GMT+7 23/04/2018 10:57

ຜົນສຳເລັດການຈັດຕັ້ງປະຕິບັດກົດໝາຍປ່າໄມ້ ການຄຸ້ມຄອງ ແລະ ການຄ້າໄມ້

 

 

ພາຍຫລັງ​ທີ່​​ໂຄງການ FLEGT VPA ຫລື ​ເອີ້ນວ່າ ການຈັດຕັ້ງ ປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ສີ້ນສຸດ​ລົງ, ທ່ານນາ​ງ ​ເພັດ​ດາ​ວັນ ສີປະ​ເສີດ ຫົວໜ້າ ​​ໂຄງ ການ FLEGT VPA ໄດ້ໃຫ້​ຮູ້​ເຖິງ​ຜົນ​ສຳ​ເລັດ ຂອງ​​ໂຄງການ​ວ່າ: ​ມັນໄດ້​ສະ​ແດງ​ ອອກ​ໃນ​ການປະກອບສ່ວນ ເຂົ້າໃນການພັດທະນາ ຮ່າງນິຍາມ ໄມ້ທີ່ຖືກກົດໝາຍ, ການຢຸດຕິ ການສົ່ງອອກໄມ້ທ່ອນ ແລະ ໄມ້ເຄິ່ງສຳເລັດຮູບ ແມ່ນສາມາດ ສົ່ງຜົນເຮັດໃຫ້ການຕັດໄມ້ ແບບຊະຊາຍ ແລະ ບໍ່ຖືກຕ້ອງ ຕາມກົດໝາຍຫລຸດລົງ, ມີ 11 ບ້ານເປົ້າໝາຍ ໃນໂຄງການ ໄດ້ຮັບການ ປຶກສາຫາລື ກ່ຽວກັບການຄຸ້ມຄອງ ແລະ ກົດລະບຽບປ່າໄມ້ຕ່າງໆ ໃນການຄຸ້ມຄອງປ່າໄມ້ ຊ່ອຍໃຫ້​ປະຊາຊົນທ້ອງຖິ່ນ ໃນພື້ນທີ່ໂຄງການ ​ແລະ ພວກ​ເຂົາ​ກໍສາມາດ ເຂົ້າໃຈເຖິງສິດ, ໜ້າທີ່ ແລະ ຜົນປະໂຫຍດໃນການຄຸ້ມຄອງປ່າໄມ້ ແບບມີສ່ວນຮ່ວມ. ນອກຈາກນັ້ນ, ໂຮງງານປຸງແຕ່ງ ໄມ້ ລະດັບຄົວເຮືອນ 21 ແຫ່ງ  ຍັງໄດ້ເຂົ້າຮ່ວມກິດຈະກໍາ ການສ້າງຄວາມອາດສາມາດ ໃນການປັບ ປຸງ ມາດຕະຖານ ແລະ ຄວາມປອດໄພ ທາງດ້ານແຮງງານ ຈົນ​ສາ​ມາດ ​ກັບ​ມາ​ເປີດ​​ໂຮງງານ​ປຸງ​ແຕ່ງ​ໄມ້ ​ໄດ້​ຄືນ ​ໂດຍ​ປະຕິບັດ​ຕາມ​ລະບຽບການ ​ຢ່າງ​ຖືກ​ຕ້ອງ ​ແລະ ມີ ​ແບບ​ແຜນ​ກ່ວາ​ເກົ່າ.

ອົງການ WWF ໄດ້ຮ່ວມກັບ ພາກລັດ ແລະ ອົງການຈັດຕັ້ງຕ່າງໆ ທີ່ກ່ຽວຂ້ອງ ໃນການຈັດຕັ້ງປະຕິບັດຄຳ ສັ່ງເລກທີ 15/ນຍ, ໂດຍສະເພາະ ໃຫ້ການສະໜັບສະໜູນ ການພົວພັນລະຫວ່າງ ສອງຝ່າ​ຍ ກະຊວງກະສິກຳ ແລະ ປ່າໄມ້ ຂອງລາວ ແລະ ກົມປ້ອງກັນ ປ່າໄມ້ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃນການຮ່ວມມື ຕໍ່ການສະກັດກັ້ນ ການຄ້າໄມ້, ສັດປ່າ ແລະ ເຄື່ອງປ່າ ຂອງດົງ ທີ່ຜິດກົດໝາຍ, ໂດຍສະເພາະ ໃນຂອບເຂດຊາຍແດນ ຂອງທັງສອງປະເທດ. ຈາກການຮ່ວມມື ດັ່ງກ່າວ, ສາມາດຈັດຕັ້ງ ທີມລາດຕະເວນຮ່ວມ  ເພື່ອຕິດຕາມກວດກາ ແລະ ແລກປ່ຽນ ຂໍ້ມູນຂ່າວສານ ກ່ຽວກັບ ສະພາບການຕັດໄມ້, ການຄ້າໄມ້ ທີ່ຜິດກົດໝາຍ ໄດ້ຢ່າງມີປະສິດຕິພາບ. ພາຍຫລັງ ການຈັດ​ຕັ້ງ​ປະ​ຕິ​ບັດ ຢູ່​ຂົງ​ເຂດ​ສອງ​ແຂວງ​ພາ​ກ​ໃຕ້ ແຂວງອັດຕະປື ​ແລະ ແຂວງຄຳ​ມ່ວນ ​ເປັນ​​ເວລາ 2 ປີເຄິ່ງ ​ແລະ ​ຈ​ະມີ​ການປິດ​​ໂຄງການ​  ໃນ​ວັນ​ທີ 27​ ມີນາ 2018 ທີ່​ແຂ​ວງຄຳ​ມ່ວນ.

ໂຄງການດັ່ງກ່າວ​, ແມ່ນ ​​ໂຄງ​ການ​ທີ່​ນອນ​ຢູ່​ພາຍ​ໃຕ້​ອົງການ ກອງ​ທຶນ​ອະນຸ​ລັກ​ທຳ​ມະ​ຊາດ​ໂລ​ກ ປະຈຳ ສປປ ລາວ, ​​ເຊິ່ງມີ​ເປົ້າໝາຍ ແນ​ໃສ່​ຫລຸ​ດຜ່ອນ ການ​ຕັ​ດ​ໄ​ມ້ຜິ​ດກົດໝາຍ, ​ໂດຍ​ສ້າງ​ຄວາ​ມ​ເຂັ້ມ​ແຂງ​ ໃນ​ການຄຸ້ມ​ຄ​ອງປ່າ​ໄມ້ ​ແບບ​ຍືນຍົງ ​ແລະ ສ​ອດຄ່ອງ​ ກັບ​ກົດໝາຍ,​ ສົ່ງ​ເສີມ​ນະ​ໂຍບາຍ​ຂອງ​ລັດ ​ໃນ​ການຈັດ​ຊື້, ປັບປຸງ​ການ​ຄຸ້ມ​ຄອງ ​ແລະ ສົ່ງ​ເສີມ​ການ​ຄ້າ​ໄມ້​ ທີ່​ຖືກກົດໝາຍ. ນອກຈາກ​ນັ້ນ, ​ໂຄ​ງການ FLEGT ຍັງ​ສະໜັບສະໜູນ ການ​ມີ​ສ່ວນ​ຮ່ວມ​ ຂອງພາກ​ເອກ​ກະ​ຊົນ ​​ເພື່ອ ​ສົ່ງ​​ເສີມ​ຜະ​ລິ​ດຕະພັນ​ໄມ້​ ໃຫ້ຖືກ​ຕ້ອງ ​ຕາມ​ລະບຽບກົດໝາຍ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)