GMT+7 23/04/2018 10:54

ລາວສຳເລັດການແຂ່ງຂັນ ສີມືແຮງງານແຫ່ງຊາດ ຄັ້ງທີ 3

 

 

ໃນລະຫວ່າງ​ ວັນ​ທີ 26 ມີນາ ຫາ 5 ​ເມສາ 2018, ທີ່​ ນະຄອນຫລວງ​ວຽງ​ຈັນ ​ໄດ້​ ຈັດການ​ແຂ່ງຂັນ​ ສີມື​ແຮງ​ງານ​ແຫ່ງ​ຊາດ ຄັ້ງ​ທີ 3 ຂຶ້ນ, ​ໂດຍ​ການ ​ເປັນ​ປະທານ​ຂອງ​ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ​ ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ພ້ອມ​ດ້ວຍ​ ພາກສ່ວນ​ກ່ຽວຂ້ອງ​ເຂົ້າຮ່ວມ, ເຊິ່ງ ການ​ແຂ່ງຂັນ​ດັ່ງ​ກ່າວ ​ແມ່ນ​ເວທີ​ທີ່​ເປີດ​ໂອກາດ​ ໃຫ້​ບັນດາ​ຊາ​ວໜຸ່ມ-​ໄວ​ໜຸ່ມ, ກຳມະກອນລາວ​ ບັນດາ​ເຜົ່າ ​ໄດ້​ສະ​ແດງ​ຄວາມ​ຮູ້​, ຄວາມ​ສາມາດ, ທັກ​ສະສີ​ມື  ທັງ​ເປັນ​ການ​ຊຸກຍູ້​ສົ່ງ​ເສີມ​ໃຫ້​ບັນດາ​ຊາວ​ໜຸ່ມ​ ເຫັນ​ຄວາມ​ສຳຄັນ​ ໃນ​ການ​ຝຶກ​ວິຊາ​ຊີບ ​ແລະ ການ​ພັດທະນາ​ສີມື​ແຮງ​ງານ​ ໃຫ້​ຫລາຍ​ຂຶ້ນ. ການ​​ແຂ່ງຂັນ​ໃນ​ຄັ້ງນີ້, ​​ເພື່ອ​ຄັດ​ເລືອກ​ເອົາ​ນັກ​ແຂ່ງ​ຂັນ ​ຜູ້​ໜຸ່ມ​ນ້ອຍ ​ທີ່ມີ​ສີມື​ດີ​ເລີດ​ ໄປ​ຝຶກ​ຊ້ອມ ​ແລະ ​ເປັນ​ຕົວ​ແທນ ​ທີ​ມຊາດ​ລາວ ​ເຂົ້າ​ຮ່ວມ​ການ​ແຂ່ງ​ຂັນສີມື​ແຮງ​ງານ ​ອ​າຊຽນ ຄັ້ງ​ທີ 12 ຢູ່​ປະ​ເທດ​ໄທ ​ໃນ​ທ້າ​ຍ​ເດືອນ​ສິງຫາ  ຫາ ຕົ້ນ​ເດືອນ​ກັນຍາ ນີ້.

