນັກ​ຂຽນ ​ແລະ ວັນນະຄະດີ​ ຂອງບັນດາ ​ປະ​ເທດ​ອາຊຽນດ້ວຍ​ກັນ. ພ້ອມ​ດຽວ​ກັນ​,  ການວາງ​ສະ​ແດງ​ປຶ້ມວັນນະຄະດີ​ ຂອງ ບັນດາ​ປະ​ເທດ​ອາຊຽນ ​ເພື່ອ​ໃຫ້​ນັກຮຽນ​ນັກ​ສຶກສາ, ຄູ​ອາຈານ​ຢູ່​​ໂຮງ ຮຽນ ກໍຄື ​ມະຫາວິທະຍາ​ໄລ​ແຫ່ງ​ຊາດ ​ໄດ້​ສຳ​ພັດ​ກັບ​ບົດ​ຂຽນ​ປຶ້ມ​ວັນນະຄະດີ ​ ຂອງ​ບັນດາ​ ປະ​ເທດ​ສະມາຊິກ​ອາ​ຊຽນ ທີ່​ນຳ​ມາ​ວາງສະ​ແດງ​ໃນ​ຄັ້ງ​ນີ້.

ທ່ານ ທອງ​ໃບ ​ໂພທິ​ສານ ​​ກ່າວ​ວ່າ: ​ໃນ​ໄລຍະ​ຜ່ານ​ມາ ສະ​ມາ​ຄົມນັກ​ປະພັນ​ລາວ ຫລາຍ​ຄົນ​ກໍ​ໄດ້​ຮັບ​ລາງວັນ​ ໃນ​ລະດັບ​ປະ​ເທດ​ອາ​ຊຽນ ຫລາຍ​ລາງ​ວັນ. 3 ວັນ ສຳລັບ​ ການ​ວາງສະ​ແດງ​ປຶ້ມ​ວັນນະຄະດີ​ ໃນ​ຄັ້ງ​ນີ້, ​ໄດ້​ມີຫລາຍ​ຮ້ອຍ​​ເລື່ອງ  ​ທີ່​ຖືກ​ນຳ​ມາສະ​ແດງ ລວມທັງ​ສຳນັກ​ພິມ  ຂອງ ສປປ ລາວ ​ແລະ ​ໄດ້​ມີ​ນັກ​ສຶກສາ​ ຫລາຍ​ຮ້ອຍ​ຄົນ​ເຂົ້າ​ຊົມ ​ແລະ ​ເຮັດ​ກິດຈະກຳ​ຕ່າງໆ ຮ່ວມກັບ​ບັນດາ​ປະ​ເທດ​ສະ ມາຊິກ​ອາ​ຊຽນ.

ທ່ານ ທອງ​ໃບ ​ໂພທິ​ສານ ກ່າວ​ຕື່ມ​ວ່າ: ​ນັກ​ສຶກສາລາວ​ ມີ​ໂອກາດ​ໜ້ອຍ ​ທີ່​ຈະ​ໄດ້​ຮູ້​ຈັກກັບປະ​ເທດ​ສະມາຊິກອາ​ຊຽນ,  ​ໂດຍ​ສະ​ເພາະ​ແມ່ນວັນນະຄະດີ  ແລະ ​ການຈັດ​ສຳ​ມະ​ນາ​ຄັ້ງ​ນີ້, ຈຶ່ງ​ເປັນ​ໂອ  ກ​າດທີ່​ສຳຄັນ​ຫລາຍ ສຳລັບຄູ​ອາຈານ ​ແລະ ນັກ​ສາ​ສຶກສາລາວ  ທີ່​ຈະ​ໄດ້ຮຽນ​ຮູ້ ​ແລະ ຖອດ​ຖອນ​ເອົາ​ບົດຮຽນ​ດັ່ງກ່າວ​ ນຳ​ບັນດາ​ນັກ​ຂຽນ​ອາ​ຊຽນ. ຂ່າວ-ພາບ: ມະນີ​ທອນ

 

ແຫຼ່ງຂ່າວ: ຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)