GMT+7 21/05/2018 02:25

JDB ສະຫຼອງຜົນງານ 5 ປີ ທີ່ດຳເນີນທຸລະກິດມີຜົນສຳເລັດ

 

 

ພິທີ​ສະຫຼຸບ​ຜົນງານ​ປີ 2017 ແຜນການ​ປີ 2018 ແລະ ສະເຫຼີມ​ສະຫຼອງ​ຜົນສຳເລັດ 5 ປີຂອງ​ທະນາຄານ​ຮ່ວມ​ພັດທະນາ (JDB) ພາຍ​ໃຕ້​ການ​ບໍລິຫານຂອງ​ຄະນະ​ບໍລິຫານ​ຊຸດ​ໃໝ່ ໄດ້ຈັດ​ຂຶ້ນ​ວັນ​ທີ 23 ກຸມພາ 2018 ທີ່​ໂຮງແຮມ​ຄຣາວ​ພລາ​ຊາ ເປັນປະທານ​ຂອງ​ທ່ານ ເອກະ​ພັນ ພະພິ​ທັກ ປະທານ​ສະພາ​ຜູ້​ບໍລິຫານ ທະນາຄານ​ຮ່ວມ​ພັດທະນາ ມີ​ຜູ້ບໍລິຫານ​ລະດັບ​ສູງ ຫົວໜ້າ​ສາຂາ ພະນັກງານ​ວິຊາ​ການ ນັກ​ທຸລະ​ກິດ ແລະ ລູກ​ຄ້າ​ຂອງ JDB ເຂົ້າ​ຮ່ວມ.

ໃນ​ພິທີ​ໄດ້​ສະຫຼຸບ​ຜົນງານ 1 ປີຜ່ານ​ມາ ວາງ​ທິດ​ທາງ​ແຜນການປີ 2018 ແລະ ຍ້ອງຍໍ​ຊົມເຊີຍ ພະນັກງານ​ຜູ້​ທີ່​ມີ​ຜົນງານ​ດີເດັ່ນ ໃນ​ການ​ປະກອບສ່ວນ​ເຂົ້າ​ໃນວຽກ​ງານ​ຂອງ JDB ໃຫ້​ມີ​ກຳລັງ​ໃຈ ແລະ ຕັ້ງໜ້າ​ປະຕິບັດ​ວຽກງານ​ໃຫ້​ດີ​ກວ່າ​ເກົ່າ ເຊິ່ງ​ປີ 2017 ຖື​ວ່າ​ເປັນ​ປີ​ທີ່​ມີ​ຜົນງານ​ພົ້ນ​ເດັ່ນຫຼາຍ​ດ້ານ ແລະ ກໍ່​ເປັນ​ປີ​ທີ່​ມີຄວາມ​ໝາຍ​ສຳຄັນ JDB ໄດ້​ຮັບໃບຢັ້ງຢືນ ISO:9001:2015 ໃນວຽກ​ງານ​ການ​ບໍລິຫານ​ໜ້າ​ຄາວເຕີ້ ແລະ ໄດ້​ເປີດ​ໜ່ວຍ​ບໍລິການເພີ່ມ​ຕື່ມ​ອີກ 11 ແຫ່ງ ຢູ່​ໃນ​ເຂດຊຸມ​ຊົມ​ຕ່າງໆ​ໃນ​ຂອບ​ເຂດ​ທົ່ວປະເທດ ລື່ນ​ຄາດໝາຍ 3 ແຫ່ງ ປັດຈຸບັນ JDB ມີ​ໜ່ວຍ​ບໍລິການທັງ​ໝົດ 53 ແຫ່ງ ອອກ​ຜະລິດຕະ​ພັນ​ໃໝ່​ເພື່ອ​ສະໜອງ​ລູກ​ຄ້າ ໃຫ້​ໄດ້​ຊົມໃຊ້​ຜະລິດ​ຕະ​ພັນ​ຢ່າງຫຼວງຫຼາຍ ແລະ ໄດ້​ຮັບ​ຄວາມປະ​ທັບ​ໃຈ ເຊັ່ນ: ເງິນ​ກູ້​ເພື່ອ​ພະນັກ​ງານ ເງິນ​ກູ້​ເພື່ອ​ການ​ສຶກ​ສາ ພາຍ​ໃນ ແລະ ຕ່າງປະເທດ ສຳເລັດ​ໃນ​ການ​ອອກ​ຜະລິດ​ຕະ​ພັນ ເຮັດ​ທຸລະ​ກຳ​ການ​ເງິນ​ຜ່ານ​ມື​ຖື (Mobile Banking) ຫຼື ເວົ້າຫຍໍ້​ວ່າ JDB Yes ຫາກໍ່​ເປີດ​ໃນປີ 2018.

