GMT+7 23/04/2018 10:53

ການທາບທາມຄຳຄິດເຫັນ ຕໍ່ຮ່າງກົດໝາຍວ່າດ້ວຍ ສຳນັກງານຜູ້ຕາງໜ້າ ແຫ່ງ ສປປ ລາວ ຢູ່ຕ່າງປະເທດ

 

 

ໃນວັນທີ 20-21 ມີນາ 2018 ທີ່ ຫ້ອງວ່າການ ປົກຄອງ ແຂວງ ຄໍາມ່ວນ, ກະຊວງ​ ການ​ຕ່າງປະ​ເທດ ​ໄດ້​ຈັດ​ຕັ້ງ​ກອງ​ປະຊຸມ ເພື່ອທາບທາມ ​ຄຳຄິດເຫັນນໍາ ເຈົ້າໜ້າທີ່ ຂັ້ນແຂວງ 05 ແຂວງພາກກາງ ຄື: ແຂວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ ແລະ ນະຄອນຫລວງວຽງຈັນ ຕໍ່ຮ່າງ​ ກົດໝາຍ​ວ່າ​ດ້ວຍສຳ ນັກງານ​ຜູ້ຕາງໜ້າ​ ແຫ່ງ ສປປ ລາວ ຢູ່ຕ່າງປະເທດ ພາຍ​ໃຕ້ການ​ເປັນ​ປະທານ ຮ່ວມຂອງ ​ທ່ານ ນາງ ຄໍາເພົາ​ເອີນ​ທະ​ວັນ, ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ແລະ ທ່ານ ຄຳສີ ອຸດທິວົງ ຮອງເຈົ້າແຂວງ ຄໍາມ່ວນ,ໂດຍມີບັນດາ ຮອງເຈົ້າແຂວງ, ຮອງປະທານ ກຳມາທິການການຕ່າງປະເທດ ສະພາແຫ່ງຊາດ, ບັນດາທ່ານ ຮອງປະທານ ສະພາປະຊາຊົນ ຂັ້ນແຂວງ​​, ສະມາຊິກສະພາ ແຫ່ງຊາດ ປະຈຳເຂດເລືອກຕັ້ງ, ຫົວໜ້າ ແລະ ຮອງຫົວໜ້າ ຫ້ອງວ່າການປົກຄອງແຂວງ, ຫົວໜ້າ ແລະ ຮອງຫົວໜ້າພະແນກ, ​ຜູ້ຕາງໜ້າຈາກຂະແໜງການ ທີ່ກ່ຽວຂ້ອງຂອງ 05 ແຂວງພາກກາງ ແລະ ນະຄອນຫລວງວຽງຈັນ ເຂົ້່າຮ່ວມ.

ກະຊວງ ການຕ່າງປະເທດ ໄດ້ຈັດຕັ້ງກອງປະຊຸມ ໃນຄັ້ງນີ້, ເປັນກອງປະຊຸມທາບທາມ ຄຳຄິດເຫັນຕໍ່ຮ່າງກົດໝາຍ​ວ່າ​ດ້ວຍ ສຳນັກງານ​ຜູ້ຕາງໜ້າ ​ແຫ່ງ ສປປ ລາວ ຢູ່ຕ່າງປະເທດ ຄັ້ງທີ 2 ພາຍຫລັງທີ່ໄດ້ຈັດຂຶ້ນ ຢູ່ ພາກໃຕ້, ກອງປະຊຸມ ໃນຄັ້ງນີ້ ມີຈຸດປະສົງ​ ເພື່ອທາບທາມຄໍາຄິດເຫັນ ນຳຜູ້ເຂົ້າຮ່ວມຂອງບັນດາ ແຂວງພາກກາງ. ຈາກນັ້ນ, ຈະສືບຕໍ່ຈັດກອງປະຊຸມທາບທາມ ຄຳຄິດເຫັນ ນຳອົງການປົກຄອງ ຂັ້ນແຂວງ ຢູ່ພາກເໜືອ. ພາຍຫລັງ ສຳເລັດການທາບທາມ ຄຳຄິດເຫັນ ທັງສາມພາກແລ້ວ ກໍຈະສັງລວມ ຄຳຄິດເຫັນ ແລະ ຂໍ້ສະເໜີ ເພື່ອນຳໄປປັບປຸງຮ່າງກົດໝາຍ ໃຫ້ມີເນື້ອ​​ໃນລະອຽດ, ຈະແຈ້ງ ​ແລະ ຄົບຖ້ວນສົມບູນ. ກົດໝາຍສະບັບນີ້, ກຳນົດຫລັກການ, ລະບຽບການ ແລະ ມາດຕະການ ກ່ຽວກັບ ການຈັດຕັ້ງ ແລະ ການເຄື່ອນໄຫວ ຂອງສຳນັກງານຜູ້ຕາງໜ້າ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢູ່ຕ່າງປະເທດ ລວມມີ  ສະຖານເອກອັກຄະລັດຖະທູດ, ສຳນັກງານ ຜູ້ຕາງໜ້າຖາວອນ ປະຈຳອົງການ  ຈັດຕັ້ງສາກົນ, ສະຖານກົງສຸນໃຫຍ່ ແລະ ສະຖານກົງສຸນ ຂອງ ສປປ ລາວ ຢູ່ຕ່າງປະເທດ ເພື່ອຮັບປະກັນ ການປະຕິບັດພາລະບົດບາດ, ສິດ ແລະ ໜ້າທີ່ ຂອງສຳນັກງານຜູ້ຕາງໜ້າ ໃຫ້ ມີປະສິດທິພາບ ແລະ ປະສິດທິຜົນ ສູງກວ່າເກົ່າ.

ກະຊວງການຕ່າງປະເທດ ມີແຜນຈະນຳເອົາ ຮ່າງກົດໝາຍສະບັບນີ້, ເຂົ້າ​ພິຈາລະນາ ຢູ່ກອງປະຊຸມລັດຖະບານ ໃນເດືອນມິຖຸນາ 2018. ຈາກນັ້ນ, ກໍຈະນຳເຂົ້າກອງ​ປະຊຸມ​ ສະພາແຫ່ງ​ຊາ​ດ ເພື່ອພິຈາລະນາ ໃນ​ເດືອ​ນຕຸລາ​ 2018. ກົດໝາຍ​ສະບັບນີ້, ເມື່ອຖືກຮັບຮອງໂດຍ ສະພາແຫ່ງຊາດ ຈະເປັນ​ບາດກ້າວ​ສຳ​ຄັນ​ ໃນ​ການ​ພັດທະນາ ​ລະບົບ​ນິຕິ​ກຳ ຂອງຂະ​ແໜງ​ການ ​ຕ່າງປະ​ເທດໃຫ້ຄົບຖ້ວນຍິ່ງຂຶ້ນ  ແນໃສ່​ເພີ່ມ​ທະວີ​ການ​ຄຸ້ມ​ຄອງວຽກງານ ການຕ່າງປະເທດ ດ້ວຍກົດໝາຍ ເທື່ອລະກ້າວ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)