GMT+7 23/04/2018 10:53

ໄຊຍະບູລີທຳລາຍ ສິນຄ້າໝົດອາຍຸ ແລະ ສິນຄ້ານຳເຂົ້າຜິດກົດໝາຍ

 

 

ທ້າຍອາທິດຜ່ານມາ, ພະແນກອຸດສາຫະກຳ ແລະ ການຄ້າ ແຂວງໄຊຍະບູລີ, ໄດ້ຈັດພິທີທຳລາຍ ສິນຄ້າໝົດອາຍຸ ແລະ ສິນຄ້ານຳເຂົ້າທີ່ຜິດກົດໝາຍ ຫລາຍລາຍການ ເປັນຕົ້ນ ສິນຄ້າໝົດອາຍຸ ປະເພດເຂົ້າໜົມ, ໜີ່, ນົມ, ນ້ຳອັດລົມ, ເຄື່ອງປຸງແຕ່ງອາຫານ, ປາມຶກສົດ, ປະເພດສິນຄ້າ ນອກລະບົບ-ສິນຄ້າເຖື່ອນມີ ຢາສູບ 10 ຕຸດ, ສິນຄ້າຫ້າມນຳເຂົ້າ ແລະ ຫ້າມຈຳໜ່າຍມີ ໝໍ້ຊອດປາ, ໝໍ້ດູດ 78 ໜ່ວຍ, ຈັກສະຕີນ 3 ເຄື່ອງ, ໂສ້ຈັກສະຕີນ 26 ເສັ້ນ. ລວມມູນ ຄ່າສິນຄ້າ ທີ່ທຳລາຍທັງໝົດ 20 ກວ່າລ້ານກີບ.

ທ່ານ ທອງດີ ທິແກ້ວ ຫົວໜ້າ ຂະແໜງການຄ້າພາຍໃນ, ພະແນກອຸດສາຫະກຳ ແລະ ການຄ້າແຂວງ ໄດ້ເປີດເຜີຍວ່າ: ເພື່ອສະກັດກັ້ນ ການສວຍໂອກາດຂອງບັນດາ ຜູ້ປະກອບການຈຳນວນໜຶ່ງ ທີ່ຄິດເຖິງຜົນປະໂຫຍດສ່ວນຕົວ ໂດຍບໍ່ຄຳນຶງເຖິງ ສຸຂະພາບຂອງຄົນອື່ນ ນຳເຂົ້າສິນຄ້າ ທີ່ບໍ່ມີຄຸນນະພາບ ແລະ ສິນຄ້າທີ່ຜິດລະບຽບ ກົດໝາຍເຂົ້າມາວາງຂາຍ ຢູ່ພາຍໃນແຂວງໄຊຍະບູລີ, ສະນັ້ນ ພາຍໃຕ້ການຊິ້ນຳ ຂອງຄະນະພະແນກອຸດສາຫະກຳ ແລະ ການຄ້າ ແຂວງ, ໄດ້ຊິ້ນຳໜ່ວຍງານເຈົ້າໜ້າທີ່ໆ ກ່ຽວຂ້ອງເຊັ່ນ: ພະແນກ ສາທາລະນະສຸກແຂວງ, ພະແນກກະສິກຳ ແລະ ປ່າໄມ້ແຂວງ, ເຈົ້າໜ້າທີ່ ປກສ ແຂວງ ຈຶ່ງໄດ້ລົງກວດກາ ບັນດາຫົວໜ່ວຍທຸລະກິດ ຢູ່ເມືອງໄຊຍະບູລີ ຈຳນວນ 30 ກວ່າຮ້ານ ແລະ ພົບເຫັນ, ຢຶດສິນຄ້າ ທີ່ບໍ່ຖືກຕ້ອງທັງໝົດ 10 ກ່ວາລາຍການ, ໂດຍເລີ່ມຈັດຕັ້ງປະຕິບັດ ມາແຕ່ກາງເດືອນ ກຸມພາ ປີ 2018 ເປັນຕົ້ນມາ ແລະ ກໍໄດ້ມີພິທີ ທຳລາຍສິນຄ້າດັ່ງກ່າວໃນຄັ້ງນີ້.

ສິນຄ້າ ທີ່ນຳມາທຳລາຍໃນຄັ້ງນີ້ ແມ່ນມີຜົນສະທ້ອນ ອັນບໍ່ດີຕໍ່ສຸຂະພາບ ຂອງຜູ້ບໍລິໂພກ ແລະ ຍັງມີຜົນສະທ້ອນທາງລົບ ຕໍ່ເສດຖະກິດ-ສັງຄົມຂອງຊາດ ກໍຄື ຂອງແຂວງໄຊຍະບູລີ ອີກດ້ວຍ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)