GMT+7 23/04/2018 10:57

ກອງປະຊຸມ ແລກປ່ຽນປະສົບການ ຂອງບຸກຄົນທີ່ໃຊ້ ພາສາຝຣັ່ງ

 

 

ໃນວັນທີ 21 ມີນາ 2018 ຢູ່ມະຫາວິທະຍາໄລ ແຫ່ງຊາດລາວ (ມຊ) ໄດ້ຈັດກອງປະຊຸມສົນທະນາ ແລກປ່ຽນປະສົບການ ຂອງບຸກຄົນທີ່ໃຊ້ ພາສາຝຣັ່ງ ແລະ ກອງປະຊຸມໂຕະມົນ, ໃນຫົວຂໍ້ " ພາສາຝຣັ່ງ ຄືທຸກສິ່ງທຸກຢ່າງ ຂອງຂ້ອຍສຳລັບອະນາຄົດ", ໂດຍການຮ່ວມມື ລະຫວ່າງ ພະແນກຮ່ວມມື ແລະ ກິດຈະກຳ ດ້ານວັດທະນະທຳ ຂອງສະຖານທູດຝຣັ່ງ, ສະຖາບັນຝຣັ່ງ ປະຈຳລາວ, ອົງການມະຫາວິທະຍາ ໄລຝຣັ່ງໂກໂຟນີ (AUF), ສູນຝຣັ່ງໂກໂຟນ ແລະ ມະຫາວິທະຍາໄລແຫ່ງຊາດ (ມຊ), ໂດຍການເຂົ້າຮ່ວມ ຂອງທ່ານ ຄຳຜາຍ ສີສະຫວັນ ຮອງ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ນາງ ໂກລດີນ ເລີດູ ເອກອັກຄະລັດຖະທູດຝຣັ່ງ ປະຈຳລາວ, ທ່ານ ນາງ ສົມຈັນ ບຸນພັນມີ ຮອງ ອະທິການບໍດີ ມະຫາວິ ທະຍາໄລແຫ່ງຊາດ ແລະ ທ່ານ ນາງ ຊຸຍລີ ເອລ ມູຕາອູກິນ-ຮຸດໂຊ ຜູ້ຮັບຜິດຊອບ ອົງການມະຫາ ວິທະຍາໄລ ຝຣັ່ງໂກໂຟນີ ປະຈຳ ນະຄອນຫລວງວຽງຈັນ, ພ້ອມດ້ວຍນັກສຶກສາ ເຂົ້າຮ່ວມ 300 ກວ່າຄົນ.

ຈຸດປະສົງ ການຈັດງານໃນຄັ້ງນີ້, ແມ່ນຈັດເປັນ ເວທີສົນທະນາ ແລກປ່ຽນ ປະສົບປະການ ຂອງບຸກ ຄົນທີ່ ໃຊ້ພາສາຝຣັ່ງ ທີ່ປະສົບຜົນສຳເລັດ, ເຊິ່ງມີ 20 ກວ່າບໍລິສັດ ເຂົ້າຮ່ວມ ປະກອບມີ ສາຂາອາຊີບ ການທະນາຄານ, ການທ່ອງທ່ຽວ, ກົດໝາຍ, ປະກັນໄພ ແລະ ພະລັງງານ. ນອກຈາກນີ້, ບໍລິສັດ ທີ່ເຂົ້າຮ່ວມຍັງໄດ້ຮັບສະໝັກ ບັນດິດຝຣັ່ງໂກໂຟນີ  ຜູ້ທີ່ມີຄວາມສົນໃຈ ຢາກເຮັດວຽກນຳອີກ.

ໃນງານ ຍັງມີພະນັກງານ ຂອງແຕ່ລະບໍລິສັດ ມາໃຫ້ຂໍ້ມູນ ກ່ຽວກັບອາຊີບ, ການວາງຕົວ ແລະ ຄວາມສາມາດ ທີ່ຕ້ອງການ, ການຈຳລອງ ການສຳພາດງານ ແລະ ໃຫ້ຂໍແນະນຳ ກ່ຽວກັບ ການຊອກວຽກເຮັດ ໃນອະນາຄົດ. ນອກຈາກນີ້, ນັກສຶກສາ ຍັງສາມາດ ເຂົ້າຮ່ວມກອງປະຊຸມ ພາຍໃຕ້ຫົວຂໍ້ ທີ່ໜ້າສົນໃຈ ເປັນຕົ້ນ ຜົນສຳເລັດ ໃນການກ້າວເຂົ້າສູ່ການເຮັດວຽກ ໃນບໍລິສັດ, ການຊອກວຽກເຮັດງານທຳ ໂດຍຜ່ານໂທ ລະສັບມືຖື, 10 ຄຳແນະນຳດີໆ ເພື່ອການກໍ່ຕັ້ງ ບໍລິສັດ ແລະ ການເຂົ້າຮ່ວມ ນຳສະເໜີໂດຍກົງ ກ່ຽວກັບ ຫົວຄິດປະດິດສ້າງ ໃນການ ຮ່າງຊີວະປະຫວັດຫຍໍ້", ເຊິ່ງປີນີ້ ອົງການມະຫາວິທະຍາໄລ ຝຣັ່ງໂກໂຟນີ ຈະໄດ້ ຈັດການແຂ່ງຂັນ ພາຍໃຕ້ຫົວຂໍ້ " ຫົວໃຈສຳຄັນ ໃນການກ້າວເຂົ້າສູ່ວິຊາຊີບ".

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)