ຈາກ​ຜົນງານ​ດັ່ງກ່າວ ​ໃນ​ພິທີໄດ້​ຍ້ອງຍໍ​ກົມ​ກອງ ແລະ ບຸກຄົນດີເດັ່ນ​ຈາກ​ການ​ປະກອບສ່ວນວຽກ​ງານ​ຂອງ JDB ຄື: ທ່ານ ເອກະ​ພັນ ພະ​ພິ​ທັກ ໄດ້​ມອບ​ລາງວັນ​ຂັນ​ຄຳ​ໃຫ້​ທ່ານ ສູນ​ທອນ ຈັນທະ​ວົງ ຮອງ​ປະທານ​ສະພາ​ຜູ້ບໍລິຫານ JDB ຜົນງານ​ຜູ້​ບໍ​ລິຫານ​ດີເດັ່ນ​ຕະຫຼອດ 5 ປີ ແລະ ທ່ານ ສູນ​ທອນ ຈັນທະ​ວົງ ໄດ້ມອບ​ລາງວັນຂັນ​ຄຳ​ໃຫ້ 3 ພາກສ່ວນ ຄື: ຫົວໜ້າ​ປະຕິບັດ​ການເຂດ 3 ທີ່​ມີ​ຜົນງານ​ຕົວ​ເລກ​ເງິນຝາກ ແລະ ເງິນ​ກູ້​ໃນ​ລະດັບ​ດີ ໜ່ວຍ​ບໍລິການ​ຕົ້ນ​ເຜິ້ງ​ທີ່​ມີ​ຜົນງານ​ບັນລຸ​ເປົ້າ​ໝາຍ​ເງິນ​ຝາກ ແລະ ທີມ​ງານ​ພັດທະນາ Mobile Banking ທີ່​ມີ​ຜົນງານ​ບັນລຸ​ເປົ້າ​ໝາຍ​ການຈັດຕັ້ງປະຕິບັດ​ຕາມ​ແຜນການ ນອກ​ນີ້ ທ່ານ ບຸນ​ສະຫວ່າງ ພິລາ​ໄຊພິ​ທັກ ຜູ້ອຳນວຍການ​ໃຫຍ່ JDB ຍັງ​ໄດ້​ມອບ​ລາງວັນ​ຂັນເງິນ​ໃຫ້ 9 ພາກສ່ວນ ຄື: ບຸດ​ບໍລິການ​ແດນສະຫວັນ ທີ່​ບັນລຸ​ເປົ້າ​ໝາຍ​ເງິນຝາກ ແລະ ເປົ້າ​ໝາຍ​ບັນຊີໜ່ວຍ​ບໍລິການ ຫຼັກ 52 ບັນລຸເປົ້າ​ໝາຍ​ເງິນ​ຝາກ ພະ​ແນກ​ສິນເຊື່ອ ສາມາດ​ຫາ​ລູກ​ຄ້າ​ເງິນ​ກູ້​ໄດ້ຕາມ​ເປົ້າ​ໝາຍ ທີມ​ງານສະເພາະ​ກິດ​ທວງ​ໜີ້​ນອກ​ຜັງ ແລະ NPL ສາມາດ​ທວງ​ໜີ້​ເສຍ​ຄືນໃຫ້​ແກ່​ທະນາຄານ ພະແນກການຕະຫຼາດ ຂະແໜງ​ຜະລິດ​ຕະ​ພັນ ແລະ ລາຄາ​ດີເດັ່ນ​ໃນ​ການ Lead ລູກ​ຄ້າ​ເຂົ້າ​ມາ​ໃຊ້​ບໍ​ລິການ ພະແນກການ​ຕະຫຼາດ ຂະແໜງ​ໂຄສະນາ​ປະຊາສຳພັນ ຜະລິດ​ສື່​ໂຄສະນາ​ດີເດັ່ນ ທີມ​ງານ ISO ບັນລຸ​ເປົ້າ​ໝາຍ​ການ​ຈັດຕັ້ງ​ປະຕິບັດ​ຕາມ​ແຜນການໜ່ວຍ​ບໍລິການ​ສີ​ໄຄ ບັນລຸ​ເປົ້າໝາຍ​ເງິນ​ກູ້ ແລະ ບຸດ​ບໍລິການຕະຫຼາດ​ເຊົ້າ​ຊອບ​ປິ້ງ​ມໍ 2 ບັນລຸເປົ້າ​ໝາຍ​ບັນຊີ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)