ການ​ແຂ່ງຂັນ​ດັ່ງກ່າວ​, ມີ​ນັກ​ແຂ່ງ​ຂັນ​ຕົວ​ຈິງ ​ທັງ​ໝົດ 66 ຄົນ ​ເພດ​ຍິງ 14 ຄົນ ມີ 7 ສາຂາ​ຊ່າງ ​ແລະ ​ໄດ້​ຜູ້​ທີ່​ຖືກ​ຄັດ​ເລືອກ 21 ຄົນ ​ເຊັ່ນ: ສາຂາ​ວິຊາ​ຊ່າງ​ໄມ້​ເຄື່ອງ​ເຮືອນ ​ໄດ້​ຫລຽນ​ຄຳ ແມ່ນ ທ້າວ ສີ ປະ​ເສີດ ມາ​ຈາກ ​ສູນ​ພັດທະນາ ​ແລະ ທົດ​ສອບ​ສີມື​​ແຮງ​ງານ ​ເວດ​ສະ​ພົງ, ຫລຽນ​ເງິນ ແມ່ນ​ ທ້າວ ສົມ​ຈັນ ບົວ​ຄຳ ຈາກ​ໂຮງງານ​ປຸ່ງ​ແຕ່ງ​ໄມ້​ສຳ​ເລັດ​ຮູບ ​ມູນ​ເທວາ, ຫລຽນ​ທອງ ​ແມ່ນ ທ້າວ ສົມ​ສຸກ ສີສະ​ຫວັດ ຈາກ​ໂຮ​ງານ​ປຸງ​ແຕ່ງ​ໄມ້​ສຳ​ເລັດ​ຮູບ ​ຄົບ​ວົງ​ຈອນ ທີ​ເອັນ​ເຄ ຫລວງ​ພະ​ບາງ; ສາຂາ​ວິຊາ​ຊ່າງ​ກໍ່ ​ໄດ້​ຫລຽນ​ຄຳ ​ແມ່ນ ທ້າວ ມີ ຂັນ​ທະ​ມາລີ ມາ​ຈາກ ​ວິທະຍາ​ໄລ ​ເຕັກນິກ​ປາກ​ປ່າ​ສັກ, ຫລຽນ​ເງິນ ​ແມ່ນ​ ທ້າວ ສີນ​ວນ ​ເພັງ​ສະຫວັດ ມາ​ຈາກ​ ກຸ່ມ​ດວງ​ຈຳປາ​ການ​ກໍ່, ຫລຽນ​ທອງ ​ແມ່ນ ທ້າວ ອຸ່ນ​ສຸ​ລິດ ບຸນ​ນິວົງ ມາ​ຈາກ​ ວິທະຍາ​ໄລ ​ເຕັກນິກ​ປາກ​ປ່າ​ສັກ; ສາຂາ​ວິຊາ​ຊ່າງ​ຕິດ​ຕັ້ງ​ໄຟຟ້າ​ ໃນ​ອາຄານ ​ໄດ້​ຫລຽນ​ຄຳ ​ແມ່ນ ທ້າວ ສຸວັນ​ໄຊ ​ແສງ​ຈັນ ຈາກ​ສະ​ຖາ​ບັນ​ ພັດທະນາ​ສີມື​ແຮງ​ງານ ລາວ-​ເກົາຫລີ, ຫລຽນ​ເງິນ ​ແມ່ນ​ ທ້າວ ​ໄມ​ອ່ອນ ສົມບັດ​ຈະ​ເລີ​ນ ຈາກ​ ສະ​ຖາ​ບັນ​ພັດທະນາ​ສີມື​ແຮງ​ງານ ລາວ-​ເກົາຫລີ, ຫລຽນ​ທອງ ​ແມ່ນ ທ້າວ ຈັນ​ລະຄອນ ຈັນທະ​ພອນ ຈາກ​ວິທະຍາ​ໄລ ​ເຕັກນິກ​ວິຊາ​ຊີບ ​ແຂວງ​ ຫລວງ​ພະ​ບາງ; ສາຂາ​ວິຊາ​ຊ່າງ​ຫຍິບ​ເຄື່ອງນຸ່ງ ໄດ້​ຫລຽນ​ຄຳ ​ແມ່ນ ນາງ ມະ​ໄລ​ພອນ ​ໄຊ​ຍະ​ວົງ ຈາກສູ​ນ ພັ​ດທະ​ນາ​ສີມື​ຕັດ​ຫຍິບ, ຫລຽນ​ເງິນ ​ແມ່ນ ນາງ ພຸດ​ມີນາ ​ໄຊ​ຈັນ​ເພັງ ຈາກສູ​ນ ພັ​ດທະ​ນາ​ສີມື​ຕັດ​ຫຍິບ, ຫລຽນ​ທອງ ​ແມ່ນ ນາງ ບຸ​ນມີ ພູ​ດາ​ລີ ຈາກ​ວິທະຍາ​ໄລ ​ເຕັກນິກ​ປາກ​ປ່າ​ສັກ; ສາຂາ​ວິຊາ​ຊ່າງ​ ປຸງ​ແຕ່ງອາຫານ ໄດ້​ຫລຽນ​ຄຳ ​ແມ່ນ ວັນ​ເພັງ ຈັນທະ​ວົງ ຈາກ​ສະ​ຖາ​ບັນ​ ການທ່ອງທ່ຽວ ​ແລະ ການ​ໂຮງ​ແຮມ​ແຫ່ງ​ຊາດ, ຫລຽນ​ເງິນ ​ແມ່ນ ທ້າວ ລັດຕະນະ​ກຸນ ​ແກ້ວ​ປະ​ເສີດ ຈາກ​ ສະ​ຖາ​ບັນ​ການທ່ອງທ່ຽວ ​ແລະ ການ​ໂຮງ​ແຮມ​ແຫ່ງ​ຊາດ, ຫລຽນ​ທອງ ​ແມ່ນ ນາງ ວາດ​ສະໜາ ພົງ​ປະຈິດ ຈາກ​ ສະ​ຖາ​ບັນ​ການທ່ອງທ່ຽວ ​ແລະ ການ​ໂຮງ​ແຮມ​ແຫ່ງ​ຊາດ; ສາຂາ​ວິຊາ​ຊ່າງ​ເຕັກ​ໂນ​ໂລ​ຊີ​ ອອກ​ແບບ​ກຣາບຟິກ ໄດ້​ຫລຽນ​ຄຳ ​ແມ່ນ ທ້າວ ຄຳ​ເກີດ ຟານ​ຄຳ ຈາກ​ຄະນະ​ວິສະວະກຳ​ສາດ ມະຫາວິທະຍາ​ໄລ​ແຫ່ງ​ຊາດ, ຫລຽນ​ເງິນ ​ແມ່ນ ປາ​ຫວີດ ຈັນທະ​ວົງ ຈາກ​ຄະນະ​ວິສະວະກຳ​ສາດ ມະຫາວິທະຍາ​ໄລ​ແຫ່ງ​ຊາດ, ຫລຽນ​ທອງ ​ແມ່ນ ທ້າວ ສົມ​ຊາຍ ສະ​ວັນນະ​ຮັກ ຈາກ​ສູນ ພັດທະນາ​ສີມື​ແຮງ​ງານ ນະຄອນຫລວງ​ວຽງ​ຈັນ ແລະ ສາຂາ​ວິຊາ​ຊ່າງ​ຈອດ​ໂລຫະ ໄດ້​ຫລຽນ​ຄຳ ​ແມ່ນ ທ້າວ ​ເມັ່ງ​ຢ່າງ ​ແສງ​ດາວ ຈາກ​ວິທະຍາ​ໄລ​ເຕັກ​ນິກ ລາວ-​ເຢຍລະ​ມັນ, ຫລຽນ​ເງິນ ​ແມ່ນ ທ້າວ ພິດ ສຸ​ນິກອນ ຈາກ​ວິ​ທະຍາ​ໄລ​ເຕັກນິກ​-ວິຊາ​ຊີບ​ຫລວງ​ພະ​ບາງ, ຫລຽນ​ທອງ ​ແມ່ນ ນາງ ພິນ ລໍ​ວັນ​ຄຳ ຈາກ​ວິ​ທະຍາ​ໄລ​ເຕັກ ນິກ​-ວິຊາ​ຊີບ​ຫລວງ​ພະ​ບາງ.

ນັກ​ແຂ່ງຂັນ​ ແຕ່ລະສາຂາ​ຊ່າງ ທີ່​ໄດ້​ຫລຽນ​ຄຳ, ຫລຽນເງຶນ ແລະ ຫລຽນທອງ ແມ່ນ​ໄດ້​ຮັບ​ເງິນສົດ 3 ລ້ານ, 2 ລ້ານ ແລະ 1 ລ້ານ​ກີບ, ພ້ອມ​ທັງ​ໄດ້​ຮັບ​ໃບ​ຢັ້ງຢືນ​ ການ​ເຂົ້າ​ຮ່ວມ​ແຂ່ງຂັນ​ສີມື​ແຮງ​ງານ​ແຫ່ງ​ຊາດ​ຄັ້ງ​ທີ 3. 

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)