GMT+7 23/04/2018 10:53

ອົງການໄອຍະການປະຊາຊົນສູງສຸດ ສສ ຫວຽດນາມ ເຜີຍແຜ່ 2 ກົດໝາຍສຳຄັນ

 

 

ໃນວັນທີ 29 ມີນາ 2018 ຢູ່ ນະຄອນຫລວງວຽງຈັນ, ອົງການໄອຍະການ ປະຊາຊົນສູງສຸດ ໄດ້ຈັດປາຖະກະຖາ ໃນ 2 ຫົວຂໍ້ໃຫຍ່ ຄື ບາງບັນຫາ ປັບປຸໃໝ່ ກ່ຽວກັບ ການປະມວນກົດໝາຍແພ່ງ ແລະ ກົດໝາຍວ່າດ້ວຍ ການດຳເນີນ ຄະດີປົກຄອງ ແຫ່ງ ສສ ຫວຽດນາມ, ໂດຍການເປັນປະທານ ຮ່ວມຂອງທ່ານ ໄຊຊະນະ ໂຄດພູທອນ ຮອງຫົວໜ້າ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ທ່ານ ນາງ ຫງວຽນທິທຸຍ ຄຽມ ຮອງຫົວໜ້າ ອົງການໄອຍະ ການປະຊາຊົນສູງສຸດ ແຫ່ງ ສສ ຫວຽດນາມ ມີບັນດາ ຫົວໜ້າກົມ, ຮອງກົມ, ພ້ອມດ້ວຍ ພາກສ່ວນກ່ຽວຂ້ອງ ລາວ-ຫວຽດນາມ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ນາງ ຟ້າມຮ່ວງຢຽວ ລິງ ຮອງຫົວໜ້າ ກົມນິຕິກໍາ ແລະ ຄຸ້ມຄອງວິທະຍາສາດ ໄດ້ປາຖະກະຖາ ໃນຫົວຂໍ້ບາງບັນຫາປັບປຸງໃໝ່ ກ່ຽວກັບ ປະມວນກົດໝາຍແພ່ງແຫ່ງ ສສ ຫວຽດນາມ, ເຊິ່ງທ່ານໄດ້ຍົກໃຫ້ເຫັນ ເຖິງຈຸດປະສົງທັດສະນະ ໃນການຊີ້ນຳ ການສ້າງປະມວນກົດໝາຍແພ່ງປີ 2015, ໂຄງສ້າງ ແລະ ເນື້ອໃນພື້ນຖານ ການປະມວນກົດໝາຍແພ່ງ ປີ 2015.

ພ້ອມນີ້, ທ່ານ ເວືອງວັນ ແບບ ຮອງຫົວໜ້າ ກົມຕິດຕາມກວດກາ ແກ້ໄຂຄະດີ ປົກຄອງ, ຄະດີການຄ້າ, ແຮງງານ ແລະ ບັນດາວຽກອື່ນໆ ຕາມຂໍ້ກຳນົດກົດໝາຍ ໄດ້ປາຖະກະຖາ ໃນຫົວຂໍ້: ບາງບັນຫາ ປັບປຸງໃໝ່ຂອງກົດໝາຍ ວ່າດ້ວຍ ການດຳເນີນຄະດີ ກົດໝາຍປົກຄອງແຫ່ງ ສສ ຫວຽດນາມ, ເຊິ່ງທ່ານ ໄດ້ຍົກໃຫ້ເຫັນ ຈຸດປະສົງ ທັດສະນະໂຄງສ້າງ ແລະ ເນື້ອໃນພື້ນຖານ ຂອງກົດໝາຍວ່າດ້ວຍ ການດຳເນີນຄະດີປົກຄອງ.

ການປາຖະກະຖາ ໃນຄັ້ງນີ້, ມີຄວາມໝາຍ ຄວາມສຳຄັນຫລາຍ ເພາະເຮັດໃຫ້ພະນັກງານ  ອົງການໄອຍະການ ປະຊາຊົນ ແຫ່ງ ສປປ ລາວ ໄດ້ຮັບຮູ້ ກ່ຽວກັບບົດຮຽນໃໝ່ ແລະ ອັນຄ້າຍຄື, ພ້ອມທັງ ເຫັນຄວາມແຕກຕ່າງ ລະຫວ່າງ ລະບົບກົດໝາຍ ຂອງສອງປະເທດ ລາວ-ຫວຽດນາມ ໂດຍສະເພາ ແມ່ນກົດໝາຍວ່າດ້ວຍ ການດຳເນີນຄະດີປົກຄອງ. ໃນປັດຈຸບັນ ກົດໝາຍວ່າ ດ້ວຍການດຳເນີນຄະດີ ປົກຄອງ ຢູ່ ສປປ ລາວ ຍັງບໍ່ທັນມີກົດໝາຍ ສະບັບນີ້ເທື່ອ, ສະນັ້ນ, ຈຶ່ງເປັນບົດຮຽນ ອັນສຳຄັນ ແລະ ມີຄຸນປະໂຫຍດ ຢ່າງຫລວງຫລາຍ ເຂົ້າໃນການຄົ້ນຄ້ວາ ແລະ ເປັນຂໍ້ມູນ ໃນການສ້າງກົດໝາຍສະບັບນີ້ໃນອະນາຄົດ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)