GMT+7 23/04/2018 10:57

ສົ້ມປາ​ແຊບ​ ປ້າ​ນາງ ມັດ​ໃຈ​ຜູ້​ບໍລິ​​ໂພ​ກ

 

 

ທ້າຍອາທິດຜ່ານມານີ້ ທີມງານສຳນັກຂ່າວສານປະເທດລາວ ໄດ້ມີໂອກາດໄປຢ້ຽມຢາມ ເມືອງສັງທອງນະຄອນຫລວງວຽງຈັນ ແລະ ໄດ້ແວ່ພັກກິນ ເຂົ້າສວຍກັບອາຫານ ບ້ານນາຄື: ສົ້ມປາແຊບໆ ຢູ່ບ້ານປາກແທບ ທີ່ໃຜໆ ກໍເວົ້າເປັນສຽງດຽວ ກັນວ່າແຊບຊ້ອຍກັບລົດຊາດ ບ້ານນາທີ່ບໍ່ເນັ້ນເຄື່ອງ ປຸງລົດຊາດຫລາຍ ເປັນທີ່ຕິດອົກຕິດໃຈ ບາງຄົນກໍໄດ້ຊື່ຕິດໄມ້ຕິດມືກັບບ້ານ.

ປ້ານາງ ຜິວສະອາດ ເຈົ້າຂອງຜະລິດຕະພັນ ສົ້ມປາແຊບໄດ້ເວົ້າໃຫ້ຟັງວ່າ:  ກ່ອນທີ່ຈະມາເຮັດສົ້ມປາ ແມ່ນເຮັດຫລາຍອາຊີບ ຜ່ານມາ ແລ້ວ ບໍ່ວ່າຈະເປັນເກັບເຄື່ອງເສດຂາຍ, ຈືນກ້ວຍ, ກ້ວຍເຊື່ອມ ແລະ ອື່ນໆອີກ ແຕ່ເສດຖະກິດ ຄອບຄົວ ຍັງບໍ່ ໝັ້ນຄົງ ແລະ ບໍ່ພຽງພໍກັບຄ່າໃຊ້ຈ່າຍ. ໃນແຕ່ລະມື້ຕົນ ແລະ ຜົວ ຈຶ່ງມີແນວຄິດຫັນປ່ຽນອາຊີບ ແລ້ວມາເຮັດສົ້ມປາຂາຍ ເພາະວ່າລູກສາວ ໄດ້ໄປຮຽນວິທີ, ຂັ້ນຕອນການຜະລິດສົ້ມປາ ນຳພີ່ນ້ອງຢູ່ນະຄອນຫລວງ ວຽງຈັນ ແລ້ວມານຳໃຊ້ໃນ ຄອບ ຄອບຄົວ ແຕ່ປີ 2015 ເປັນຕົ້ນມາ ໂດຍເລີ່ມຕົ້ນເຮັດສົ້ມປາພຽງ 10 ກິໂລ ເພື່ອຂາຍພາຍໃນບ້ານ ແລະ ສົ່ງຕາມຮ້ານຕ່າງໆ ແຕ່ຜົນປາກົດວ່າລູກຄ້າ ຖືກໃຈໃຜກິນກໍ່ວ່າແຊບ ແລ້ວບອກຕໍ່ກັນ  ເຮັດໃຫ້ສົ້ມປາ ເລີ່ມເປັນທີ່ຮູ້ຈັກຢ່າງກວ້າງຂວາງ ມາປັດຈຸບັນນີ້ ຍອດການສັງຊືື້ແມ່ນ ເພີ່ມຂຶ້ນເລື້ອຍໆ, ໂດຍສະເລ່ຍແລ້ວ ທິດໜຶ່ງຈະສົ່ງ 2ເທື່ອໆໜຶ່ງ 100 ກວ່າພ່ວງ, ພ່ວງໜຶ່ງມີ 7 ຫໍ່ ຂາຍ 10 ພັນກີບ ແລະ ເດືອນໜຶ່ງສາ  ມາດສ້າງລາຍຮັບເຂົ້າ ຄອບຄົວ ປະມານ 6-7 ລ້ານກີບ. ສຳລັບຈຸດພິເສດ ຂອງສົ້ມປາ ແມ່ນການໃຊ້ປາຕອງ, ປາໂດທີ່ສົດສະອາດໃນ ແຕ່ລະມື້ເພື່ອໃຫ້ໄດ້ສົ້ມ ປາແຊບ ແລະ ກິນໄດ້ດົນ.

ປ້າ ນາງ ຜິວສະອາດ ຍັງໃຫ້ຮູ້ຕື່ມວ່າ:  ພາຍຫລັງໄດ້ມາເຮັດສົ້ມປາຂາຍ ແລະ ໄດ້ເຮັດເຂົ້າໂຄບຄຽງຄູ່ກັນ ໄປເຮັດໃຫ້ຄອບຄົວ ມີລາຮັບ ເພີ່ມຂຶ້ນກວ່າແຕ່ກ່ອນຫລາຍ ມີຢູ່ມີກິນ ແລະ ຫລຸດພົ້ນຈາກຄວາມທຸກຍາກ ເທື່ອລະກ້າວ.  ນອກນີ້ແລ້ວກໍ ເຮັດໃຫ້ທຸກຄົນ ໃນຄອບຄົວໄດ້ໃຊ້ ເວລາຢູ່ຮ່ວມກັນຫລາຍຂຶ້ນ. 

ຖ້າຫາກທ່ານໃດມີຄວາມສົນໃຈ ສົ້ມປາແຊບໆ ກໍສາມາດແວ່ຢ້ຽມຢາມ ປ້ານາງ ຢູ່ບ້ານຫ້ວຍຫລ້າ ເມືອງສັງທອງ ນະຄອນຫລວງວຽງຈັນໄດ້ ຫລື ຕິດຕໍ່ຜ່ານເບີໂທ ລະສັບ 0309064391, 020 58032708.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)