GMT+7 23/04/2018 10:56

ສາລະວັນ ສຳເລັດການປະກວດນາງສາວອາພອນ ໃນງານສະເຫລີມ ສະຫລອງປີທ່ອງທ່ຽວລາວ ປີ 2018

 

 

​ເມື່ອ​ບໍ່​ດົນ​ມາ​ນີ້, ​ແຂວງ​ ສາລະ​ວັນ ​ໄດ້​ຈັດງານ ການປະກວດອາພ​ອນ ​ໃນ​ໂອກາດສະເຫລີມສະຫລອງ ປີທ່ອງທ່ຽວລາວ 2018​ ​​ເຊິ່ງມີຜູ້​ເຂົ້າປະກວດ ທັງໝົດ 29 ຄົນ, ທີ່ມາຈາກຕົວແທນ ແຕ່ລະສຳນັກງານ, ອົງການ,  ບໍລິສັດຕ່າງໆ ແລະ 8 ຕົວເມືອງຂອງ ແຂວງສາລະວັນ, ໂດຍຄະນະກຳມະການ ໄດ້​ໃຊ້ມາດຖານການໃຫ້ຄະແນນ 3 ມາດຖານຄື: ຄວາມ​ງາມ, ບຸກຄະ​ລິກ ແລະ ການແຕ່ງກາຍຂອງນາງສາວ​ ໃນ​ແຕ່​ລະ​ຊຸດ.

ຜ່ານ​ການ​ແຂ່ງຂັນສາມາດ ຊອກ​ໄດ້ ນາງສາວຜູ້ທີ່ງົດງາມ ແລະ ໄດ້ຕາມມາດຖານເງື່ອນໄຂ ທີ່ຄະນະກໍາມະການກໍານົດໄວ້ ແລະ ສາມາດເປັນນາງສາວອາພອນ  ສາລະວັນ ໄດ້ຮັບລາງວັນຊະ​ນະ​ເລີດ ​ແມ່ນ ນາງສາວ ​ໂດ​ສິດ​ຊາ​ ບຸນ​ທະວິ​ສານ ມາຈາກ ສະຫະພັນ​ແມ່ຍິງ ໜ່ວຍລາວໂທລະຄົມສົ່ງເຂົ້າປະກວດ ໄດ້ຮັບມຸງກຸດ ແລະ ເງິນສົດ 5 ລ້ານກີບ ພ້ອມສາຍສະພາຍ, ຮອງ ອັນດັບ 1  ​ໄດ້​ແກ່ນາງສາວ ວະ​ໄລ​ລັກ ອິນ​ທະ​ສິດ ບໍລິສັດ​ ອິນ​ທະ​ສິດ​ສົງ​ເຂົ້າ​ປະ​ກວດ ໄດ້ຮັບເງິນສົດ 3 ລ້ານ​ກີບ ​ພ້ອມ​ສາຍ​ສະພາຍ, ຮອງ​ອັນ​ດັບ 2 ​ມີ 3 ນ້ອງ​ນາງ​ສາວ​ຄື: ​ນາງສາວ ນີ່​ນາ ຈັນທະ​ວົງ  ຮ້ານ​ນາງສົມ​ໃຈ​ຮັກ ຄຳ​ຜຸຍ ບີ້​ຕີ້​ ເມືອງ​ຄົງ​ເຊ​ໂດນ ສົ່ງ​ເຂົ້າ​ປະ​ກວດ, ນາງສາວ ດວງ​ໃຈ ​ແສງ​ອາ​ລຸນ ຮ້ານ​ຖ່າຍຮູບ​ໂຕ​ໂນ້ສະຕູ​ດີ​ໂອ ສົ່ງ​ເຂົ້າ​ປະ​ກວດ ​ແລະ ​ນາງ​ສາວ ສຸ​ລີ​ສາ ​ແທ່ງ​ສົມບັດ ຮ້ານ​ພອນ​ປະ​ເສີດ ​ແອ​ເຢັນ​ສົ່ງ​ເຂົ້າ​ປະ​ກວດ ​ໄດ້​ຮັບ​ເງິນສົດ​ຄົນ​ລະ 2 ລ້ານ​ກີບ​ ພ້ອມ​ສາຍ​ສະພາຍ. ສຳລັບ​ນາງ​ສາວຂວັນ​ໃຈ​ຊ່າງ​ພາບ​ ໄດ້​ແກ່ ນາງ​ສາວ ສຸ​ລີ​ສາ ​ແທ່ງ​ສົມບັດ  ຮ້ານ​ພອນ​ປະ​ເສີດ​ແອ​ເຢັນ ​ສົ່ງ​ເຂົ້າ​ປະ​ກວດ​ ​ໄດ້​ຮັບ​ເງິນສົດ 1.500.000 ກີບ ​ພ້ອມ​ສາຍ​ສະພາຍ.

ເຂົ້າຮ່ວມ​ໃນ​ງານ​ປະກອວດ​ຄັ້ງ​ນີ້  ມີ ທ່ານ ສີ​ສຸວັນ ວົງ​ຈອມ​ສີ ກຳມະການສູນກາງພັກ ເລຂາພັກແຂວງ ເຈົ້າແຂວງໆ ສາລະວັນ, ມີບັນດາ​​ການນໍາ ຂອງແຂວງ, ເມືອງ ແລະ ແຂກຖືກເຊີນຈາກພາກສ່ວນ​ຕ່າງໆ,  ພ້ອມດ້ວຍມວນຊົນ ພາຍໃນເຂົ້າຮ່ວມຊົມ​ຮ່ວມ​ເຊຍ ຢ່າງ​ຫລວງຫລາຍ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)