GMT+7 23/04/2018 10:55

ຂະບວນລົດ ແຫ່ສະຫລອງ ສຽງແຄນລາວເປັນມໍລະດົກໂລກ

 

 

ຂະ​ບວນ​ລົດ​ແຫ່​ສະ​ຫລອງ ​ສຽງ​ແຄນ​ລາວ ໄດ້​ຖືກ​ຮັບ​ຮອງ​ ເປັນ​ມໍ​ລະ​ດົກ​ໂລກ ຈັດ​ຂຶ້ນ​ຢ່າງ​ຄຶກ​ຄື້ນ ​ໃນ ວັນ​ທີ 11 ເມ​ສາ 2018, ໂດຍ​ມີ​ ທ່ານ ສອນ​ໄຊ ສີ​ພັນ​ດອນ ຮອງ​ ນາ​ຍົກ​ລັດ​ຖະ​ມົນ​ຕີ, ທ່ານ ບໍ່​ແສງ​ຄຳ ວົງ​ດາ​ລາ ລັດ​ຖະ​ມົນ​ຕີ​ ກະ​ຊວງ​ຖະ​ແຫລງ​ຂ່າວ, ວັດ​ທະ​ນະ​ທ​ຳ ແລະ ທ່ອງ​ທ່ຽວ, ມີ​ບັນ​ດາ ຮອງ​ລັດ​ຖະ​ມົນ​ຕີ, ຫົວ​ໜ້າ​ກົມ, ຮອງ​ກົມ, ເຖົ້າ​ແກ່​ແນວ​ໂຮມ, ພ້ອມ​ດ້ວຍ ມວນ​ຊົນ​ ຊາວ​ນະ​ຄອນ​ຫລວງວຽງ​ຈັນ ເຂົ້າ​ຮ່ວມ ຢ່າງ​ຫລວງ​ຫລາຍ.

ຂະ​ບ​ວນ​ແຫ່​ດັ່ງ​ກ່າວ, ມີ​ລົດຫລາຍກວ່າ 20 ຄັນ ເລີ່ມແຫ່​ອອກ​ຈາກ ​ອາ​ນຸ​ສາ​ວະ​ລີ ເຈົ້າ​ຟ້າ​ງຸ່ມ ໄປ​ຕາມ​ຖະ​ໜົນ​ສຸ​ພາ​ນຸ​ວົງ, ຖະ​ໜົນ​ເສດ​ຖະ​ທິ​ລາດ, ຖະ​ໜົນ​ລ້ານ​ຊ້າງ, ຖະ​ໜົນ 23  ສິງ​ຫາ ໄປ​ຫາ ອາ​ນຸ​ສາ​ວະ​ລີ​ ນັກ​ຮົບ​ນິ​ລະ​ນາມ (ດາວ​ແດງ) ຫລັງ​ຈາກ​ນັ້ນ ສືບ​ຕໍ່​ເດີນ​ທາງ​ ໄປ​ຕາມ​ຖະ​ໜົນ​ໄກ​ສອນ ໄປ​ສູ່ ອາ​ນຸ​ສາ​ວະ​ລີ ຂອງ​ປະ​ທານ​ ໄກ​ສອນ ພົມ​ວິ​ຫານ, ເຊິ່ງ​ຢູ່​ຕາມ​ຈຸດ​ຕ່າງ​ໆ ມີ​ພິ​ທີ ​ວາງ​ກະ​ຕ່າ​ດອກ​ໄມ້, ​ອ່ານ​ບົດລາຍ​ງານ ແລະ ຄອບ​ໄຫວ້ ​ທັງ​ນີ້, ກໍ​ເພື່ອ ສະ​ແດງ​ຄວາມ​ຮູ້​ບຸນ​ຄຸນ ຕໍ່​ບັນ​ພະ​ບູ​ລຸດ, ຢູ່​ຍ່າ​ຕາ​ຍາຍ ຜູ້​ທີ່​ໄດ້​ສ້າງ​ສຽງ​ແຄນ​ລາວ ມາ​ສູ່​ຫຸ່​ນ​ຄົນ ​ລຸ້ນ​ລູກ​ລຸ້ນ​ຫລານ ໄດ້​ສືບ​ຕໍ່​ນຳ​ໃຊ້ ຈົນ​ເຖິງ​ປັດ​ຈຸ​ບັນ ທັງ​ເປັນ​ການ​ເຜີຍ​ແຜ່ ໃຫ້​ມວນ​ຊົນ ກໍ​ຄື​ ສັງ​ຄົມ​ ໃນ​ທົ່ວ​ໂລກ ໄດ້​ຮັບ​ຮູ້ ວ່າ​ສຽງ​ແຄນ​ລາວ ໄດ້​ຖືກ​ຮັບ​ຮອງ ເປັນ​ມໍ​ລະ​ດົກ​ໂລກ ຢ່າງ​ເປັນ​ທາງ​ການ​ແລ້ວ.

ພິ​ທີ​ສະ​ເຫລີມ​ສະ​ຫລອງ ສຽງ​ແຄນ​ລາວ​ ເປັນ​ມໍ​ລະ​ດົກ​ໂລກ ​​ຢ່າງ​ເປັນ​ທາງ​ການຈະ​ໄດ້​ຈັດ​ຂຶ້ນ ໃນ​ຕອນ​ຄ່ຳ ຂອງ​ມື້​ນີ້ ຢູ່ ຫໍ​ວັດ​ທະ​ນະ​ທ​ຳ​ແຫ່ງ​ຊາດ ນະ​ຄອນ​ຫລວງວຽງ​ຈັ​ນ ເລີ່ມ​ເວ​ລາ 19:00 ໂມງ ເປັນ​ຕົ້ນ​ໄປ.

 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)