GMT+7 23/04/2018 10:55

ອິນໂດເນເຊຍ ພົບວິກິດເຫລົ້າເຖື່ອນຄັ້ງໃຫຍ່

 

 

ຈຳນວນຜູ້ເສຍຊີວິດຈາກການດື່ມເຫລົ້າເຖື່ອນໃນອິນໂດເນເຊຍ ເພີ່ມເປັນຍ່າງຫນ້ອຍ 90ຄົນ ພາຍໃນໄລຍະເວລາພຽງ 2ອາທິດ ນັບວ່າຮຸນແຮງທີ່ສຸດໃນຮອບຫລາຍປີ ແລະ ເຖິງຂັ້ນຫນື່ງໃນເມືອງໃຫຍ່ຂອງປະເທດຕ້ອງ ປະກາດພາວະສຸກເສີນ

ສຳນັກຂ່າວຕ່າງປະເທດລາຍງານຈາກກຸງຈາກາຕາ ປະເທດອິນໂດເນເຊຍເມື່ອວັນທີ 11ເມສາວ່າ: ສຳນັກງານຕຳຫລວດແຫ່ງຊາດຂອງອິນໂດເນເຊຍອອກຖະແຫລງການເມື່ອວັນອັງຄານວ່າ: ຈຳນວນຜູ້ເສຍຊີວິດຈາກການບໍລິໂພກ ເຫລົ້າເຖື່ອນພາຍໃນໄລຍະເວລາພຽງ 2ອາທິດທີ່ຜ່ານມາ ຢູ່ທີ່ຍ່າງຫນ້ອຍ 90ຄົນ ສ່ວນໃຫຍ່ພົບໃນກຸງຈາກາຕາຈັງຫວັດຊວາຕາເວັນຕົກ ແລະ ຈັງຫວັດປາປົວທີ່ຢູ່ທາງຕາເວັນອອກສຸດຂອງປະເທດ ແລະ ຍັງມີຜູ້ປ່ວຍເຂົ້າຮັກສາ ຢູ່ໃນໂຮງຫມໍອີກຫລາຍສິບຄົນ

ແນວໃດກໍ່ຕາມ ເຈົ້າຫນ້າທີ່ສາມາດຈັບກຸມຜູ້ຕ້ອງສົງໄສໄດ້ແລ້ວ 9ຄົນ ຖານມີສ່ວນພົວພັນກັບການລັກລອບຜະລິດ ແລະ ຈຳຫນ່າຍເຫລົ້າເຖື່ອນ ແລະ ເຊື່ອວ່າຈະຂະຫຍາຍຜົນໄດ້ອີກໃນໄວວັນນີ້ ເພື່ອນຳໄປສູ່ປະຕິບັດການກວດລ້າງຕໍ່ໄປ ໂດຍຫນື່ງໃນຜູ້ຕ້ອງສົງໄສຮັບສາລະພາບວ່າ: ປະສົມຢາຂ້າຍຸງ  ແລະ ເມທິລແອລກໍຮໍລົງໄປນຳ

ຂະນະດຽວກັນທາງການເມືອງບັນດຸງ ເຊິ່ງເປັນເມືອງເອກຂອງຈັງຫວັດຊວາຕາເວັນຕົກ ແລະ ເປັນເມືອງໃຫຍ່ອັນດັບ 3 ຂອງອິນໂດເນເຊຍ ປະກາດພາວະສຸກເສີນຈາກເລື່ອງນີ້ແລ້ວ ເຊິ່ງສະຖານະການດັ່ງກ່າວຖືວ່າມີຄວາມຮຸນແຮງ ທີ່ສຸດນັບຕັ້ງແຕ່ປີ 2559 ທີ່ສະຖິຕິຜູ້ເສຍຊີວິດຕະຫລອດທັງປີຈາກການບໍລິໂພກເຫລົ້າເຖື່ອນຢູ່ທີ່ 36ຄົນເທົ່ານັ້ນ

 

 

 

ຂໍ້ມູນຈາກ: ເດລິນີວ

ຄວາມຄິດເຫັນຂອງຜູ້ອ່ານ (0)