GMT+7 23/04/2018 10:53

ລັດຖະບານ ຫວຽດນາມ ຊ່ວຍເຫລືອ 47 ຕື້ກວ່າກີບ ສ້າງໂຮງຮຽນ ພອນສະຫວັນ ແຂວງຊຽງຂວາງ

 

 

ໃນວັນ​ທີ 17 ມີນາ 2018 ​ຢູ່​​ໂຮງຮຽນປະຖົມ​ໄຊຊະນະ​, ​ເມືອງ​ແປກ ​ແຂ​ວງຊຽງ​ຂວາງ ໄດ້​ມີ​ພິທີ​ ວາງ​ສີ​ລາ​ລຶກ ການກໍ່ສ້າງ​ໂຮງຮຽນ ພອນ​ສະຫວັນ ​ຂຶ້ນ​ຢ່າງ​ເປັນ​ທາງ​ການ, ຊຶ່ງ​ມີ​ມູນ​ຄ່າ​​ການ​ກໍ່ ສ້າງທັງ​ໝົດ ​ເກືອບ 50 ຕື້ກີບ. ​ໃນ​ນັ້ນ ທຶນຊ່ວຍເຫລືອ ຂອງລັດຖະບານຫວຽດນາມ 47 ຕື້​ກວ່າ​ກີບ, ​ທຶນສົມທົບ ຂອງລັດຖະບານລາວ ​ເກືອ​ບ 1 ຕື້​ກີບ. ເປັນກຽດ​ເຂົ້າ​ຮ່ວມ ​ພິທີ ໂດຍທ່ານ ບຸນ​ຕົ້ນ ຈັນ​ທະ​ພອນ ວ່າ​ການ ​ເລຂາ​ພັກ​ແຂວງ, ​ເຈົ້າ​ແຂວງຊຽງຂວາງ, ທ່ານ ພົນ​ຈັດຕະວາ ຫງວຽນຈີ​ເຫືອງ ​ຮອງ​ຫົວໜ້າ ບັນຊາ​ການ​ທະຫານ​ເຂດ 4 ກະຊວງ​ປ້ອງ​ກັນ​ປະ​ເທດ​ ແຫ່ງ ສສ ຫວຽດນາມ ​ພ້ອມ​ຄະນະ​, ມີ​ບັນ ດາ​ພາກສ່ວນ​ກ່ຽວຂ້ອງ​ ​ເຂົ້າ​ຮ່ວມ.

ຈຸດປະສົງ ຂອງການການກໍ່ສ້າງ ​ໂຮງຮຽນດັ່ງກ່າວ, ​ແມ່ນ​ການກໍ່ສ້າງ​ ສະຖານ​ທີ່​ເຕັກນິກ ​ທີ່​ສາມາດ ​ຕອບ​ສະໜອງຄວາ​ມຮຽກຮ້ອງ​ຕ້ອງການ ​ທາງ​ດ້ານ​ການ​ສຶກສາ​ ໃຫ້​ມີ​ຄຸນ​ນະພາ​ບສູງ​, ມີ​ອຸປະກອນ​ການ​ຮຽນ-ການ​ສອນ​ຄົບ​ຊຸດ ​ແລະ ທັນ​ສະ​ໄໝ. ອີກ​ດ້ານໜຶ່ງ ກໍ່​ເພື່ອ​ຕອບ​ສະໜອງ​ ໄດ້​ໃນ​ການ​ພັດທະນາ ​ແລະ ກໍ່ສ້າງ​ ຊັບພະຍາກອນ​ມະນຸດ ໃຫ້​ມີ​ຄຸນ​ນະພາ​ບ​ ໃຫ້​ແກ່​ປະ​ເທດ​ຊາດ ​ເວົ້າ​ລວມ, ​ເວົ້າ​ສະ​ເພາະ ​ແຂ​ວງ ຊຽງຂວາງ.

ທ່ານ ຫງວຽນຫວຽດ ອຽດ ຫົວໜ້າ ພະແນກເສດຖະກິດ ທະຫານເຂດ 4 ສສ ຫວຽດນາມ ຄະນະຄຸ້ມຄອງ ໂຄງການຝ່າຍ ກ່າວວ່າ: ໂຮງຮຽນແຫ່ງນີ້, ແມ່ນໂຄງການ ມິດຕະພາບ ໂດຍການຊ່ວຍ ເຫລືອຂອງ ລັດຖະບານ ສສ ຫວຽດນາມ ໃຫ້ແກ່ ລັດຖະບານລາວ. ການ​ກໍ່ສ້າງໂຮງຮຽນດັ່ງກ່າວ, ມີ​ທັງ​ໝົດ 6 ອາຄານ, ມີ 14 ຫ້ອງຮຽນ​, ​ມີມັດທະຍົມຕອນຕົ້ນ ແລະ ມັດທະຍົມຕອນປາຍ ສາມາດ ຮອງຮັບນັກຮຽນໄດ້ຫລາຍ​ກວ່າ 500 ຄົນ ແລະ ຄາດວ່າ ​ໂຄງການ​ດັ່ງກ່າວ, ຈະໃຫ້ສຳເລັດ ໃນປີ 2020.

ທ່ານ ບົວສອນ ສີນວນທອງ  ຮອງເຈົ້າແຂວງຊຽງຂວາງ ໄດ້ກ່າວສະແດງ ຄວາມຂອບໃຈ ຕໍ່ລັດຖະບານ ສສ ຫວຽດນາມ ທີ່ໄດ້ໃຫ້ການຊ່ວນເຫລືອ ໃນຄັ້ງນີ້ ແລະ ທັງເປັນຂອງຂັວນ  ແກ່ວັນສ້າງ ຕັ້ງພັກປະຊາຊົນປະຕິວັດລາວ  ຄົບຮອບ 63 ປີ (22/3/1955-22/3/2018)

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)